ەلورداداعى تاۋەلسىزدىك سارايىندا وتكەن قازاقستان حالقى اسسامبلەياسىنىڭ ءحححىV سەسسياسىندا مەملەكەت باسشىسى قاسىم-جومارت توقاەۆ بىرلىك پەن تاتۋلىقتىڭ ەل دامۋىنداعى باستى قۇندىلىق ەكەندىگىن ەرەكشە اتاپ ءوتتى.
«ەلدىڭ بىرلىگى مەن تاتۋلىعى – ەڭ نەگىزگى قۇندىلىقتارىمىزدىڭ قاتارىندا تۇر. بۇل – مەملەكەتتىك ساياساتتىڭ باستى تۇعىرى. بولاشاقتا دا سولاي بولماق. وسى ستراتەگيانىڭ ارقاسىندا ءتۇرلى ەتنوس وكىلدەرى ءبىر شاڭىراقتىڭ استىندا ءبىر ءۇيدىڭ بالاسىنداي تاتۋ-ءتاتتى ءومىر ءسۇرىپ جاتىر. بۇل – ماعىناسى تەرەڭ، ناقتى جەتىستىك»، – دەدى قاسىم-جومارت توقاەۆ.
پرەزيدەنت وتانشىلدىق، ازاماتشىلدىق، ءوزارا سەنىم مەن جاۋاپكەرشىلىك – قازاقستان حالقىنىڭ جالپىۇلتتىق بىرەگەي بولمىسىن ايقىندايتىن نەگىزگى قۇندىلىقتار ەكەنىن ايتتى. ونىڭ پىكىرىنشە، ەلىمىزدە تۇراتىن ءار ەتنوس وكىلى ءوزىنىڭ ءتىلى مەن مادەنيەتىن ەركىن دامىتىپ، سالت-ءداستۇرىن ساقتاۋعا تولىق مۇمكىندىككە يە.
«ءبىز بىرەۋگە ەلىكتەپ، جان-جاعىمىزعا جالتاقتاعان ەمەسپىز. ەڭ باستىسى، ۇلتارالىق قاتىناستار سالاسىندا وزىق ءادىس-تاسىلدەردى قولدانىپ، تەك العا قاراي جۇردىك، بولاشاقتا دا سولاي بولۋ كەرەك»، – دەدى قاسىم-جومارت توقاەۆ.
جيىندا پرەزيدەنت ەلىمىزدەگى ەتنوسارالىق كەلىسىمدى نىعايتۋ باعىتىندا جۇرگىزىلىپ جاتقان جۇمىستارعا جوعارى باعا بەردى. ونىڭ سوزىنشە، سوڭعى ۋاقىتتا قازاقستان حالقى اسسامبلەياسى قىزمەتىندەگى ساراپشىلىق قۇرام جاڭا دەڭگەيگە كوتەرىلدى. عىلىمي-ساراپشىلار كەڭەسى مەن ەلىمىزدىڭ جوعارى وقۋ ورىندارىندا اشىلعان 42 اسسامبلەيا كافەدراسى ۇلت قۇرىلىمى مەن ەتنوسارالىق قارىم-قاتىناستار ۇدەرىسىن جۇيەلى تۇردە زەرتتەپ جۇرگەن 360-تان استام ساراپشىنى بىرىكتىرىپ وتىر.
«قحا مۇشەلەرى كۇن سايىن كوزگە كورىنبەيتىن، بىردەن ناتيجە بەرمەيتىن، الايدا ۇزاق مەرزىمدى، ستراتەگيالىق تۇرعىدان ءتيىمدى، اۋقىمدى جۇمىس جۇرگىزەدى. وتكەن جىلدىڭ وزىندە اسسامبلەيا بارلىق وڭىردە 15 مىڭنان استام ءىس-شارا ۇيىمداستىردى. وعان 1 ميلليونعا جۋىق ادام قاتىستى. بىلتىر كوكتەمگى سۋ تاسقىنى كەزىندە ازاماتتارىمىز زارداپ شەككەن جاندارعا كومەك قولىن سوزىپ، ىرىستى ىنتىماق پەن بىرلىكتىڭ تاماشا ۇلگىسىن كورسەتتى. اسسامبلەيانىڭ «جۇرەكتەن جۇرەككە» جوباسى اياسىندا 12 مىڭنان استام ەرىكتى ورتاق ىسكە جۇمىلا كىرىستى. ولار گۋمانيتارلىق كومەك پەن جىلۋ جينادى. قيراعان ۇيلەردى قالپىنا كەلتىرۋگە اتسالىستى," – دەدى قاسىم-جومارت توقاەۆ.
