Kelesi aıdyń basynda QR Prezıdenti Q.Toqaev halyqqa óz Joldaýyn arnaıdy eken. Tipti onda shamamen qandaı másele kóteretinine deıin jarııalap qoıypty. Toqaev eń birinshi esirtki bıznesimen kúresti kúsheıtetinin jetkizdi.
Jasyratyny joq, bizde bılikte otyrǵandardyń, baı-shonjarlardyń balalary, tipti nemerelerine deıin narkoman. Túıeni túgimen jutqandardyń balalary ábden esirip, shirigen jumyrtqalar nashaqorlyqqa salyndy. Tipti kerek deseń, narkobarondardyń kókeleri bılikte otyr. Olardy quryqtaýǵa Toqaevtyń kúshi jete me?
Resmı málimet boıynsha, bizde 55-myńnan asa nashaqor bar. Biraq Birikken Ulttar Uıymy Qazaqstanda 150 myńnan astam narkoman baryn kórsetedi. Sondaı-aq Birikken Ulttar Uıymynyń málimetinshe, soltústik baǵytqa qaraı Qazaqstannan jyl saıyn 2000 myń tonna geroın ótedi eken. Sonyń 200 tonnasy elimizde qalatyn kórinedi. Sondyqtan narkobarondarmen kúres júrgizemiz deý beker sóz sekildi.
Ol úshin qytaıdaǵydaı esirtki satýshylardy ustalǵan bette atyp tastaý kerek. Eger bizde osyndaı qatań shara qoldanylmasa, bári beker bolmaq.
Biraq bizdiń bılik qyzyq qoı. "Kúresti kúsheıtemiz, qatyramyz, ustaımyz!" deıdi de, keıin artynan bárin jyly jaýyp qoıa salady. Odan keıin ol bastamanyń sońy ne bolǵanyn eshkim suramaıdy. Sebebi, Parlamentte shynaıy oppozıııalyq partııalar joq. Depýtattarymyzdyń túri anaý, betke ashyq aıtpaq túgili, kóleńkesinen úrkip júredi. Osyǵan bılik ábden úırenip alǵan soń, istiń suraýshysy joq ekenin bilip, ýádesin oryndamaıdy.
Serik JUMABAEV
"Adyrna" ulttyq portaly
