ششۋچە-بۋراباي كۋرورتتىق ايماعى – تۋريزم مەن ينۆەستيتسيانىڭ جاڭا ورتالىعى

اقمولا وبلىسىندا تۋريزم سالاسى قارقىندى دامىپ كەلەدى. 2024 جىلى وڭىرگە كەلۋشى تۋريستەر سانى 1 ميلليونعا جۋىقتادى. ولاردىڭ 420 مىڭنان استامى قوناق ۇيلەردە ورنالاستىرىلسا، 577 مىڭى ۇلتتىق پاركتەردى ارالاعان. تۋريستىك قىزمەتتەن تۇسكەن تابىس 21,5 ميلليارد تەڭگەنى قۇراپ، وتكەن جىلمەن سالىستىرعاندا 30 پايىزعا ارتتى. بيۋدجەتكە 4,7 ميلليارد تەڭگە سالىق ءتۇستى. بۇل جەتىستىكتەردىڭ 90 پايىزىنا جۋىعى ششۋچە-بۋراباي كۋرورتتىق ايماعىنىڭ ۇلەسىندە. مۇندا 11 مىڭنان استام توسەك-ورىن قورى بار 234 ورنالاستىرۋ نىسانى جۇمىس ىستەيدى. تەك بۋراباي اۋدانىندا عانا تۋريستىك قىزمەتتەن تۇسكەن تابىس ەكى ەسەدەن اسا ءوسىپ، 18,9 ميلليارد تەڭگەگە جەتتى. ۇكىمەت 2025–2029 جىلدارعا ارنالعان كۋرورتتىق ايماقتى دامىتۋدىڭ كەشەندى جوسپارىن بەكىتتى. جالپى قۇنى 137,2 ميلليارد تەڭگەنى قۇرايتىن 118 ءىس-شارانى ىسكە اسىرۋ كوزدەلگەن. ولاردىڭ قاتارىندا ينجەنەرلىك جانە جول ينفراقۇرىلىمىن جاڭارتۋ، اباتتاندىرۋ، جاڭا تۋريستىك نىساندار سالۋ بار. قازىرگى تاڭدا سۋمەن، جىلۋمەن قامتۋ جانە كارىز جۇيەسىن جاڭارتۋ جۇمىستارى جۇرگىزىلىپ جاتىر. جاڭا جولدار سالىنىپ، 2025 جىلى ايماقتا باقىلاۋ الاڭى، پرومەناد سكۆەرى مەن قوعامدىق جاعاجاي اشىلادى. سونداي-اق تۋريستەرگە اشىق بولاتىن دەندروپارك جاڭعىرتىلادى. بۋراباي كەنتىندە كوپفۋنكتسيونالدى كونگرەسس-ورتالىقتىڭ قۇرىلىسى جوسپارلانۋدا. ءوڭىر مادەني-تاريحي ءتۋريزمدى دە دامىتۋدا: 2025 جىلى «ساق قورعاندارى» اتتى جاڭا تۋريستىك مارشرۋت ىسكە قوسىلادى، ال 2029 جىلعا دەيىن تاعى ەكى باعىت اشىلادى. الداعى جىلى كۋرورتتىق ايماقتا 3 ميلليارد تەڭگەگە جۋىق قارجىعا 5 جاڭا تۋريستىك نىسان پايدالانۋعا بەرىلەدى. 62 جاڭا جۇمىس ورنى اشىلادى. ءىرى جوبالاردىڭ قاتارىندا حالىقارالىق برەندتى قوناقۇيلەر، اپارت-وتەلدەر، ەتنو-كافەلەر مەن اباتتاندىرىلعان دەمالىس ورىندارى بار. «اقبۋرا» ويىن-ساۋىق ايماعى دا ينۆەستورلاردى تارتۋ ءۇشىن كەڭەيتىلۋدە. قاۋىپسىزدىكتى كۇشەيتۋ شارالارى قولعا الىنعان: 79 بەينەباقىلاۋ كامەراسى ورناتىلىپ، قۇتقارۋ بەكەتتەرى سالىنىپ جاتىر. كولىك جەلىسى دە دامىپ كەلەدى: كوكشەتاۋ – قىزىلوردا باعىتىندا جاڭا پويىز قاتىنايدى، «كۋرورت-بۋراباي» ستانتسياسى جاڭعىرتىلۋدا، تىكۇشاقپەن ەكسكۋرسيالار ىسكە قوسىلدى. ەلەكتر كولىكتەرگە ارنالعان قۋاتتاۋ ستانتسيالارى مەن بايلانىس انتەننالارى ورناتىلۋدا. الايدا ۇلتتىق پاركتە جەردى جالعا بەرۋ تاريفتەرىنىڭ جوعارى بولۋى ماسەلەسى ءالى دە وزەكتى. ەكولوگيالىق باعىتتاعى جۇمىستار دا ەسكەرۋسىز قالماعان. بۋرابايدا قوقىستى سۇرىپتاپ جيناۋ جانە قايتا وڭدەۋ جۇيەسى بار زاماناۋي كەشەن سالىنادى. وسىنىڭ ءبارى ششۋچە-بۋراباي كۋرورتتىق ايماعىنىڭ ءتورت مەزگىل بويى قىزمەت ەتەتىن زاماناۋي تۋريزم ورتالىعىنا اينالۋىنا جول اشۋدا. بۇل – تۋريستەردى دە، ينۆەستورلاردى دا تارتاتىن، مەملەكەت نازارىن اۋدارىپ وتىرعان ماڭىزدى ايماق.