اقش-تىڭ پرەزيدەنتى دونالد ترامپ يزرايل پرەمەر-ءمينيسترى بينيامين نەتانياحۋمەن بىرگە ۆاشينگتوندا وتكەن ءباسپاسوز ءماسليحاتىندا اقش-تىڭ گازا سەكتورىنا ورنالاسۋعا جانە ول جەردىڭ ەكونوميكاسىن دامىتۋعا دايىن ەكەنىن ايتتى، دەپ حابارلايدى "ادىرنا" ۇلتتىق پورتالى BBC News-قا سىلتەمە جاساپ.
«ءبىز گازا سەكتورىن باقىلاۋعا الامىز جانە وندا قاۋىپتى جارىلماعان بومبالار مەن باسقا دا قارۋلاردى زالالسىزداندىرىپ، جەردى تەگىستەيمىز، قيراندىلاردان تازارتامىز. سونىمەن قاتار، وڭىردە ەكونوميكالىق دامۋ مەن شەكسىز جۇمىس ورىندارىن جانە تۇرعىن ۇيلەر سالۋدى قامتاماسىز ەتەمىز»، – دەدى ترامپ.
گازا سەكتورىن ول «جويىلۋعا ءتيىس ايماق» دەپ اتادى.
نەتانياحۋمەن كەزدەسۋ الدىندا ترامپ گازا تۇرعىندارىن تاياۋ شىعىستاعى باسقا ايماقتارعا كوشىرۋ تۋرالى ۇسىنىس جاسادى. ول بۇل پروتسەستى قارجىلاندىرۋدى وڭىردەگى مەملەكەتتەر ءوز موينىنا الۋى مۇمكىن ەكەنىن ايتتى. ونىڭ پىكىرىنشە، پالەستينالىقتاردى ەگيپەت نەمەسە يوردانيا اۋماعىنا كوشىرۋگە بولادى.
«پالەستينالىقتار گازادا باسقا امالدارى بولماعاندىقتان تۇرىپ جاتىر. قازىر بۇل تەك ۇيىندىلەردەن تۇراتىن ايماق»، – دەدى ترامپ.
ول اقش-تىڭ گازا سەكتورىن «ۇزاق مەرزىمگە يەلەنۋىن» كوزدەپ وتىرعانىن جانە بۇل ايماققا تۇراقتىلىق اكەلۋى مۇمكىن ەكەنىن ايتتى.
نەتانياحۋ ترامپتىڭ بۇل يدەياسىن نازار اۋدارۋعا تۇرارلىق دەپ باعالادى.
«ءيزرايلدىڭ باستى ماقساتى – گازا ايماعىنىڭ ءبىزدىڭ ەل ءۇشىن قاۋىپ توندىرمەۋىن قامتاماسىز ەتۋ. ال ترامپ گازا ءۇشىن باسقا بولاشاقتى كورىپ وتىر»، – دەدى نەتانياحۋ.
ول اقش-تىڭ قولداۋىنا العىس ايتىپ، ترامپتى «اق ۇيدەگى ءيزرايلدىڭ ەڭ ۇلكەن دوسى» دەپ اتادى.
