قۇدايبەرگەن جۇبانوۆ اتىنداعى اۋىلدىق وكرۋگتىڭ اكىمى ءلاززات بەردىباەۆانىڭ قىزعالداقپەن تۇسكەن سەلفيى حالىق اراسىندا داۋ تۋدىردى، دەپ حابارلايدى "ادىرنا" ۇلتتىق پورتالى.
شەنەۋنىك گۇلمەن تۇسكەن سۋرەتىن الەۋمەتتىك جەلىگە جۇكتەگەن. بىراق بۇل ارەكەت كوپ ۇزاماي قوعامدىق نارازىلىق تۋدىرعان.
جەلى قولدانۋشىلارى مەملەكەتتىك قورعاۋداعى گۇلدەردى نە سەبەپتى اكىم جۇلدى دەگەن سۇراق قويىپ، تۇسىنىكتەمە تالاپ ەتكەن. ال اكىمنىڭ ايتۋىنشا، تيۋلپانداردى قىزىنا دەمالىس كەزىندە بىرەۋ سىيلاعان، ءارى ول جەردە گۇلدەردى جۇلماۋ تۋرالى ەشقانداي ەسكەرتۋ بەلگىسى بولماعان.
"كۇنى كەشە تۇسكەن سۋرەت. دەمالىستا بالالارمەن دالاعا سەرۋەنگە شىقتىق. قاندىاعاشقا قاراي جۇرىننىڭ قاسىندا تراسسانىڭ بويىندا بولدىق. بالالارىم جۇلىپ اكەپ بەردى. ەستەلىككە سۋرەتكە ءتۇستىم. WhatsApp ستاتۋسىنا سالدىم. گۇلدى تانىمايدى ەكەنمىن. مەن ونى جۇلۋعا بولمايتىنىن بىلگەن جوقپىن. باسقا جاقتا قىزىل كىتاپقا ەنگەن گۇلدى جۇلۋعا بولمايتىنىن بىلەمىن. ەلدىڭ ءبارى جۇلىپ جاتتى. ويىمدا ەشتەڭە جوق. ايتپەسە، مەن جۇلدىم، مىنە، سۋرەتكە ءتۇستىم دەپ نەم بار", – دەدى ءلاززات بەردىباەۆا.
پوليتسيانىڭ حابارلاۋىنشا، اكىمنىڭ ءوزى گۇلدەردى جۇلعانى تۋرالى تىكەلەي دالەل جوق.
"اقپارات تەكسەرىلەدى جانە قۇقىقتىق باعا بەرىلەدى. تابيعاتتى قورعاۋ ينسپەكتسيامەن سۋرەتتەگى گۇلدىڭ قىزىل كىتاپقا ەنگەنى نەمەسە باسقا ەكەنى انىقتالادى", – دەدى وبلىستىق پوليتسيا دەپارتامەنتى.