مەملەكەت باسشىسى ايتقان وسىنداي ءىرى قۇرىلىمنىڭ قۇرامىندا جۇمىس ىستەپ جاتقان بىرلەستىكتەردىڭ ءبىرى – قازاقستان ۇيعىرلارىنىڭ رەسپۋبليكالىق ەتنومادەني ورتالىعى. بۇل ورتالىق تا جىل سايىن قوعامدىق تۇراقتىلىقتى ساقتاۋعا، مادەني مۇرانى دامىتۋعا جانە الەۋمەتتىك قولداۋعا ەلەۋلى ۇلەس قوسىپ كەلەدى. وسى ورايدا ءبىز قازاقستان ۇيعىرلارىنىڭ رەسپۋبليكالىق ەتنومادەني ورتالىعىنىڭ توراعاسى، قازاقستان حالقى اسسامبلەياسى كەڭەسىنىڭ مۇشەسى دولكۋنتاي اليەۆ مىرزامەن سۇحباتتاسقان ەدىك.
ۇلت بىرلىگى – ەل تۇراقتىلىعىنىڭ كەپىلى
–دولكۋنتاي مىرزا، دولكۋنتاي مىرزا، قازاقستان حالقى اسسامبلەياسىنىڭ 30 جىلدىق مەرەيتويى ءسىز ءۇشىن قانداي مانگە يە؟
–قازاقستان حالقى اسسامبلەياسىنىڭ 30 جىلدىق مەرەيتويى – بۇل تەك ءبىر ۇيىمنىڭ عانا ەمەس، تۇتاس ەلدىڭ بىرلىك پەن تاتۋلىق جولىنداعى تاريحي بەلەسى. بۇل — تاۋەلسىز قازاقستاننىڭ قوعامدىق كەلىسىمدى ساقتاپ، ەتنوسارالىق تاتۋلىقتى نىعايتۋ جولىنداعى بىرەگەي ۇلگىسىنىڭ ناتيجەسى. مەن ءۇشىن بۇل مەرەيتوي – ەلىمىزدەگى ءاربىر ازاماتتىڭ بەيبىت ومىرگە، ءوز مادەنيەتى مەن ءتىلىن ەركىن دامىتۋعا مۇمكىندىك العانىنىڭ ايعاعى. اسسامبلەيا – ءتۇرلى ەتنوستاردىڭ اراسىنداعى التىن كوپىر. ونىڭ ارقاسىندا ءبىز بۇگىنگى كۇنگە دەيىن دوستىق پەن تۇسىنىستىك جاعدايىندا ءومىر ءسۇرىپ كەلەمىز. ۇيعىر ەتنومادەني ورتالىعى ءۇشىن دە بۇل ۇلكەن جاۋاپكەرشىلىك پەن ماقتانىش. ءبىز وسى جىلدار ىشىندە ەلىمىزدەگى بىرلىك پەن تۇراقتىلىقتى ساقتاۋ ىسىنە ءوز ۇلەسىمىزدى قوسىپ كەلەمىز. اسسامبلەيا بىزگە سەنىم ارتتى، ال ءبىز سول سەنىمدى اقتاۋعا تىرىسامىز. سوندىقتان بۇل 30 جىل – مەن ءۇشىن ەلمەن بىرگە ءوسىپ، ەلمەن بىرگە كەمەلدەنگەن ۇلى جولدىڭ سيمۆولى.
