اليمەنت بويىنشا قاتە ەسەپتەلگەن قارىز تۇزەتىلدى: سوت الۋشىنىڭ قۇقىعىن قورعادى

ۇلىتاۋ وبلىسىنىڭ مامانداندىرىلعان اۋدانارالىق اكىمشىلىك سوتى اليمەنتتەر بويىنشا بەرەشەكتى انىقتاۋ تۋرالى ءىستى قاراپ، تالاپكەر ا-نىڭ پايداسىنا شەشىم شىعاردى.  تالاپكەر 2023 جىلدىڭ 10 جەلتوقسانىندا اليمەنت بويىنشا قارىزدى انىقتاۋ تۋرالى جەكە سوت ورىنداۋشىسى د-نىڭ قاۋلىسىن زاڭسىز دەپ تانۋ جانە ونى جويۋ تۋرالى شاعىممەن سوتقا جۇگىنگەن.  سونىمەن قاتار، ا. 2016 جانە 2017 جىلدارى مەملەكەتتىك سوت ورىنداۋشىسى جيلكيباەۆا ا. شىعارعان قاۋلىلارمەن انىقتالعان جالپى سوماسى 2 021 443 تەڭگەنى قارىزعا قوسۋ مىندەتىن تالاپ ەتتى. سوتتىڭ انىقتاۋىنشا، 2009 جىلدان 2019 جىلعا دەيىن بورىشكەردەن اليمەنت ءوندىرىپ الۋ بويىنشا شارالار قابىلدانعانىنا قاراماستان، قاتە ەسەپتەۋلەر ناتيجەسىندە اليمەنت بويىنشا بەرەشەك دۇرىس انىقتالماعان.  سوت تالقىلاۋىندا 2023 جىلعى 10 جەلتوقسانداعى قاۋلى شىعارىلعاننان كەيىن اتقارۋشىلىق ءوندىرىس تاراپتارىنا جىبەرىلمەگەنى جانە ءتيىستى تۇردە حابارلانباعانى بەلگىلى بولدى. ناتيجەسىندە، سوت ورىنداۋشىسى د-نىڭ ارەكەتتەرى زاڭسىز دەپ تانىلىپ، وعان قارىزدى دۇرىس ەسەپتەۋمەن جاڭا قاۋلى شىعارۋ مىندەتى جۇكتەلدى. ءىس اپەللياتسيالىق نەمەسە كاسساتسيالىق تارتىپتە قارالماعان.