اقمولا وبلىسىندا جاڭا وقۋ جىلىنا دايىندىق بارىسى قالاي؟

ءبىلىم بەرۋ ۇيىمدارىنىڭ ماتەريالدىق-تەحنيكالىق بازاسىن جاقسارتۋ ماسەلەسى وبلىستىق ءبىلىم باسقارماسىنىڭ باقىلاۋىندا. 2024 جىلعا 105 نىسانعا كۇردەلى جانە اعىمداعى جوندەۋ جۇرگىزۋ ءۇشىن وبلىستىق جانە رەسپۋبليكالىق بيۋدجەتتەن 11 ملرد تەڭگەدەن استام قاراجات ءبولىندى. وڭىردە 42 مەكتەپ، 3 بالاباقشا، دارىندى بالالارعا ارنالعان ينتەرنات (جاتاقحانا), ارنايى ءبىلىم بەرۋ ۇيىمى، 2 لاگەر جانە 2 تجكب ۇيىمدارى كۇردەلى جوندەۋمەن قامتىلدى. اعىمداعى جوندەۋ 52 ءبىلىم بەرۋ وبەكتىسىندە جۇرگىزىلۋدە. ساندىقتاۋ اۋدانىنىڭ ءبىلىم بەرۋ ۇيىمدارىندا جوندەۋ جۇمىستارى قالاي ءوتىپ جاتقانىڭ ءبىلىم ءبولىمىنىڭ باسشىسى اراي ابەنوۆا مالىمەت بەردى.

«كامەنكا اۋىلىنىڭ جالپى ءبىلىم بەرەتىن مەكتەبىندە كۇردەلى جوندەۋدىڭ ەكىنشى كەزەڭى جۇرگىزىلۋدە. قازىرگى ۋاقىتتا اۋماقتى اباتتاندىرۋ، سپورت زالى مەن اسحانانى، وقۋ كابينەتتەرىن، دالىزدەردى، فويەلەردى، جۋىناتىن بولمەلەردى بەزەندىرۋ جۇمىستارى جۇرگىزىلۋدە. سپاسسكوە اۋىلىنىڭ نەگىزگى ورتا مەكتەبى كۇردەلى جوندەۋمەن قامتىلدى. جوندەۋ بارىسىندا كوشە جارىعىن ورناتۋ، بەينەباقىلاۋ، جەلدەتۋ، مەكتەپ عيماراتىنىڭ قاسبەتىن قاپتاۋ، توسەنىش توسەۋ، الاڭداردى توگۋ جانە اسفالتتاۋ، سىرتقى كارىز ورناتۋ جانە ت. ب.جۇمىستارى جۇرگىزىلەدى. بارلىق جۇمىستار 95% ورىندالدى»، - دەپ تولىقتىردى ءبىلىم ءبولىمىنىڭ باسشىسى.

وبلىستا 1700 ورىندىق 5 مەكتەپتىڭ قۇرىلىسى جالعاسۋدا – بۇل ساندىقتاۋ اۋدانى پەتروۆكا اۋىلىندا 80 ورىندىق، بەستوبە اۋىلىندا 300 ورىندىق، قوسشى قالاسىندا 1200 ورىندىق، ءبىرجان سال اۋدانى بۇلاندى اۋىلىندا 80 ورىندىق جانە جارقايىڭ اۋدانى ءبىرسۋات اۋىلىندا 80 ورىندىق مەكتەپ. سونىمەن قاتار، «جايلى مەكتەپ» ۇلتتىق جوباسى اياسىندا اعىمداعى جىلى 12 200 ورىندىق 9 مەكتەپتى ىسكە قوسۋ جوسپارلانعان، ونىڭ  جەتەۋى تسەلينوگراد اۋدانىندا، ەكەۋى كوكشەتاۋ قالاسىندا.