ازاماتتىق جاۋاپكەرشىلىك – ەلدىك مۇرات
–قازاقستان ۇيعىرلارىنىڭ رەسپۋبليكالىق ەتنومادەني ورتالىعى قىزمەتىنىڭ نەگىزگى باعىتتارى مەن ەل يگىلىگىنە قوسقان ۇلەسى جونىندە كەڭىرەك توقتالساڭىز؟
– ءبىر عانا مىسال، 2024 جىلدىڭ باسىنان بەرى وڭىرلەرگە 64 رەت ءىسساپار جاساپ، 22 ءىرى فورۋم وتكىزدىك. بۇل شارالار تەك مادەني كەزدەسۋلەرمەن شەكتەلمەيدى – ءبىز مەكتەپتەردە جاستارمەن كەزدەسىپ، قوعامدىق پىكىر كوشباسشىلارىن تاربيەلەۋگە، ۇلتتىق قۇندىلىقتاردى دارىپتەۋگە ەرەكشە كوڭىل بولەمىز. سونىمەن قاتار قايىرىمدىلىق شارالارىنا، الەۋمەتتىك جوبالارعا، ءبىلىم بەرۋ مەن سپورت سالاسىنا دا بەلسەندى تۇردە اتسالىسىپ كەلەمىز. ماسەلەن، بىلتىر كوكتەمدە بولعان سۋ تاسقىنى كەزىندە «جۇرەكتەن جۇرەككە» اتتى جالپىۇلتتىق اكتسيا اياسىندا ورتالىق جانە ونىڭ وڭىرلىك وكىلدىكتەرى 31 ميلليون تەڭگە كولەمىندە گۋمانيتارلىق كومەك جينادى. جالپى سالماعى 25 توننا بولاتىن ازىق-تۇلىك، قاجەتتى تاۋارلار زارداپ شەككەن وڭىرلەرگە جەتكىزىلدى. بۇل – ءبىزدىڭ قوعام الدىنداعى جاۋاپكەرشىلىگىمىزدىڭ ايقىن كورىنىسى. الماتى قالاسىنداعى قحا-نىڭ «جومارت جان» قايىرىمدىلىق ورتالىعىن دا ءبىزدىڭ ورتالىق باسقاردى. مەن ءوزىم دە ورتالىق اتىنان پەتروپاۆل مەن اتىراۋعا بارىپ، جاعدايمەن تانىستىم. بۇل جۇمىس جوعارى باعالاندى، مەملەكەت باسشىسى دا ەل بىرلىگىن وسىنداي ناقتى ارەكەتتەردەن كورۋگە بولاتىنىن اتاپ ءوتتى. سونداي-اق، جاستارمەن جۇمىس – ءبىزدىڭ باستى باسىمدىقتارىمىزدىڭ ءبىرى. قازاقستان ۇيعىر جاستارى وداعى ارقىلى ءبىز ەكولوگيالىق، مادەني، ءبىلىم بەرۋ جانە قايىرىمدىلىق باعىتىنداعى ونداعان جوبانى جۇزەگە اسىردىق. بۇل – تەك ەتنوس وكىلدەرىنىڭ عانا ەمەس، تۇتاستاي قازاقستاندىق جاستاردىڭ بويىنا پاتريوتتىق رۋح پەن ازاماتتىق جاۋاپكەرشىلىك ۇيالاتۋعا باعىتتالعان جۇمىستار. سونىمەن قاتار، ۇيعىر حالقىنىڭ باي مۇراسىن تانىتۋ ماقساتىندا ءتۇرلى مادەني ءىس-شارالار، كىتاپ تۇساۋكەسەرلەرى، ۇلتتىق تاعامدار مەن كيىمدەر كورمەسى، سالت-داستۇرلەردى ناسيحاتتاۋ باعىتىنداعى جوبالار تۇراقتى تۇردە جۇزەگە اسىرىلادى. ءبىزدىڭ جۇمىسىمىزدىڭ ناتيجەسىندە ۇيعىر ەتنوسىنىڭ قوعامدىق ومىرگە بەلسەندى ارالاسۋى، مەملەكەتكە دەگەن قۇرمەتى مەن وتانسۇيگىشتىك رۋحى ارتىپ كەلەدى. بۇل – تەك ءبىزدىڭ ورتالىقتىڭ ەمەس، بۇكىل قازاقستان حالقى اسسامبلەياسىنىڭ 30 جىلدىق جۇيەلى جۇمىسىنىڭ جەمىسى دەپ بىلەمىن.
