اقتوبە وبلىسىنىڭ پوليتسيا دەپارتامەنتى 44 642 857.14 تەڭگەگە ەكى جەدەلساتى ساتىپ الۋعا تەندەر جاريالادى، دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
"اقتوبە وبلىسىنىڭ پد قاجەتتىلىگى ءۇشىن ليفتتەردى ساتىپ الۋ" دەگەن تاقىرىپپەن جاريالانعان مەملەكەتتىك ساتىپ الۋعا وتىنىمدەر قابىلداۋ 16 شىلدەدە باستالادى. تەندەر جەڭىمپازى 31 شىلدە كۇنى انىقتالادى.
تەحنيكالىق سيپاتتامادا پوليتسيا دەپارتامەنتى تاپسىرىس بەرگەن جەدەلساتىلاردىڭ ءبىرىنىڭ جۇك كوتەرگىشتىگى 1000 كگ، ەكىنشىسى 450 كگ بولۋى كەرەكتىگى جازىلعان. بىراق، ەكى جەدەلساتىنىڭ جەكە-جەكە قۇنى انىق كورسەتىلمەگەن. ەلىمىزدەگى جۇكتەمەسى 450-1000 كەلىلىك جەدەلساتىلاردىڭ ورتاشا قۇنىن قارادىق. مۇنداي جەدەلساتىلاردى ساتىپ الۋ قۇنى ورتاشا 6 000 000 - 10 000 000 تەڭگەنى قۇرايدى ەكەن.
سوندا "اقتوبە وبلىسىنىڭ پوليتسيا دەپارتامەنتى ەكى جەدەلساتى ءۇشىن 44 642 857.14 تەڭگەنى قانداي نەگىزگە سۇيەنىپ ءبولىپ وتىر؟" دەگەن سۇراق تۋىندايدى. نە سەبەپتى ءار تاۋاردىڭ جەكە وزىندىك قۇنى كورسەتىلمەگەن؟ بۇل سۇراقتاردى ءتيىستى ورگانعا جولدادىق. جاۋابىن قوسىمشا جاريالايتىن بولامىز.
اقان بىرلىك،
«ادىرنا» ۇلتتىق پورتالى
