اباي اتىنداعى قازاق ۇلتتىق پەداگوگيكالىق ۋنيۆەرسيتەتى ستۋدەنت قىزداردى جيناپ، وزدەرىن قالاي ۇستاۋ كەرەگى تۋرالى ناسيحات جاساعان. مۇنى ستۋدەنت قىز Qumash Telegram-ارناسىنا ايتىپ بەرگەن, دەپ حابارلايدى “ادىرنا” ۇلتتىق پورتالى.
جيىندا اقىل مەن مورالعا تولى پلاكاتتار دا بولعان. پلاكاتتاردا قىز «اقىرىن سويلەپ، ەر ادامعا جول بەرۋى كەرەكتىگى» جازىلعان.
“ۋنيۆەرسيتەت اكىمشىلىگى ءبىرىنشى كۋرستىڭ بارلىق قىزىن ياعني 40-50 ادامدى جيناپ، قىز بالا يناباتتى، يبالى بولۋ كەرەك دەگەن پلاكاتتاردى ىلگەن. سودان كەيىن ءارتۇرلى جاستاعى ەر ادامداردىڭ قىزداردىڭ مىنەز-قۇلقى تۋرالى ايتقان ۆيدەوروليكتەرىن قوسقان”، – دەلىنگەن ارنادا.
ستۋدەنتتىڭ ايتۋىنشا، ۆيدەونىڭ نەگىزگى تەزيسى قىزدار اشىق-شاشىق كيىنبەۋى كەرەگىن، قاتتى داۋىس شىعارىپ سويلەمەۋگە تيىس ەكەنىن، ەر ادامداردى كورگەندە، ءيىلىپ سالەمدەسۋ كەرەگىن تۇسىندىرەدى. سونداي-اق ۇزىن بەلدەمشە كيۋ ادەپتىلىك بەلگىسى دەپ ايتقان.
سونىمەن قاتار اعا وقىتۋشى ەۋروپالىق ايەلدەرگە ەلىكتەۋگە بولمايتىنىن ايتقان. ولاردىڭ شامادان تىس ەركىندىگىنەن لگبت جانە باسقا دا نارسەلەر كەڭ تارالعانىن ايتتى. ولاردى جيىننان شىعارماي قويىپتى.
جەلى قولدانۋشىلارىنىڭ ءبىرازى “جىگىتتەر قانداي بولۋى كەرەگى تۋرالى دا جيىن وتكىزىڭىزدەرشى”، “ايەلدەردى جايىنا قالدىرىڭىزدار. ءبىزدى تاربيەلەپ، اقىل ايتۋدى دوعارىڭىزدار. قىزدار ءوز ومىرىنە ءوزى جاۋاپكەرشىلىك الا الادى. ەرلەرگە ءوزىن-ءوزى ۇستاۋدى ۇيرەتىڭىزدەر” دەپ جازسا، كەيبىرى “سالت-ءداستۇرىن ۇيرەتەيىن دەپ جاتىر عوي” دەپ جازعان. ۋنيۆەرسيتەت جيىن وتكەنىن راستادى. ولار بۇل نارسەنى «ۇلتتىق قۇندىلىق پەن اباي قۇنانباەۆتىڭ ءتالىم-تاربيەلىك فيلوسوفياسىن دارىپتەۋ» دەپ ءتۇسىندىرىپ، مۇنداي ءىس-شارالار تۇراقتى وتكىزىلىپ تۇراتىنىن ايتقان.ۇقساس جاڭالىقتار
