قازاقستاننىڭ ەنەرگەتيكا ءمينيسترى الماسادام ساتقاليەۆ ەلىمىزدەگى العاشقى اتوم ەلەكتر ستانتسياسىنىڭ (اەس) قۇرىلىسى قاشان باستالاتىنى تۋرالى سۇراققا جاۋاپ بەردى، دەپ حابارلايدى "ادىرنا" ۇلتتىق پورتالى.
ءمينيستردىڭ ايتۋىنشا، اەس جوبالاۋ جۇمىستارى حالىقارالىق تاجىريبە بويىنشا 2-3 جىلعا سوزىلادى.
"جوبالاۋ پروتسەسى ءۇش جىلعا دەيىن ۋاقىت الادى. ءۇش جىلدان كەيىن "بەتون قۇيۋ" كەزەڭى باستالادى، ياعني ناقتى قۇرىلىس جۇمىستارى قولعا الىنادى. جالپى قۇرىلىس جۇمىستارىنا ەكى جىل ىشىندە كىرىسۋىمىز مۇمكىن. الايدا نەگىزگى نىساننىڭ قۇرىلىسى تەحنيكالىق-ەكونوميكالىق نەگىزدەمە تولىق اياقتالىپ، جوبالىق قۇجاتتار ازىرلەنىپ، مەملەكەتتىك ورگانداردان بارلىق قاجەتتى رۇقساتتار الىنعاننان كەيىن عانا باستالادى", – دەدى مينيستر.
بۇعان دەيىن اەس الماتى وبلىسى، جامبىل اۋدانىنداعى ۇلكەن اۋىلىندا سالىناتىنى تۋرالى رەسمي حابارلانعان بولاتىن. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
