الاياقتار ازايماي تۇر

2833
Adyrna.kz Telegram
https://adyrna.kz/content/uploads/2024/08/img_8122.jpeg

باتىس قازاقستان وبلىسىندا جىل باسىنان بەرى تۇرعىندارعا ينتەرنەت-الاياقتار 302 175 686 مىڭ تەڭگە شىعىن كەلتىرسە، سونىڭ 31 471 712  مىڭ تەڭگەسى جابىرلەنۋشىلەرگە قايتارىلعان.

           بقو پد كپب ءبولىم باستىعى، پوليتسيا مويورى  اقجان يحسانعاليدىڭ مالىمەتىنشە، قازىرگى تاڭدا وبلىس اۋماعىندا 234 ينتەرنەت-الاياقتىق قىلمىسى تىركەلسە، 52-ءسى سوتقا جولدانعان. سونىڭ ىشىندە بانك قىزمەتكەرى سىلتاۋىمەن ازاماتتاردى الداعان رف ازاماتىنا قاتىستى 8 ەپيزودتى قىلمىستىق ءىس جانە پاتەر جالعا بەرۋ تاسىلىمەن ورال قالاسى تۇرعىنىنا قاتىستى 5 فاكتىمەن ءىس قوزعالىپ، سوتتا قارالۋدا.

         ساراپتاۋ بارىسىندا  بانك قىزمەتكەرى بولىپ – 151 قىلمىس، ينۆەستيتسيالاۋ بويىنشا – 4 قىلمىس، ونلاين نەسيە الۋدا – 30 قىلمىس، تاۋار ساتۋ-ساتىپ الۋ تولەمدەرىمەن - 16 قىلمىس، اقشا اينالدىرۋ (ستاۆكي) بويىنشا – 1 قىلمىس اشكەرەلەنگەن. ال الاياقتاردىڭ قۇربانى بولعانداردىڭ   45-ءى زەينەتكەر، 25-ءى مۇعالىم، 31-ءى دارىگەر، 30-ى مەملەكەتتىك قىزمەتكەر بولسا،  جۇمىسسىزدارعا قاتىستى – 37, وزگە مامان يەلەرىنە قاتىستى – 66 ءىس تىركەلىپ وتىر. وڭىردە مۇعالىمدەر مەن دارىگەرلەرگە قاتىستى الاياقتىق دەرەكتەرى جيىلەپ كەتتى. سوعان بايلانىستى 8 مىڭنان استام دارىگەر مەن 16 مىڭنان استام مۇعالىمگە الدىن الا ەسكەرتۋ جۇمىستارى تولىعىمەن جۇرگىزىلگەن.

       ينتەرنەت الاياقتىق قىلمىسىمەن كۇرەستىڭ ەڭ ءتيىمدى جولدارىنىڭ ءبىرى – الدىن الۋ شارالارى. پوليتسيا مويورى  اقجان سەرىكۇلى وسى ورايدا باق ، ينتەرنەت جەلىلەرىندە، حالىق كوپ شوعىرلاناتىن جەرلەردە حالىقپەن الدىن الۋ شارالارى ۇدايى تۇردە جۇرگىزىلىپ وتىراتىنىن جەتكىزدى. ماسەلەن، باق-قا 17922 باسىلىم شىعارىلعان، سونىڭ ىشىندە 123 559 ازاماتقا تىكەلەي جەتكىزىلگەن. 50922 ازامات ەگوۆ سايتى ارقىلى ونلاين نەسيەدەن 6 ايعا بۇعاتتالعان، 19 968 ازامات «كيبەرپول» ينستاگرامم اككاۋندىنا جازىلعان. سونداي-اق حالىق كوپ شوعىرلاناتىن جەرلەردە 10 مىڭ پاراقشا تاراتىلعان.

         ال بقو پوليتسيا دەپارتامەنتى كريمينالدىق پوليتسيا باسقارماسى باستىعىنىڭ ورىنباسارى، پوليتسيا پودپولكوۆنيگى ارتۋر مۇساعاليەۆتىڭ ايتۋىنشا، Cyberpol توبىنىڭ قىزمەتكەرلەرى جابىرلەنۋشىلەردىڭ شىعىندارىن قر ازاماتتىق كودەكسى 953-بابىنىڭ نەگىزىندە دروپپەرلەردەن قايتارۋ جۇمىسىن ۇيىمداستىرۋدا. بيىل دروپپەرلەردەن سوت شەشىمىمەن 15 ملن 389,535 مىڭ تەڭگە وندىرىلگەن. ارتۋر عايساۇلىنىڭ سوزىنشە، اعىمداعى جىلى   159 ينتەرنەت-الاياقتىق قىلمىسى تىركەلدى، بۇل وتكەن جىلعىدان 18 دەرەككە نەمەسە 10,2 پايىزعا از.  سوتقا دەيىنگى تەرگەپ-تەكسەرۋ بارىسىندا الاياقتىق فاكتىلەر كەزىندە پايدالانىلعان دروپپەرلەردىڭ 59 بانكتىك ەسەپشوتى (33 ملن 714,166 مىڭ تەڭگە) جانە الاياقتار قوڭىراۋ شالعان 392 ۇيالى تەلەفون ءنومىرى بۇعاتتالعان.

