اقمولا وبلىسىنىڭ ەلورداعا جاقىن ورنالاسقان اۋداندارىندا تۋريزم قارقىندى دامىپ كەلەدى. 2027 جىلعا دەيىن بۇل ايماقتا جالپى قۇنى 14 ميلليارد تەڭگەدەن اساتىن 20-دان استام تۋريستىك جوبا ىسكە اسىرىلماق. بۇگىندە قوناقۇيلەر، دەمالىس بازالارى، شيپاجايلار مەن ويىن-ساۋىق كەشەندەرىنىڭ قۇرىلىسى ءجۇرىپ جاتىر. بىرقاتارى جۇمىس ىستەي باستاسا، وزگەلەرى جوبالاۋ نەمەسە ىسكە قوسۋ ساتىسىندا. تۋريزم سالاسىن دامىتۋعا جەكە ينۆەستيتسيالارمەن قاتار، مەملەكەتتىك قولداۋ دا كورسەتىلۋدە.
باستى جوبا Aqkol اۋدانىنداعى Wyndham Residences Aqkol قوناق ءۇيى. بۇل تانىمال كۋرورتتىق ايماقتاردان تىس جەردە سالىنعان العاشقى حالىقارالىق دەڭگەيدەگى قوناق ءۇي. كەشەن قۇرامىندا 32 قوناقۇي بولمەسى، ORMAN مەيرامحاناسى جانە Institute of Integrative Medicine & Wellness ەمدەۋ-ساۋىقتىرۋ كلينيكاسى بار. جوباعا 4,5 ميلليارد تەڭگە ينۆەستيتسيا قۇيىلىپ، 90 جۇمىس ورنى اشىلعان. مەملەكەتتىك بيۋدجەتكە 90 ميلليون تەڭگە سالىق تۇسكەن.
2025 جىلى جوبانىڭ ەكىنشى كەزەڭى The Village by Wyndham Residences Aqkol برەندىندەگى 90 كوتتەدجدىڭ قۇرىلىسى باستالادى، قۇنى 5 ميلليارد تەڭگە. ال ءۇشىنشى كەزەڭدە 120 ورىندىق Ramada Resort Aqkol قوناق ءۇيىنىڭ قۇرىلىسى جوسپارلانعان، ينۆەستيتسيا كولەمى 8 ميلليارد تەڭگە. بارلىق كەزەڭدەردىڭ جيىنتىق ينۆەستيتسياسى 13 ميلليارد تەڭگەگە جەتىپ، 240-تان استام جاڭا جۇمىس ورنى قۇرىلادى.
ينۆەستورلار زاماناۋي ەكولوگيالىق تەحنولوگيالاردى ەنگىزۋدە، كۇن پانەلدەرى، بيو-سەپتيكتەر، اۆتونومدى سۋ ۇڭعىمالارى. بۇل شەشىمدەر ورتالىق جەلىلەرگە تاۋەلدىلىكتى ازايتادى. مەملەكەت تاراپىنان قولداۋ بار، 2025 جىلعى ناۋرىزدا Sirius Plus جشس 308,9 ميلليون تەڭگە كولەمىندە شىعىندارىن وتەۋ ءۇشىن قارجى العان.
سونىمەن قاتار، جوبا اياسىندا ورمان قورىنان 60 گەكتار جەردى جەكەمەنشىككە بەرۋ ماسەلەسى قارالىپ جاتىر. بۇل كەڭەيۋ مەن قوسىمشا قارجى تارتۋعا مۇمكىندىك بەرەدى.
وسى اۋداننىڭ وزىندە 4,5 ميلليارد تەڭگەگە باعالانعان Senim كاسىپوداقتارىنىڭ ەمدەۋ-ساۋىقتىرۋ ورتالىعىنىڭ قۇرىلىسى ءجۇرىپ جاتىر. ورتالىق 2026 جىلدىڭ سوڭىندا اشىلادى دەپ جوسپارلانعان.
جاڭا تۋريستىك نىساندار باسقا اۋدانداردا دا پايدا بولادى. 2025 جىلدان باستاپ ارشالى، شورتاندى، تسەلينوگراد اۋداندارىندا جانە قوسشى قالاسىندا جوبالار جۇزەگە اسادى. مىسالى، بەيبارىس دەمالىس ايماعىن كەڭەيتۋ، جاڭا دەمالىس بازالارى مەن جول بويى كەشەندەرىن سالۋ قاراستىرىلعان. جالپى ينۆەستيتسيا كولەمى 6 ميلليارد تەڭگەدەن استام. بۇل جۇزدەگەن جاڭا جۇمىس ورنىن اشۋعا جول اشادى.
زەرەندى اۋدانىندا جىل سايىن 40 مىڭعا دەيىن تۋريست دەمالادى. بۇل وڭىردە كاسىپكەرلەرگە تۋريزم نىساندارىن بازالار، قوناق ۇيلەر، سانيتارلىق توراپتار جانە كولىك ساتىپ الۋعا 50 ميلليون تەڭگەگە جۋىق شىعىن وتەلگەن.
ءبىرجان سال اۋدانىندا جۇكەي كولىنىڭ ماڭىندا ەكوتۋريزم دامىپ كەلەدى. بۇگىندە ەكى گلەمپينگ، قوناق ءۇي جانە Koktal پانتا-ەمدەۋ ورتالىعى جۇمىس ىستەيدى. الايدا بولاشاق دامۋ ءۇشىن ينفراقۇرىلىمدى جەتىلدىرۋ قاجەت.
ساندىقتاۋ اۋدانى دا تۋريستىك الەۋەتكە يە، بىراق جول جانە لوگيستيكا ماسەلەلەرىنە بايلانىستى ازىرگە ارتتا قالىپ وتىر. بۇل اۋداندا ەكولوگيالىق، بالالارعا ارنالعان جانە ەتنو-تۋرلار ۇيىمداستىرۋ ۇسىنىلعان. اۋدان اكىمدىگىنە وسىنداي جوبالار ءۇشىن جەر تەلىمدەرىن بەلگىلەۋ تاپسىرىلعان.
ءتۋريزمدى ىلگەرىلەتۋدە Four Season تۇجىرىمداماسىنا باسىمدىق بەرىلۋدە. 2025 جىلى وڭىردە حالىقارالىق جانە رەسپۋبليكالىق دەڭگەيدەگى 25 ءىرى ءىس-شارا وتكىزۋ جوسپارلانعان. ولارعا 30 مىڭنان استام ادام كەلەدى دەپ كۇتىلۋدە. بۇل شارالاردىڭ نەگىزگى دەمەۋشىلەرى جەكە ينۆەستورلار.
قورىتىندىلاي كەلە، استانانىڭ ىرگەسىندەگى تۋريستىك ايماقتاردا سەرپىندى دامۋ بايقالادى. قازىرگى زامانعا ساي نىساندار سالىنىپ، جاڭا جۇمىس ورىندارى اشىلۋدا، ەكولوگيالىق تەحنولوگيالار قولدانىلۋدا. مۇنىڭ ءبارى ەلوردا ماڭىنداعى وڭىرلەردى دەمالىس پەن ينۆەستيتسيا ءۇشىن تارتىمدى باعىتقا اينالدىرىپ وتىر.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز