قر كونستيتۋتسياسى كۇنىنە وراي جامبىل وبلىسى اكىمى اسقار مىرزاحمەتوۆ جامبىل اۋدانىنىڭ ورتالىعى اسا اۋىلىندا 18 وتباسىنا پاتەر كىلتىن تاپسىردى، دەپ حابارلايدى adyrna.kz ۇلتتىق پورتالى وبلىس اكىمىنىڭ ءباسپاسوز قىزمەتىنە سىلتەمە جاساپ.
ايماق باسشىسى اسقار يسابەكۇلى اسا اۋىلىنداعى كوپبالالى جانە تولىق ەمەس وتباسىلارعا ارەندالىق نەگىزدە پاتەر كىلتتەرىن سالتاناتتى تۇردە تابىس ەتتى. جوبا قۇنى – 146,9 ملن. تەڭگە. بولاتىن «بايتەرەك» ىقشام اۋدانىنداعى جاڭا پاتەرلەردى «بينوم» جشس-ءى جۇرگىزگەن. اتالعان قارجى اۋداندىق بيۋدجەتتەن قاراستىرىلعانىن ايتىپ وتكەن ءجون
سۋ جاڭا پاتەرگە قول جەتكىزگەن 18 وتباسىنىڭ ءبىرى جاينار سپاتوۆا. ول ءوزىنىڭ وتباسىنىڭ كوپ جىلدان بەرى پاتەرگە قول جەتكىزە الماي جۇرگەنىن ايتادى.
– ەلىمىزدەگى ەڭ وزەكتى ماسەلەنىڭ ءبىرى تۇرعىن-ءۇي ماسەلەسى ەكەنى كوپشىلىككە بەلگىلى. سوندىقتان دا مەن تاپ بۇگىن بۇل ماسەلە شەشىلىپ، پاتەر كىلتىن الامىن دەپ ويلامادىم. ايتسە دە بۇگىن اللانىڭ قالاۋىمەن كوپتەن كۇتكەن پاتەرىمە يە بولىپ وتىرمىن. سول سەبەپتى وبلىس اكىمى اسقار مىرزاحمەتوۆكە العىسىمدى بىلدىرەمىن، – دەيدى ول.
ايتا كەتەيىك، وبلىس بويىنشا كوپبالالى وتباسىلارىن تۇرعىن ۇيمەن قامتاماسىز ەتۋ ماسەلەسىن شەشۋ ءۇشىن اعىمداعى جىلدىڭ ءبىرىنشى جارتى جىلدىعىندا 120 كوپبالالى وتباسىعا پاتەر كىلتى تابىستالدى. ونىڭ 93-ءى ارەندالىق ءۇي، 27-ءى دەمەۋشىلەر ەسەبىنەن. جىل سوڭىنا دەيىن 493 كوپبالالى وتباسىن تۇرعىن ۇيمەن قامتاماسىز ەتۋ جوسپارلانعان بولاتىن. سونداي-اق، تۇرعىن ءۇي كەزەگى كەلگەنگە دەيىن كوپبالالى وتباسىلاردىڭ تۇرعىن ءۇي ماسەلەسىن ۋاقىتشا شەشۋ ءۇشىن 612 پاتەرلى 12 جاتاقحانا قۇرىلىسىنا ءتيىستى قاراجات قاراستىرىلىپ، جىل سوڭىنا دەيىن پايدالانۋعا بەرىلەدى دەپ كۇتىلۋدە.
سونىمەن قاتار، «نۇرلى جەر» باعدارلاماسى اياسىندا اعىمداعى جىلى جالپى 17,6 ملرد. تەڭگەگە بارلىعى 30 كوپقاباتتى (2 118 پاتەرلى) تۇرعىن ءۇيدىڭ قۇرىلىسى جۇرگىزىلىپ، جىل سوڭىنا دەيىن 28 كوپقاباتتى (1988 پاتەرلى) تۇرعىن ۇيلەردى پايدالانۋعا بەرۋ جوسپارلانۋدا.
جالپى، بۇعان دەيىن حابارلاعانىمىزداي كونستيتۋتسيا جانە ءبىلىم كۇنى مەرەكەلەرىنە وراي وبلىس بويىنشا 800-گە جۋىق پاتەردى قۇرايتىن 11 كوپقاباتتى تۇرعىن ءۇي پايدالانۋعا بەرىلدى. ونىڭ 9-ى تاراز قالاسىندا، 2-ءى جامبىل جانە تالاس اۋداندارىنا تيەسىلى.
ەلباسى نۇرسۇلتان نازارباەۆتىڭ بەس الەۋمەتتىك باستاماسىنىڭ ءبىرىنشى باستاماسىندا حالىقتى تۇرعىن-ۇيمەن قامتۋ ماسەلەسىنە ەرەكشە كوڭىل بولىنگەن. بۇل الەۋمەتتىك باستاما ەلىمىزدە تۇرعىن-ءۇي قۇرىلىسىن دامىتۋعا زور سەرپىن بەرىپ وتىر.
«ادىرنا»
ۇلتتىق پورتالى