        باسقارما باستىعى ورىنباسارىنىڭ ايتۋىنشا، ازاماتتاردىڭ ينتەرنەت-الاياقتىق دەرەكتەرى بويىنشا ارىز-شاعىمىنا جەدەل دەن قويۋ ءۇشىن وتكەن جىلى 19 مامىردا ورال قالالىق پوليتسيا باسقارماسى جانىندا كيبەرقىلمىسقا قارسى ءىس-قيمىل جاسايتىن «Cyberpol» توبى قۇرىلىپ، ونىڭ قۇرامىنا 4 تەرگەۋشى، 3 جەدەل ۋاكىل جانە 1 كريميناليست ەنگىزىلگەن ەدى. سودان بەرى اشىلعان قىلمىستىق ىستەر ىشىندە ەپيزودتىق بىرنەشە ىستەر بار.

      سوزىمىزگە مىسال ەتسەك، جاقىندا ورال قالاسىنىڭ الاياقتىقپەن اينالىسقان  42 جاستاعى تۇرعىنى ۇستالعان بولاتىن. بقو پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنە سۇيەنسەك، اتالمىش الاياق ءوزىن قۇرىلىس سالاسىنىڭ مامانى، پاتەرلەردىڭ يەسى نەمەسە دەلدال رەتىندە تانىستىرىپ، پاتەرلەردى ساتىپ، رەسىمدەۋمەن اينالىسقان. ناتيجەسىندە، وبلىس تۇرعىندارىنىڭ اقشالاي قاراجاتىن يەمدەنگەن. اتاپ ايتقاندا، جاڭاقالا اۋدانىنىڭ تۇرعىنى الاياققا 30 ملن تەڭگەسىن اۋدارىپ جىبەرگەن. ال ورال قالاسىنىڭ تۇرعىنى ءۇيدى رەسىمدەۋ ءۇشىن 27,8 ملن تەڭگەسىن بەرگەن. وبلىس تۇرعىندارىنا كەلتىرىلگەن جالپى زالال كولەمى 100 ملن تەڭگەدەن اسادى. الاياقتىق دەرەكتەرى نەگىزىندە 7 ەپيزود بويىنشا قىلمىستىق ءىس قوزعالىپ، تەرگەۋ امالدارى جۇرگىزىلۋدە. وسى ورايدا بقو پوليتسيا دەپارتامەنتى قىراعى بولۋ، بەيتانىس جانە تەكسەرىلمەگەن ادامدارعا سەنبەۋ كەرەكتىگىن قاتاڭ ەسكەرتەدى.

سول سەكىلدى وزدەرىن بانك قىزمەتكەرى رەتىندە تانىستىرىپ، الاياقتىق جاساعان قىلمىسكەرلەردىڭ سىبايلاسى – رەسەيلىك ازامات قولعا ءتۇسىپ، 8 ەپيزودتىق قىلمىستىق ءىس  سوتقا جىبەرىلگەن ەدى.

       –  مۇنداي قىلمىستار ءالى كۇنگە ازايار ەمەس. مىسالى، ورال قالاسىنىڭ تۇرعىنى پاتەردى جالعا بەرەمىن دەپ krisha.kz قوسىمشاسىندا جالعان جارناما بەرگەن (كەلتىرىلگەن شىعىن – 170 مىڭ تەڭگە). ال ماڭعىستاۋ وبلىسىنىڭ تۋماسى جۇمىسقا ورنالاستىرامىن دەپ جابىرلەنۋشىلەرگە 1,2 ملن تەڭگە زالال كەلتىرگەن. بۇلارعا قاتىستى سايكەسىنشە 5 جانە 3 ەپيزودتىق قىلمىستىق ىستەر    سوتقا جولداندى. ينتەرنەت-الاياقتىق جاساۋدىڭ كەڭ تارالعان، سونداي-اق جاڭا تاسىلدەرىن جاريا ەتە وتىرىپ، تۇرعىنداردىڭ الدانباۋى ءۇشىن الدىن الۋ جۇمىستارىنىڭ اياسىن كەڭەيتۋدى ماقسات ەتىپ وتىرمىز، – دەيدى پوليتسەيلەر.  

          باتىس قازاقستان وبلىسىندا ينتەرنەت الاياقتارىنىڭ قۇرباندارى ازايماي تۇر. ينتەرنەت الاياقتىعىن ازايتۋ ماقساتىندا تاياۋدا وبلىس اۋماعىندا ارنايى جەدەل-پروفيلاكتيكالىق ءىس-شارا ءوتتى. پوليتسيا قىزمەتكەرلەرى قالا كوشەلەرىندە الاياقتاردىڭ ءىس-ارەكەتى تۋرالى جازىلعان ءۇن پاراق تاراتتى. شارانىڭ ماقساتى – ەگدە جاستاعى جانداردىڭ ينتەرنەت باۋكەسپەلەرىنىڭ قۇربانىنا اينالماسى ءۇشىن ءتيىستى اقپارات بەرۋ. قىلمىسكەرلەر وزگە ادامنىڭ شوتىنداعى قارجىسىن جىمقىرىپ، باسىنا ميلليونداعان نەسيە راسىمدەيدى. قالا تۇرعىندارى زاڭ كۇشەيتىلىپ جاتسا دا، الاياقتاردىڭ جولىن كەسۋدە ءىس-قيمىلدىڭ كەشەۋىلدەپ جاتقانىنا تاڭعالادى. ءتارتىپ ساقشىلارى بوگدە ادامعا وزىڭىزگە تيەسىلى اقپاراتتى ايتپاي، بانك نەمەسە وزگە مەكەمەنىڭ قىزمەتكەرى دەپ قوڭىراۋ شالعاندارمەن سويلەسپەۋگە، «ەگوۆ» قوسىمشاسى ارقىلى نەسيەدەن ەركىڭىزبەن باس تارتۋ سىندى قاۋىپسىزدىك شارالارىن ساقتاۋعا شاقىرادى.

كاۋسار بايعاليەۆا

پىكىرلەر