يەرۋساليم تاۋلارىنداعى ءىرى ورمان ءورتى. يزرايل بەس ەلدەن كومەك سۇرادى

30 ءساۋىر كۇنى تاڭەرتەڭ يەرۋساليم تاۋلارىنداعى مەسيلات-تسيون ەلدى مەكەنىنىڭ ماڭىنداعى ەشتاول ورمانىندا ءىرى ءورت باستالدى. ورتكە بايلانىستى جاعداي ۋشىعىپ تۇرعاندىقتان، يزرايل ەۋروپالىق بەس ەلدەن ورمان ورتىمەن كۇرەسكە كومەك سۇرادى، دەپ حابارلايدى "ادىرنا" ۇلتتىق پورتالى. ورتكە قارسى قىزمەت پەن قۇتقارۋ قىزمەتى جوعارى قاۋىپتىلىك رەجيمىنە كوشتى. بىرنەشە ايماقتان 50-دەن استام ءورت ءسوندىرۋ بريگاداسى جۇمىلدىرىلىپ، «ەلاد» ارنايى ەسكادريلياسىنىڭ ۇشاقتارى كوككە كوتەرىلدى. كۇشتى جەل ءورتتى سوندىرۋگە كەدەرگى كەلتىرىپ، جالىننىڭ تەز تارالۋىنا سەبەپ بولۋدا. «ماگەن-داۆيد ادوم» (مادا) جەدەل جاردەم قىزمەتىنىڭ باس ديرەكتورى ەلي ءبيننىڭ مالىمەتىنشە، ءورت ايماعىندا كومىرقىشقىل گازىمەن ۋلانعان 12 ادامعا العاشقى كومەك كورسەتىلگەن. ءورت بولعان جەرگە يزرايل پرەمەر-ءمينيسترى بينيامين نەتانياحۋ كەلدى. تساحال-دىڭ اسكەري-اۋە كۇشتەرى ورتپەن كۇرەسكە كومەك كورسەتۋگە دايىندالىپ جاتىر. اۋە كۇشتەرىنىڭ 669-ەۆاكۋاتسيالىق-قۇتقارۋ بولىمشەسى جوعارى دايىندىق كۇيىنە كەلتىرىلدى. ارميالىق ءورت ءسوندىرۋ تەحنيكالارى مەن ارنايى ۇشاقتار ءورتتى وقشاۋلاۋ جۇمىسىنا قوسىلۋعا ءتيىس. قورعانىس ءمينيسترى يسراەل كاتس تساحال باس شتابىنىڭ باستىعى گەنەرال-لەيتەنانت ەيال زاميرگە ورتپەن كۇرەسكە بارىنشا كومەك كورسەتۋ تۋرالى تاپسىرما بەردى. «بۇل — ۇلتتىق دەڭگەيدەگى توتەنشە جاعداي. ءورتتى باقىلاۋعا الىپ، ادامداردىڭ ءومىرىن ساقتاپ قالۋ ءۇشىن بارلىق كۇشتى جۇمىلدىرۋ قاجەت»، — دەدى مينيستر. يزرايل كيپر، گرەكيا، حورۆاتيا، بولگاريا جانە يتاليا ەلدەرىنەن يەرۋساليم تاۋلارىنداعى ءورتتى سوندىرۋگە جەدەل تۇردە كومەك سۇرادى. ءورت ءسوندىرۋ جانە قۇتقارۋ قىزمەتىنىڭ باسشىسى گەنەرال-لەيتەنانت ەيال كاسپي توتەنشە ارەكەت ەتۋ جوسپارلارىن ىسكە قوسىپ، دايىندىق دەڭگەيىن ەڭ جوعارعى دارەجەگە جەتكىزدى. ەلدەگى بارلىق وڭىرلەردەگى ءورت سوندىرۋشىلەر موبيليزاتسيالاندى. ءورت سالدارىنان پوليتسيا يەرۋساليم تاۋلارىنداعى نەۆە-شالوم ەلدى مەكەنىن ەۆاكۋاتسيالادى. بۇل شەشىم جاعدايدى باعالاۋدان كەيىن الدىن الۋ شاراسى رەتىندە قابىلداندى. سونداي-اق، پوليتسيا يەرۋساليم تاۋلارىنداعى جالىننىڭ تارالۋىنا بايلانىستى №1 جانە №3 تراسسالار قيىلىسىنداعى مودين ماڭىنداعى لاترۋن اۋدانىن ەۆاكۋاتسيالاۋ تۋرالى شەشىم قابىلدادى. پوليتسيا كۇشتەرى تۇرعىنداردى كوشىرۋ جانە حالىقپەن ءوزارا ءىس-قيمىل جاساۋ جۇمىستارىن جۇرگىزۋدە.