اقش پەن يران اراسىنداعى كەلىسسوزدەر «كۇردەلى جانە ۇزاق پروتسەسس» سيپاتىندا ءوتىپ جاتىر. بۇل تۋرالى Bloomberg اگەنتتىگى جاعدايمەن تانىس دەرەككوزدەرگە سىلتەمە جاساپ جاريالادى، دەپ حابارلايدى "ادىرنا".
مالىمەتكە سايكەس، تەگەران جوعارعى كوشباسشى مودجتابا حامەنەيدىڭ قايدا ورنالاسقانىن قۇپيا ۇستاۋعا تىرىسىپ وتىرعاندىقتان، تاراپتار اراسىنداعى حابار الماسۋ بىرنەشە كۇنگە سوزىلىپ وتىر.
امەريكالىق كەلىسسوزشىلەردىڭ ۇسىنىستارى يراننىڭ جوعارى لاۋازىمدى وكىلدەرىنە «جاناما ديپلوماتيالىق ارنالار» ارقىلى جەتكىزىلەدى. كەي جاعدايدا حابارلامالاردى جەتكىزۋ ءۇشىن كۋرەرلەر پايدالانىلادى. بۇل تاسىلدەر جوعارعى كوشباسشىنىڭ ورنالاسقان جەرىن قۇپيا ساقتاۋ ماقساتىندا قولدانىلاتىنى ايتىلعان، سەبەبى تەگەران ونىڭ قاۋىپسىزدىگىنە الاڭدايدى.
سونداي-اق يرانداعى بايلانىس جۇيەسىنىڭ تۇراقسىزدىعى دا پروتسەستى قيىنداتىپ وتىر. كەيبىر جاعدايلاردا WhatsApp ارقىلى جىبەرىلگەن حابارلامالار 48 ساعاتتان كەيىن عانا جەتەتىنى حابارلانعان.
دەرەككوزدەرگە سۇيەنسەك، كەلىسسوزدەر كەيدە پاكىستان شەنەۋنىكتەرى ارقىلى دا جۇزەگە اسادى: ولار اقش-تىڭ ۇسىنىستارىن تەلەفون نەمەسە تەگەرانعا جەكە ساپارلار ارقىلى جەتكىزىپ، كەيىن كۋرەرلەرگە تاپسىرادى.
سونىمەن قاتار، اقش-تىڭ ارنايى وكىلى ستيۆ ۋيتكوفف پەن يران سىرتقى ىستەر ءمينيسترى ابباس اراگچي اراسىندا تىكەلەي بايلانىس ارناسى ساقتالعانى ايتىلادى.
بۇعان دەيىن اقش پرەزيدەنتى دونالد ترامپ ۆاشينگتون مەن تەگەران كەلىسىمگە كەلگەنىن مالىمدەگەن ەدى، الايدا يران تاراپى بۇل اقپاراتتى جوققا شىعاردى.
