قازاقستاننىڭ دەنساۋلىق ساقتاۋ مينيسترلىگى مەكتەپ وقۋشىلارىنىڭ تاماقتانۋىن ۇيىمداستىرۋعا مەملەكەتتىك باقىلاۋدى كۇشەيتەتىنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل شەشىم ماڭعىستاۋ وبلىسى مەكتەپتەرىندەگى بالالاردىڭ جاپپاي ۋلانۋ وقيعالارىنان كەيىن قابىلدانعان.
مينيسترلىكتىڭ مالىمەتىنشە، قازىرگى قولدانىستاعى زاڭناما بالالار جۇرگەن بارلىق ورىنداردى مەملەكەتتىك باقىلاۋمەن تولىق قامتۋعا مۇمكىندىك بەرمەيدى. وسىعان بايلانىستى ۆەدومستۆو ءبىلىم بەرۋ مەكەمەلەرىنە قاتىستى مەملەكەتتىك باقىلاۋدىڭ جاڭا تاسىلدەرىن ازىرلەگەن.
جاڭا تاسىلدەرگە سايكەس، بالالار ءجيى باراتىن ورىندارعا ەرەكشە مارتەبە بەرىلەدى. سونىمەن قاتار، تەكسەرۋ تۋرالى الدىن الا حابارلاما جىبەرۋ الىنىپ تاستالادى جانە سانيتاريالىق-ەپيدەميولوگيالىق تالاپتارعا سايكەستىككە مونيتورينگتىك ساپارلار ۇيىمداستىرىلادى.
ماڭعىستاۋ وبلىسىنداعى مەكتەپ اسحانالارىنداعى جاپپاي ۋلانۋدان كەيىن 72 ءبىلىم بەرۋ ۇيىمىنىڭ ءتىزىمى جاسالىپ، جوسپاردان تىس تەكسەرۋلەر باستالدى. بۇگىنگى كۇنگە دەيىن 14 مەكتەپ اسحاناسى تەكسەرۋدەن ءوتتى.
ۋلانۋ فاكتىلەرىن تەرگەۋ ماقساتىندا وقۋ-اعارتۋ جانە دەنساۋلىق ساقتاۋ مينيسترلىكتەرىنىڭ، سونداي-اق باس پروكۋراتۋرانىڭ وكىلدەرىنەن قۇرالعان ۆەدومستۆوارالىق جۇمىس توبى قۇرىلدى.
