تۇركىستاندا ەرەكشە ونەرلى جاستاردىڭ ونەر تۋىندىلارىنىڭ كورمەسى ءوتتى. شارا وبلىستىق «جاستار رەسۋرستىق ورتالىعى» مەكەمەسى مەن «شاڭىراق» جاستار قوعامدىق بىرلەستىگىنىڭ ۇيىمداستىرۋىمەن قولعا الىنعان. بايقاۋدىڭ ماقساتى - ەرەكشە تالانتتاردى تانىپ، ولاردىڭ شىعارماشىلىق ىزدەنىسىن ۇلعايتۋ جانە شىعارماشىلىققا باۋلۋ.
جيىنعا تۇركىستان وبلىسى قوعامدىق دامۋ باسقارماسى باسشىسىنىڭ ورىنباسارى نۇرسۇلتان سەيتجانوۆ، قازاقستان سۋرەتشىلەر وداعىنىڭ مۇشەسى جۇپار بەيسەنوۆا، قازاقستان قولونەرشىلەر وداعىنىڭ مۇشەسى مەرەكە ايدارشا، قازاقستان ديزاينەرلەر وداعىنىڭ مۇشەسى مەرۋەرت سەيسەنبەكوۆا، قازاقستان سۋرەتشىلەر وداعىنىڭ مۇشەسى مۇرات شاحانباەۆ، ەۋرازيا ديزاينەرلەر وداعىنىڭ مۇشەسى الميرا ناقباەۆا مەن وبلىستىق «جاستار رەسۋرستىق ورتالىعى» مەكەمەسىنىڭ باسشىسى ەرنار بەكتاەۆ جانە باق وكىلدەرى قاتىستى.
«بايقاۋعا قاتىسۋشى جانداردىڭ مۇمكىندىگى شەكتەۋلى بولسا دا، جۇرەكتەرىندە تۇنعان سەزىم مەن ونەرگە دەگەن سۇيىسپەنشىلىك ءبىزدى تەبىرەنتىپ، شارانىڭ كوركىن اشتى. بايقاۋ بولعاننان كەيىن جەڭىلىس تە، جەڭىس تە بولادى. بار كۇش-جىگەرلەرىڭىزدى جيىپ، وسى دوداعا قاتىسقاندارىڭىزدىڭ ءوزى ۇلكەن جەتىستىك. بارشا ونەرپازدارعا ۇلكەن العىسىمىزدى بىلدىرەمىز، - دەدى ەرنار بەكتاەۆ.
اتالعان شارا سوڭىندا مۇمكىندىگى شەكسىز جانداردىڭ تۋىندىلارى اۋكتسيونعا قويىلدى. وندا تاستارمەن بەزەندىرىلگەن اشەكەيلەر، ۇكىلى ساۋكەلە، ءساندى بىلەزىكتەر، ءۇي ماكەتى، قورجىن، توقىما بۇيىمدارى، گيپستەن جاسالعان ءمۇسىن، شاعىن ءامياندار، ارقان جىپتەن ورىلگەن سەبەت جانە تاعى دا باسقا زاتتار ساتىلدى.
