الماتى وبلىسىندا ەسىرتكى قۇرامداس وسىمدىكتەردى زاڭسىز وسىرۋمەن اينالىسقان قىلمىستىق توپ ۇستالدى، دەپ حابارلايدى "ادىرنا" ۇلتتىق پورتالى Polisia.kz-كە سىلتەمە جاساپ.
كۇدىكتىلەر وزدەرىنە تيەسىلى 10 سوتىق جەردە ءبىر تونناعا جۋىق قاراسورا وسىرگەن.
ارنايى وپەراتسيا بارىسىندا ءۇش ادام ۇستالدى. ولاردىڭ جالعا العان ءۇيىنىڭ اۋماعىنان قاراسورا وسىرۋگە ارنالعان 10 سوتىق جىلىجاي تابىلدى.
"زاڭسىز اينالىمعا تۇسپەي، تاركىلەنگەن ەسىرتكىنىڭ جالپى سالماعى 900 كەلىنى قۇرادى. كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى", – دەپ مالىمدەدى قر ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى قۋاندىق ءالجانوۆ.
ءىىم مالىمەتىنشە، 2025 جىلدىڭ باسىنان بەرى زاڭسىز اينالىمنان ەكى توننادان استام ەسىرتكى تاركىلەنگەن. ونىڭ ىشىندە 120 كگ سينتەتيكالىق ەسىرتكى، 600 گرامم كوكاين جانە 140 كگ-نان استام گاشيش بار.
