نازارباەۆ كادرلىق اۋىس-ءتۇيىس جاسادى

 قازاقستاننىڭ تۇڭعىش پرەزيدەنتى نۇرسۇلتان نازارباەۆ "Nur Otan" پارتياسىندا كادرلىق اۋىس-ءتۇيىس جاسادى، دەپ حابارلايدى Sputnik قازاقستان. بۇل تۋرالى پارتيا توراعاسىنىڭ ءبىرىنشى ورىنباسارى باۋىرجان بايبەك تۆيتتەردە جازدى. "Nur Otan"پارتياسىنىڭ ليدەرى ن.ءا. نازارباەۆتىڭ قاۋلىسىمەن ومارحان وكسىكباەۆ پارتيا جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ توراعاسى، پاۆەل كازانتسەۆ پارتيالىق باقىلاۋ كوميتەتىنىڭ توراعاسى بولىپ تاعايىندالدى", - دەپ جازدى بايبەك. ول پارتيا فراكتسياسى دەپۋتاتتارىنىڭ كاسىبي بىلىكتىلىگى مەن تاباندىلىعى، مەملەكەتتىك جانە پارتيا جۇمىسىنداعى مول تاجىريبەسى پارتيالىق ورگانداردى كۇشەيتۋگە ىقپال ەتەتىنىنە سەنىم ءبىلدىردى.

وكسىكباەۆ پەن كازانتسەۆ تۋرالى نە بىلەمىز؟

ومارحان وكسىكباەۆ 1954 جىلى 22 جەلتوقساندا الماتى وبلىسى بالقاش اۋدانى كوكتال اۋىلىندا تۋعان. ءماجىلىس دەپۋتاتى، قارجى جانە بيۋدجەت كوميتەتىنىڭ مۇشەسى. ءار جىلدارى قاۋىپسىزدىك كەڭەسى حاتشىسىنىڭ ورىنباسارى، پرەزيدەنت اكىمشىلىگىنىڭ باس باقىلاۋ ينسپەكتسياسىنىڭ باسشىسى، قاۋىپسىزدىك كەڭەسىنىڭ حاتشىسى، رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى قىزمەتىن اتقاردى. پاۆەل كازانتسەۆ 1960 جىلى 22 ناۋرىزدا تومسك قالاسىندا تۋعان. ءماجىلىس دەپۋتاتى، ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى. توقسانىنشى جىلدارى اقمولا قالاسى اكىمىنىڭ ورىنباسارى بولعان. Nur Otan پارتياسىنىڭ ەلورداداعى فيليالى توراعاسىنىڭ ورىنباسارى، Nur Otan پارتياسى ورتالىق اپپاراتى ساياسي جۇمىستار، ۇيىمداستىرۋ-ساياسي جۇمىستار دەپارتامەنتتەرىنىڭ ديرەكتورى قىزمەتىن اتقاردى.