ۇلتتىق قۇندىلىق پەن حالىق بىرلىگى – فورۋمدار مازمۇنىنىڭ وزەگى
– دولكۋنتاي مىرزا، ءوز سوزىڭىزدە 2024 جىلى 22 ءىرى فورۋم ۇيىمداستىرىلعانىن اتاپ ءوتتىڭىز. وسى فورۋمداردا قانداي نەگىزگى ماسەلەلەر كوتەرىلدى، ولاردىڭ مازمۇنى مەن ماڭىزدىلىعى جونىندە ايتىپ وتسەڭىز؟
ء–يا، 2024 جىلدىڭ وزىندە قازاقستان ۇيعىرلارىنىڭ رەسپۋبليكالىق ەتنومادەني ورتالىعى 22 ءىرى فورۋم وتكىزدى. بۇل فورۋمداردىڭ ارقايسىسى ءوز مازمۇنىمەن ەرەكشەلەنىپ، ەل ىشىندەگى قوعامدىق كەلىسىمدى نىعايتۋعا، ەتنوسارالىق تاتۋلىقتى ارتتىرۋعا جانە ۇلتتىق قۇندىلىقتاردى دارىپتەۋگە باعىتتالدى. ماسەلەن، جاستارىمىزدىڭ دامۋ باعىتىن ايقىنداۋعا ارنالعان «قازاقستان جاستارى: دامۋعا باعدار» اتتى فورۋمدا ەل بولاشاعى سانالاتىن جاستاردىڭ قوعامداعى ءرولى، ءبىلىم مەن ەڭبەك نارىعىنداعى بەلسەندىلىگى كەڭىنەن تالقىلاندى. «ادال ازامات – ەل تىرەگى» اتتى ايەلدەر كەڭەسىنىڭ كونفەرەنتسياسىندا ەلىمىزدىڭ دامۋىنا ۇلەس قوسىپ وتىرعان نازىك جانداردىڭ ءرولى، ولاردىڭ وتباسىنداعى، قوعامداعى، مادەنيەت پەن تاربيە سالالارىنداعى ورنى ەرەكشە اتالىپ ءوتتى. ال الماتى وبلىسىندا وتكەن «ادىلەتتى مەملەكەت، ءبىرتۇتاس ۇلت، بەرەكەلى قوعام» اتتى فورۋم ەلىمىزدەگى جاڭا ساياسي باعىت پەن ادىلەتتى قازاقستان قۇرۋ يدەيالارىن كەڭىنەن ناسيحاتتاۋعا ارنالدى. تاعى ءبىر ماڭىزدى باسقوسۋ – «جىگىت بەشي» ينستيتۋتىنىڭ جاڭا قازاقستاندى قۇرۋداعى رولىنە ارنالعان فورۋم بولدى. ۇلتتىق مادەنيەت پەن وتباسىلىق قۇندىلىقتارعا نەگىزدەلگەن «مادەنيەت تە، ءتىل دە، پىكىر دە – بىرلىكتە، ونىڭ كىلتى – قاسيەتتى ايەلدە» اتتى ەكىنشى حالىقارالىق فورۋم كەڭ كولەمدە ءوتتى. جاركەنت قالاسىنداعى مادەنيەت فورۋمى «شابنام» كلۋبىنىڭ باستاماسىمەن ۇيىمداستىرىلىپ، وڭىردەگى ونەر مەن مادەنيەتتىڭ دامۋىنا سەرپىن بەردى.500-دەن استام دەلەگات قاتىسقان رەسپۋبليكالىق «جىگىت بەشي» قۇرامىنىڭ كەڭەيتىلگەن جينالىسى ەتنومادەني بەلسەندى ازاماتتاردى بىرىكتىرىپ، قوعامدىق ءىس-شارالاردىڭ جۇيەلى وتۋىنە ىقپال ەتتى. ءبىلىم مەن عىلىم باعىتىنداعى جۇمىستارىمىز دا ەرەكشە. ءبىلىم كەڭەسى بىلتىردان بەرى 60 مەكتەپپەن كەزدەسۋ وتكىزدى. كەڭەس كۋراتورى شايماردان نۇرىموۆتىڭ باستاماسىمەن سوڭعى قوڭىراۋعا ارنالعان ەكى گرانت ءبولىندى.كوپتەگەن مۇعالىمدەر مەدالدارمەن جانە العىس حاتتارمەن ماراپاتتالدى. اباي اتىنداعى قازۇپۋ-دىڭ فيلولوگيا فاكۋلتەتىندە وقيتىن 42 ستۋدەنتتىڭ وقۋ اقىسى ەكى مارتە تولەندى. عالىمدار كەڭەسى 3 حالىقارالىق كونفەرەنتسيا وتكىزدى، ولارعا اقش، ەۋروپا، تۇركيا، رەسەي، وزبەكستان، قىرعىزستان سياقتى ەلدەردەن عالىمدار قاتىسىپ، عىلىمي ىنتىماقتاستىقتى نىعايتۋعا مۇمكىندىك تۋدىردى. بۇل قۇرىلىمدار مەن شارالار ۇيعىر حالقىنىڭ مادەنيەتىن ناسيحاتتاۋ جانە ەلدىڭ الەۋمەتتىك-ەكونوميكالىق دامۋىنا ۇلەس قوسۋ ماقساتىندا اتقارىلىپ جاتقان جۇمىستاردىڭ ءبىر بولىگى عانا.
