پارلامەنت ءماجىلىسىنىڭ دەپۋتاتى نۇرگۇل تاۋ عىلىم جانە جوعارى ءبىلىم مينيسترلىگىنىڭ وكىلى اقەركە ابىلايحان جانە Respublica پارتياسىنان سايلانعان ءماسليحات دەپۋتاتتارىمەن بىرلەسىپ ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتىك جاتاقحانالارىن ارالادى، دەپ حابارلايدى «ادىرنا» ءتىلشىسى پارتيانىڭ ءباسپاسوز قىزمەتىنە سىلتەمە جاساپ.
جاتاقحانالاردىڭ جاعدايىمەن وقۋ ورىننىڭ پرورەكتورى سۋاتاي ءسابيت تانىستىردى.
«ەلىمىزدەگى بەتكە ۇستار وقۋ ورىننىڭ 6 مىڭعا جۋىق ورىنمەن قامتيتىن 15 جاتاقحاناسى بار. بىراق ءبارىنىڭ بىردەي جاعدايى ءماز ەمەس. جاتاقحانالاردا قاۋىپسىزدىكتى قامتاماسىز ەتۋ ءۇشىن كۇزەت كومپانيالارىمەن كەلىسىمشارتتار دا جاسالماعان بولىپ شىقتى. ىشكى كۇزەت دەپ شاقىرتقان ماماندارىنىڭ ستۋدەنتتەردىڭ ومىرىنە قاۋىپ تونگەن جاعدايدا قالاي قيمىل جاسايتىنى دا بەلگىسىز.
ستۋدەنتتەر قالاشىعىنداعى ەڭ ەسكى جاتاقحانا دەپ تانىستىرعان №9 ستۋدەنتتەر ءۇيى «ۇلتتىق ۋنيۆەرسيتەتتىڭ» جاتاقحاناسى دەپ اتاۋعا ءتىپتى ۇياتتى جاعدايدا. جاتاقحانادا اس ازىرلەيتىن جانە كىر جۋاتىن ورىن ءبىر جەردە ورنالاسقان. ستۋدەنتتەردىڭ ايتۋىنشا، كەيدە كىر ماشينالاردان سۋى اعىپ، اس بولمەسى كول بولادى ەكەن. ستۋدەنتتەردىڭ تۇرعىن جاعدايىن ارنايى تۇسىرىلگەن بەينەجازبادان دا كورە الاسىزدار»،—دەلىنگەن حابارلامادا.
نۇرگۇل تاۋ ستۋدەنتتەردىڭ قاۋىپسىزدىگى جانە دەنساۋلىعى ءۇشىن الداعى وقۋ جىلىنا دەيىن بارلىق انىقتالعان كەمشىلىكتەردى تۇزەتۋدى جوو-ىن باسشىلىعىنا تاپسىردى. ونى تەكسەرۋ ءۇشىن تامىز ايىندا Respublica پارتياسىنىڭ ءماسليحات دەپۋتتارى قايتا كەلەدى.
<View this post on Instagram
