كۇنى كەشە ۇكىمەت باسشىسى اسقار ءماميننىڭ ارىسقا جاساعان جۇمىس ساپارى كەزىندە تۇركىستان وبلىسىنىڭ اكىمى ومىرزاق شوكەەۆ قازىرگى تاڭدا وتەماقى تولەۋ بويىنشا جۇمىستار جۇرگىزىلىپ جاتقانىن باياندادى. ايتۋىنشا، بارلىق قۇجات جينالىپ قويعان. ءىىم بازاسىمەن تەكسەرىلىپ راستالعان. باسىم كوپشىلىگىنىڭ ءبىر رەتتىك كارتوچكا راسىمدەۋى ءۇشىن ەسەپشوتى اشىلىپ، قازىرگى تاڭدا كامەلەت جاسىنا تولماعاندارعا تولەم كارتوچكاسىن راسىمدەۋ جۇمىستارى ءجۇرىپ جاتىر.
«تولەم كارتوچكالارى 5 تامىزدان باستاپ تاراتىلاتىن بولدى»، - دەدى ومىرزاق شوكەەۆ ارىستا اسقار ءماميننىڭ قاتىسۋىمەن وتكەن جيىندا.
ال ارىس قالاسىنىڭ اكىمى مۇرات قادىربەك تولەم كارتوچكالارىن تاراتۋ 5 تامىزدان باستالىپ، ءبىر اپتا جۇرگىزىلەدى دەپ وتىر. قارجى بارلىق تۇرعىنعا ءبىر ساتتە، ياعني، 12 تامىزدا اۋدارىلادى.
الايدا ارىس تۇرعىندارى بيلىك قۇرعاق ۋادەمەن تويدىرىپ وتىر ما دەپ الاڭداۋلى.
«بىزگە جارىلىستان كەيىن ءبىر اي وتكەن سوڭ بەرەدى دەدى. قۇجاتتارىمىزدى تاپسىردىق. 24 شىلدەنى كۇتتىك، كەيىن ايتتى 29-ىنا بەرىلەدى دەپ. ونى دا كۇتتىك. جوق، ەشبىرىمىز ءالى المادىق ونى. كەرەك دەسەڭىز، ەستىپ جاتىرمىز، كەيبىر تۇرعىندار تىزىمنەن وزدەرىن تاپپاي جاتىر ەكەن. مەكەنجايى بويىنشا ءبىرى قوستاناي، ەندى ءبىرى ارقالىق تۇرعىنى بولىپ شىققان. بۇلار اقشا اۋدارماۋ ءۇشىن وسىلاي ادەيى جاساپ وتىر ما؟» دەپ اشۋعا بۋلىقتى تۇرعىندار.
ايتا كەتەيىك، شىلدە ايىندا پرەزيدەنت قاسىم-جومارت توقاەۆتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا تۇركىستان وبلىسىنىڭ اكىمى ارىستىقتارعا وتەماقى شىلدە ايىنىڭ سوڭىنا دەيىن تاراتىلاتىنىن ايتقان بولاتىن. الايدا تامىز ايى كەلىپ جەتسە دە، ارىستىڭ ەشبىر تۇرعىنى ءالى ءبىر تيىن دا الماعان.
دەرەككوز: stan.kz
"ادىرنا" ۇلتتىق پورتالى