ءبىز ءۇشىن بۇل فورۋمدار – تەك پىكىر الماسۋ الاڭى عانا ەمەس، رۋحاني بىرىگۋ، ەتنوسارالىق تاتۋلىق پەن ۇلتارالىق ىنتىماقتاستىقتى تەرەڭدەتە تۇسەتىن ماڭىزدى باسقوسۋلار. وسى ارقىلى ءبىز ەلىمىزدىڭ تۇراقتىلىعى مەن بىرلىگىنە ءوز ۇلەسىمىزدى قوسىپ كەلەمىز.
قايىرىمدىلىق – قوعام تىرەگى، سپورت – ۇلت ساۋلىعىنىڭ نەگىزى
–قايىرىمدىلىق، سپورت جانە اقپاراتتىق جۇمىس – قوعاممەن بايلانىستىڭ ماڭىزدى تەتىكتەرى. وسى باعىتتاردا قانداي ناتيجەلەرگە قول جەتكىزدىڭىزدەر؟
– الەۋمەتتىك جاۋاپكەرشىلىك – ءبىزدىڭ باستى قۇندىلىقتارىمىزدىڭ ءبىرى. سوندىقتان قايىرىمدىلىق جۇمىستارىنا ەرەكشە ءمان بەرەمىز. 2024 جىلدىڭ باسىنان بەرى جالپى سوماسى 125 ميلليون تەڭگەگە جۋىق قايىرىمدىلىق كومەك كورسەتىلدى. بۇل كومەك بالالار ۇيلەرىنە، مۇقتاج وتباسىلارعا، سونداي-اق اۋىر ناۋقاستارعا، ونىڭ ىشىندە شەتەلدە ەمدەلۋى قاجەت جاندارعا ارنالدى. ماسەلەن، الماتى وبلىسى بويىنشا مۇقتاج وتباسىلارعا 400 توننا كومىر جەتكىزىلدى، ورتتەن زارداپ شەككەن 50 ءۇيدى قالپىنا كەلتىرۋگە كومەك كورسەتىلدى، سونداي-اق 30 ونكولوگيالىق ناۋقاسقا ەم-دوم ۇيىمداستىرىلدى. ءبىز ءۇشىن ءبىر ادامنىڭ تاعدىرى – تۇتاس قوعامنىڭ تاعدىرى ەكەنىن ۇمىتپاۋ ماڭىزدى. قازاقستان ۇيعىر جاستارى وداعى 163 ادامدى جۇمىسپەن قامتىپ، 38 وقىتۋ ترەنينگىن ۇيىمداستىردى. جاستارعا تەگىن زاڭگەرلىك جانە پسيحولوگيالىق كەڭەستەر كورسەتىلدى. سونداي-اق سپورت سالاسى دا ءبىزدىڭ نازارىمىزدا. سەبەبى دەنى ساۋ ۇرپاق – ەل بولاشاعىنىڭ كەپىلى. فۋتبول، بوكس، جەكپە-جەك، ساداق اتۋ سەكىلدى سپورت تۇرلەرىنەن ءتۇرلى تۋرنيرلەر وتكىزدىك. ال پاريجدەگى 33-جازعى وليمپيادا ويىندارىنىڭ جۇلدەگەرلەرى قاتىسقان سپورت فورۋمىمىز – جاستارعا ۇلكەن سەرپىن بەرگەن ماڭىزدى شارا بولدى. وسى فورۋم اياسىندا جاس سپورتشىلاردى قولداۋ باعىتىندا بىرنەشە ىنتىماقتاستىق كەلىسىمدەرگە دە قول قويدىق.
