Jūlynǧan qyzǧaldaqpen suretke tüsken äkımnıŋ basy dauǧa qaldy

Qūdaibergen Jūbanov atyndaǧy auyldyq okrugtıŋ äkımı Läzzat Berdıbaevanyŋ qyzǧaldaqpen tüsken selfiı halyq arasynda dau tudyrdy, dep habarlaidy "Adyrna" ūlttyq portaly.  Şeneunık gülmen tüsken suretın äleumettık jelıge jüktegen. Bıraq būl äreket köp ūzamai qoǧamdyq narazylyq tudyrǧan. Jelı qoldanuşylary memlekettık qorǧaudaǧy gülderdı ne sebeptı äkım jūldy degen sūraq qoiyp, tüsınıkteme talap etken. Al äkımnıŋ aituynşa, tiulpandardy qyzyna demalys kezınde bıreu syilaǧan, ärı ol jerde gülderdı jūlmau turaly eşqandai eskertu belgısı bolmaǧan. "Künı keşe tüsken suret. Demalysta balalarmen dalaǧa seruenge şyqtyq. Qandyaǧaşqa qarai Jūrynnyŋ qasynda trassanyŋ boiynda boldyq. Balalarym jūlyp äkep berdı. Estelıkke suretke tüstım. WhatsApp statusyna saldym. Güldı tanymaidy ekenmın. Men ony jūluǧa bolmaitynyn bılgen joqpyn. Basqa jaqta Qyzyl kıtapqa engen güldı jūluǧa bolmaitynyn bılemın. Eldıŋ bärı jūlyp jatty. Oiymda eşteŋe joq. Äitpese, men jūldym, mıne, suretke tüstım dep nem bar",  – dedı Läzzat Berdıbaeva. Polisiianyŋ habarlauynşa, äkımnıŋ özı gülderdı jūlǧany turaly tıkelei dälel joq. "Aqparat tekserıledı jäne qūqyqtyq baǧa berıledı. Tabiǧatty qorǧau inspeksiiamen surettegı güldıŋ Qyzyl kıtapqa engenı nemese basqa ekenı anyqtalady", – dedı oblystyq polisiia departamentı.