قازاقستان قورعانىس مينيسترلىگىندە قارۋلى كۇشتەردى قارجىلاندىرۋ تۋرالى ايتىلىپ، ولاردىڭ قازىرگى كەزدەگى جاۋىنگەرلىك قابىلەتتىلىگىنە باعا بەرىلدى، دەپ حابارلايدى «ادىرنا» ۇلتتىق پورتالى.
«رەسپۋبليكالىق بيۋدجەتتىڭ مۇمكىندىكتەرىن ەسكەرە وتىرىپ، قورعانىس مينيسترلىگىنىڭ 2025 جىلعا ارنالعان شىعىستارى رەسپۋبليكالىق بيۋدجەت كوميسسياسى ءجىو-ءنىڭ 0,68 پايىزى مولشەرىن قۇرادى. قوسىمشا قاجەتتىلىك بار. بۇل ماسەلە 2025 جىلعى بيۋدجەتتى ناقتىلاۋ كەزىندە قارالاتىن بولادى»، - دەپ حابارلادى قورعانىس مينيسترلىگى.
سونداي-اق، قازىرگى ۋاقىتتا ەلدىڭ جاۋىنگەرلىك قابىلەتتىلىگىنە باعا بەرىلدى.
«قازاقستان رەسپۋبليكاسىنىڭ اسكەري دوكتريناسىنا سايكەس رەسپۋبليكانىڭ اسكەري قاۋىپسىزدىگىن قامتاماسىز ەتۋ قورعانىس سيپاتىندا بولادى جانە قازاقستاننىڭ ۇلتتىق مۇددەلەردى قورعاۋ ءۇشىن ديپلوماتيالىق، ساياسي، قۇقىقتىق، ەكونوميكالىق جانە باسقا دا اسكەري ەمەس قۇرالداردى باسىمدىقپەن پايدالانۋعا بەيىلدىلىگىن كورسەتەدى. قازاقستان رەسپۋبليكاسى مەملەكەتتەردىڭ ەشقايسىسىن جاۋ رەتىندە قاراستىرمايدى»، - دەدى.
اسكەردىڭ جاۋىنگەرلىك تيىمدىلىگىن ارتتىرۋ ماقساتىندا وقىتۋ جۇيەسى بەلسەندى تۇردە جەتىلدىرىلىپ، اسكەري كادرلاردى دايارلاۋدىڭ زاماناۋي ادىستەرى مەن تەحنولوگيالارى ەنگىزىلۋدە. قارۋلى كۇشتەرىمىزگە ءارتۇرلى جاعدايلاردا ءتيىمدى ارەكەت ەتۋگە جانە وزگەرمەلى ورتاعا بەيىمدەلۋگە مۇمكىندىك بەرەتىن جاۋىنگەرلىك داعدىلار مەن تاكتيكالىق دايىندىقتى ارتتىرۋعا ەرەكشە كوڭىل بولىنەدى.
«حالىقارالىق اسكەري ىنتىماقتاستىق جانە كوپۇلتتى وقۋ-جاتتىعۋلارعا قاتىسۋ بەلسەندى دامىپ كەلەدى، بۇل تاجىريبە الماسۋعا جانە سەرىكتەستەرمەن ءوزارا ءىس-قيمىلدى جاقسارتۋعا ىقپال ەتەدى. بۇل باستامالار ءوز قارۋلى كۇشتەرىنە دەگەن سەنىمدىلىكتى، ارميامىزدىڭ ۇلتتىق مۇددەلەردى ءتيىمدى قورعاۋ جانە حالقىمىزدىڭ قاۋىپسىزدىگىن قامتاماسىز ەتۋ قابىلەتىن نىعايتۋعا باعىتتالعان»، - دەپ قوستى مينيسترلىك.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز