باتىس قازاقستان وبلىسىنىڭ اكىمى ناريمان تورەعاليەۆ سۋ تاسقىنىنان زارداپ شەككەن ورال قالاسىنداعى ساياجاي ۋچاسكەلەرىنىڭ تۇرعىندارىمەن كەزدەستى.
كەزدەسۋ بارىسىندا تابيعي اپات سالدارىنان كەلگەن شىعىنداردى وتەۋ مەحانيزمدەرىنە قاتىستى ساۋالدار كوتەرىلدى.
وبلىس اكىمى تۇرعىندارعا وڭىردە سۋ تاسقىنىنان زارداپ شەككەن تۇرعىندار تاراپىنان تۋىندايتىن قۇقىقتىق ماسەلەلەر بويىنشا ارنايى جەدەل توپ جۇمىس ىستەيتىنىن جانە تۇرعىنداردىڭ سول جۇمىس توبىنا جەكە دارا جولىعىپ كومەك الۋعا بولاتىنىن اتاپ ءوتتى.
«تۇرعىنداردىڭ ءوتىنىشى نەگىزىندە وبلىس بويىنشا سۋ تاسقىنىنان زارداپ شەككەن 9 224 وتباسىعا 3,4 ملرد تەڭگە 100 ايلىق ەسەپتىك كورسەتكىش كولەمىندە الەۋمەتتىك كومەك بەرىلدى. ەندىگى كەزەكتە,شىعىنداردى ەسەپتەۋ بويىنشا كوميسسيانىڭ قورىتىندىسىنا سايكەس، 150 اەك كولەمىندەگى تولەمدەر جالعاسۋدا» - دەدى ناريمان تورەعاليەۆ.
كەزدەسۋ بارىسىندا وبلىس اكىمى ساياجايداعى ۇيلەرى جالعىز باسپانا بولىپ تابىلاتىن تۇرعىندارعا زاڭ اياسىندا ءۇي بەرىلەتىنىن اتاپ ءوتتى.
جينالعانداردىڭ باسىم كوپشىلىگىنىڭ ساياجايداعى ۇيلەرى قۇجات جۇزىندە جاقىن تۋىستارىنا راسىمدەلگەن، وسىعان بايلانىستى، ولاردىڭ اتتارىندا تۇرعىن ءۇي بولعاندىقتان ونداي ازاماتتاردىڭ وتىنىشتەرى زاڭ شەڭبەرىندە جەكە-جەكە قارالاتىنىن ءتۇسىندىردى.
وسىلايشا، كەزدەسۋگە جينالعان تۇرعىنداردىڭ ساۋالدارىنا ءتيىستى جاۋاپتار بەرىلدى.
اتاپ وتەرلىگى، سۋ تاسقىنىنان زارداپ شەككەن تۇرعىندارعا قۇقىقتىق كەڭەس بەرەتىن جەدەل توپ – ورال قالاسىنداعى ازاماتتاردى قابىلداۋ ورتالىعىندا جۇمىس ىستەۋدە (سارايشىق كوشەسى 47).
