كەلەسى ايدىڭ باسىندا قر پرەزيدەنتى ق.توقاەۆ حالىققا ءوز جولداۋىن ارنايدى ەكەن. ءتىپتى وندا شامامەن قانداي ماسەلە كوتەرەتىنىنە دەيىن جاريالاپ قويىپتى. توقاەۆ ەڭ ءبىرىنشى ەسىرتكى بيزنەسىمەن كۇرەستى كۇشەيتەتىنىن جەتكىزدى.
جاسىراتىنى جوق، بىزدە بيلىكتە وتىرعانداردىڭ، باي-شونجارلاردىڭ بالالارى، ءتىپتى نەمەرەلەرىنە دەيىن ناركومان. تۇيەنى تۇگىمەن جۇتقانداردىڭ بالالارى ابدەن ەسىرىپ، شىرىگەن جۇمىرتقالار ناشاقورلىققا سالىندى. ءتىپتى كەرەك دەسەڭ، ناركوبارونداردىڭ كوكەلەرى بيلىكتە وتىر. ولاردى قۇرىقتاۋعا توقاەۆتىڭ كۇشى جەتە مە؟
رەسمي مالىمەت بويىنشا، بىزدە 55-مىڭنان اسا ناشاقور بار. بىراق بىرىككەن ۇلتتار ۇيىمى قازاقستاندا 150 مىڭنان استام ناركومان بارىن كورسەتەدى. سونداي-اق بىرىككەن ۇلتتار ۇيىمىنىڭ مالىمەتىنشە، سولتۇستىك باعىتقا قاراي قازاقستاننان جىل سايىن 2000 مىڭ توننا گەروين وتەدى ەكەن. سونىڭ 200 تونناسى ەلىمىزدە قالاتىن كورىنەدى. سوندىقتان ناركوباروندارمەن كۇرەس جۇرگىزەمىز دەۋ بەكەر ءسوز سەكىلدى.
ول ءۇشىن قىتايداعىداي ەسىرتكى ساتۋشىلاردى ۇستالعان بەتتە اتىپ تاستاۋ كەرەك. ەگەر بىزدە وسىنداي قاتاڭ شارا قولدانىلماسا، ءبارى بەكەر بولماق.
بىراق ءبىزدىڭ بيلىك قىزىق قوي. "كۇرەستى كۇشەيتەمىز، قاتىرامىز، ۇستايمىز!" دەيدى دە، كەيىن ارتىنان ءبارىن جىلى جاۋىپ قويا سالادى. ودان كەيىن ول باستامانىڭ سوڭى نە بولعانىن ەشكىم سۇرامايدى. سەبەبى، پارلامەنتتە شىنايى وپپوزيتسيالىق پارتيالار جوق. دەپۋتاتتارىمىزدىڭ ءتۇرى اناۋ، بەتكە اشىق ايتپاق تۇگىلى، كولەڭكەسىنەن ۇركىپ جۇرەدى. وسىعان بيلىك ابدەن ۇيرەنىپ العان سوڭ، ءىستىڭ سۇراۋشىسى جوق ەكەنىن ءبىلىپ، ۋادەسىن ورىندامايدى.
سەرىك جۇماباەۆ
"ادىرنا" ۇلتتىق پورتالى
