ارمەنيا ەۋروپا وداعىنا قوسىلۋ ارەكەتىن باستادى

26 ناۋرىزدا ارمەنيا ۇلتتىق اسسامبلەياسى «ارمەنيا رەسپۋبليكاسىنىڭ ەۋروپا وداعىنا مۇشەلىك پروتسەسىنىڭ باستالۋى تۋرالى» زاڭ جوباسىن ەكىنشى وقىلىمدا ماقۇلدادى، دەپ حابارلايدى "ادىرنا" ۇلتتىق پورتالى armenpress- كە سىلتەمە جاساپ. زاڭ جوباسىنا 64 دەپۋتات قولداپ، 7 دەپۋتات قارسى داۋىس بەردى. قۇجاتتا ارمەنيانىڭ دەموكراتيالىق ينستيتۋتتاردى دامىتۋعا، قوعام ءال-اۋقاتىن جاقسارتۋعا، ەلدىڭ قاۋىپسىزدىگىن، تۇراقتىلىعىن جانە زاڭ ۇستەمدىگىن نىعايتۋعا ۇمتىلاتىنى جانە ەو-عا قوسىلۋ پروتسەسىن رەسمي تۇردە باستاعانى جاريالانعان. زاڭ جوباسىن ۇلتتىق جينالىسقا «ەۋروداۋىس» ازاماتتىق باستاماسى ۇسىندى. باستاما 50 000 قولدىڭ ورنىنا 60 000 قول جيناعان. 2025 جىلدىڭ 9 قاڭتارىندا قۇجات ارمەنيا ۇكىمەتىندە ماقۇلدانىپ، كەيىن ۇلتتىق جينالىسقا جىبەرىلدى. 12 اقپاندا ول ءبىرىنشى وقىلىمدا، 26 ناۋرىزدا ەكىنشى وقىلىمدا قابىلداندى. وپپوزيتسيالىق «اياستان» فراكتسياسى داۋىس بەرۋگە قاتىسپاسا، «ار-نامىسىم بار» فراكتسياسى زاڭ جوباسىنا قارسى داۋىس بەردى. وسىلايشا، ارمەنيانىڭ ەۋروپا وداعىنا مۇشەلىككە ءوتۋ پروتسەسى رەسمي تۇردە باستالدى.