اقپاراتتىق كەڭىستىكتەگى بەلسەندىلىك تە قازىرگى زاماندا اسا ماڭىزدى. حالىقپەن تىكەلەي جانە اشىق بايلانىس ورناتۋ ءۇشىن Facebook, Instagram, TikTok پلاتفورمالارىندا بەلسەندى جۇمىس جۇرگىزىپ كەلەمىز.
پرەزيدەنتتىڭ قوعام ءۇشىن ماڭىزدى باستامالارى
–اسسامبلەيا سەسسياسىندا پرەزيدەنت كوتەرگەن قوعام ءۇشىن اسا ماڭىزدى ماسەلەلەر جونىندە پىكىرىڭىزدى بىلسەك.
–قازاقستان حالقى اسسامبلەياسىنىڭ ءحححىV سەسسياسىندا پرەزيدەنت قاسىم-جومارت توقاەۆ كوتەرگەن ماسەلەلەر وتە ورىندى جانە ماڭىزدى دەپ ەسەپتەيمىن. بىرىنشىدەن، اسسامبلەيانىڭ ايماقتارداعى جۇمىسىن جانداندىرۋ مەن تۇركىستاندا جاڭا دوستىق ءۇيىنىڭ اشىلۋى ەلىمىزدەگى ەتنوسارالىق كەلىسىمدى نىعايتۋعا باعىتتالعان ۇلكەن قادام بولىپ تابىلادى. بۇل باستاما ازاماتتار اراسىنداعى تاتۋلىق پەن ىنتىماقتاستىقتى ارتتىرادى، ۇلتتىق بىرلىك پەن بەيبىتشىلىكتى ساقتاۋعا مۇمكىندىك بەرەدى. سونىمەن قاتار، پرەزيدەنتتىڭ اقپاراتتىق كەڭىستىكتە بىرلىك پەن كەلىسىم يدەولوگياسىن ناسيحاتتاۋ تۋرالى ۇسىنىسى وتە وزەكتى. مەديا قۇرالدارىنىڭ قوعامداعى ءرولى ارتقان قازىرگى كەزدە بۇل قادام ەتنوسارالىق كەلىسىمدى نىعايتۋعا جانە قوعامداعى تۇسىنىستىك پەن قۇرمەتتى ارتتىرۋعا ۇلكەن ىقپال ەتەدى.
مادەنيەت پەن ونەردىڭ الەۋەتىن پايدالانۋ، ءار ءتۇرلى ەتنوستاردىڭ مادەنيەتى مەن داستۇرلەرىن ناسيحاتتاۋ دا وتە ماڭىزدى. ەتنومادەني فەستيۆالدەر مەن مادەني شارالار ارقىلى ءبىز ەلىمىزدىڭ كوپەتنوستى بولمىسىن ساقتاي وتىرىپ، ۇلتتىق بىرلىكتى نىعايتۋعا جول اشامىز.
پرەزيدەنتتىڭ «تازا قازاقستان» اكتسياسىن قولداۋى، ءاربىر ازاماتتىڭ جاۋاپكەرشىلىگىن ارتتىرۋعا، وتانشىلدىق پەن تازالىقتى دارىپتەۋگە باعىتتالعان ماڭىزدى باستاما بولىپ تابىلادى. بۇل يدەيا ارقىلى ءبىز قوعامدا جوعارى جاۋاپكەرشىلىك پەن ازاماتتىق سانا قالىپتاستىرۋدى كوزدەيمىز. جالپى، پرەزيدەنت كوتەرگەن باستامالار ەلىمىزدىڭ الەۋمەتتىك، مادەني جانە ساياسي تۇراقتىلىعىن قامتاماسىز ەتۋگە ىقپال ەتىپ، ەتنوسارالىق كەلىسىمدى نىعايتۋعا باعىتتالعان دۇرىس جانە ورىندى قادامدار دەپ سانايمىن.
– دولكۋنتاي مىرزا، اشىق سۇحباتىڭىزعا راحمەت! ەل بىرلىگى جولىنداعى ەڭبەكتەرىڭىزگە ساتتىلىك تىلەيمىز.– راحمەت! ەڭ باستىسى – بەيبىت ءومىر مەن بىرلىك. قازاقستانداعى ءاربىر ەتنوس – وسى مەملەكەتتىڭ اجىراماس بولىگى. ءبىز بىرگە – ءبىرتۇتاس حالىقپىز!
جاننا جومارت
