تارازدا «قىزعالداق مۇرا» حالىقارالىق فەستيۆالى اياسىندا وتكەن عىلىمي-تاجىريبەلىك كونفەرەنتسيادا گەرمانيا، ۋكراينا، قىرعىزستان جانە نيدەرلاندى ساراپشىلارى ءسوز سويلەدى.
HBM (نيدەرلاندى) كومپانياسىنىڭ مەنەدجەرى پيچنا مارسەلي قىزعالداقتى جامبىل وبلىسىنىڭ تۋريستىك برەندى دەپ ساناۋعا بولادى دەپ ەسەپتەيدى.
– اتالعان كونفەرەنتسيانى وتكىزۋ قازاقستاننىڭ، اتاپ ايتقاندا جامبىل ءوڭىرىنىڭ تۋريزم سالاسىندا ۇلكەن الەۋەتكە يە ەكەندىگىن كورسەتەدى، – دەپ اتاپ ءوتتى ول. – كوپتەگەن ادامدار قىزعالداقتىڭ قايدان شىققانىن جانە وسى تەڭدەسسىز گۇلدىڭ تاريحىن بىلە بەرمەيدى. ءتۇرلى نۇسقالار بار، بىراق ونىڭ شىعۋ تاريحىندا جامبىل جەرى باستى ءرول اتقاراتىنى ءسوزسىز. مۇنى تابيعي جاعدايلار دا، عىلىمي زەرتتەۋلەر دە راستايدى. ەڭ باستىسى، بۇل تابيعي بايلىقتى ساقتاپ، مادەني-تۋريستىك جوبالارعا ساۋاتتى تۇردە ەنگىزۋ – وتە ماڭىزدى.
كاسسەل ۋنيۆەرسيتەتىنىڭ (گەرمانيا) پروفەسسورى ەريح حەلمۋت فرايتاگ كونفەرەنتسيانىڭ ناتيجەلى حالىقارالىق ديالوگ پەن وزىق تاجىريبە الماسۋ الاڭىنا اينالعانىن اتاپ ءوتتى.
ۆ. كارازين اتىنداعى حاركوۆ مەملەكەتتىك ۋنيۆەرسيتەتى (ۋكراينا) بوتانيكالىق باق ديرەكتورىنىڭ ورىنباسارى الەكساندر الەحين وقۋ ورداسىنىڭ بازاسىندا جامبىل وبلىسىنىڭ قىزعالداقتارىن زەرتتەۋ ناتيجەلەرىمەن ءبولىستى.
ج. بالاساعۇن اتىنداعى قىرعىز ۇلتتىق ۋنيۆەرسيتەتىنىڭ كافەدرا مەڭگەرۋشىسى، گەوگرافيا عىلىمدارىنىڭ كانديداتى الماگۇل كەندىرباەۆا جابايى قىزعالداقتاردى قورعاۋ بويىنشا تاجىريبەلىك ۇسىنىستارىن ورتاعا سالدى. ول تابيعي پوپۋلياتسيالاردىڭ وسالدىعىنا جانە ولاردى قورعاۋعا حالىقارالىق كوزقاراستىڭ قاجەتتىلىگىنە نازار اۋداردى.
– جامبىل وبلىسىن قىزعالداقتاردىڭ وتانى دەۋگە تولىق نەگىز بار. ساراپشىلار مەن تابيعات جاناشىرلارى ءۇشىن 21 عاسىردا جامبىل وبلىسىندا قىزعالداق گۇلىن تاماشالاۋ سيرەك كەزدەسەتىن جانە قۇندى مۇمكىندىك. قىزعالداق گۇلىن قورعاۋداعى باستامالارىڭىزعا ساتتىلىك تىلەيمىن! – دەدى ول.
سونداي-اق يۋنەسكو-نىڭ جاھاندىق گەوپارك جونىندەگى قازاقستان ۇلتتىق كوميتەتىنىڭ توراعاسى سايدا نىعماتوۆا، گەولوگيا-مينەرالوگيا عىلىمدارىنىڭ كانديداتى تاتيانا پيروگوۆا، «جاباعىلى-ماناس» تاۋ كلۋبى قب توراعاسى ەلەنا ەفيموۆا، «جاباعىلى-ماناس» تاۋ كلۋبى قب جوبالارىنىڭ ۇيلەستىرۋشىسى راۋف ءسابيتوۆ ءسوز سويلەدى.
كونفەرەنتسيا قورىتىندىسى بويىنشا قارار قابىلداندى.
