بۇگىن پرەزيدەنت قاسىم-جومارت توقاەۆ ۇلتتىق بانك توراعاسى تيمۋر سۇلەيمەنوۆءتى قابىلدادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
مەملەكەت باسشىسىنا ۇلتتىق بانكتىڭ بيىلعى جارتىجىلدىقتا ىسكە اسىرعان اقشا-نەسيە ساياساتىنىڭ قورىتىندىسى تۋرالى ەسەپ بەرىلدى.
تيمۋر سۇلەيمەنوۆ قازاقستانداعى جانە الەمدەگى ەكونوميكالىق جاعدايدىڭ دامۋ بارىسى جانە ينفلياتسيانىڭ قارقىنى مەن ونى تۇراقتاندىرۋ شارالارى جونىندە باياندادى. سونداي-اق ول جىلدىق ينفلياتسيانىڭ باسەڭدەگەنىن جانە ىشكى ەكونوميكادا پروينفلياتسيالىق فاكتورلاردىڭ ساقتالىپ وتىرعانىن ايتتى.
توراعا ۇلتتىق تولەم جۇيەسى مەن اشىق بانكينگ پرينتسيپتەرىن دامىتۋ جانە قازاقستاندىقتاردىڭ قارجىسىن الاياقتاردان قورعاۋ ءۇشىن انتيفرود-ورتالىق قۇرۋ جوبالارىن جۇزەگە اسىرۋعا قاتىستى مەملەكەت باسشىسى بەرگەن تاپسىرمالاردىڭ ورىندالۋ بارىسى تۋرالى ايتتى.
كەزدەسۋ سوڭىندا قاسىم-جومارت توقاەۆ ۇلتتىق بانكتىڭ قىزمەتىنە، سونىڭ ىشىندە ينفلياتسيانى ودان ءارى تۇراقتاندىرۋ جانە تسيفرلىق قارجىلىق ينفراقۇرىلىم جاساۋ جونىندە بىرقاتار تاپسىرما بەردى.
