قر مادەنيەت جانە اقپارات ءمينيسترى ايدا بالاەۆا كورنەكتى اقىن، حالىق جازۋشىسى تەمىرحان مەدەتبەكتىڭ دۇنيەدەن وتۋىنە بايلانىستى كوڭىل ايتتى، دەپ حابارلايدى “ادىرنا” ۇلتتىق پورتالى.
«قازاق ادەبيەتىنىڭ تاعى ءبىر بايتەرەگى قۇلادى. حالىق جازۋشىسى، كورنەكتى قالامگەر، الاش جىرىنىڭ الداسپانىنا اينالعان تەمىرحان مەدەتبەك اعامىز باقيعا اتتاندى. بارشا قازاق ەلىنە، اقىننىڭ اعايىن-تۋىستارى مەن وتباسىنا قايعىرا كوڭىل ايتامىن»، – دەدى مينيستر.
ول ءوز مالىمدەمەسىندە اقىننىڭ پوەزياسى ۇلتتىق رۋح پەن ەلدىك مۇراتتاردى بيىك دەڭگەيدە جەتكىزە العانىن اتاپ ءوتتى.
«تەمىرحان مەدەتبەك – ءوز زامانىنىڭ ازاماتتىق ءۇنىن جەتكىزگەن، ۇلتتىق بولمىس پەن تاريحتىڭ جارقىن جىرشىسى بولا بىلگەن ۇلكەن جۇرەكتى اقىن. ونىڭ وتتى ءارى اسقاق جىرلارى كوك تۇرىكتەر سارىنىن جاڭعىرتىپ، قازاق ادەبيەتىن جاڭا بيىككە كوتەردى»، – دەدى ايدا بالاەۆا.
ۇقساس جاڭالىقتار
