ازەربايجان اقتاۋ قالاسىندا اپاتقا ۇشىراعان «AZAL» اۋە كومپانياسىنا تيەسىلى ۇشاققا قاتىستى ماسكەۋدەگى تەرگەۋدىڭ اياقتالۋىن كۇتۋدە، دەپ حابارلايدى “ادىرنا” ۇلتتىق پورتالى.
بۇل تۋرالى جۋرناليستەرگە ازەربايجاننىڭ سىرتقى ىستەر ءمينيسترى دجەيحۋن بايراموۆ مالىمدەدى.
ءمينيستردىڭ ايتۋىنشا، رەسەيلىك تاراپپەن بايلانىس ۇزدىكسىز جالعاسىپ جاتىر.
«AZAL ۇشاعىنىڭ اتىپ ءتۇسىرىلۋى ماسەلەسى كۇن تارتىبىنەن تۇسكەن جوق. ءبىز بۇل ماسەلەنى رەسەيمەن بارلىق كەزدەسۋلەردە كوتەرىپ وتىرمىز. رەسەي تاراپىنىڭ ءتۇسىندىرۋى بويىنشا، قازىرگى ۋاقىتتا ەل ىشىندە تەرگەۋ ارەكەتتەرى ءجۇرىپ جاتىر. ولار تەرگەۋ اياقتالعاننان كەيىن تولىق مالىمەت بەرەتىنىن ايتتى. ءبىز، ارينە، بۇل تەرگەۋدىڭ قىسقا مەرزىمدە اياقتالۋىن كۇتىپ وتىرمىز»، – دەدى بايراموۆ.
ەسكە سالا كەتەيىك، 2024 جىلعى 25 جەلتوقساندا ازەربايجاننىڭ «AZAL» اۋە كومپانياسىنا تيەسىلى Embraer 190-100 IGW جولاۋشىلار ۇشاعى باكۋدەن گروزنىيعا باعىت العان رەيس كەزىندە قازاقستان رەسپۋبليكاسى اۋماعىندا، اقتاۋ اۋەجايى ماڭىندا اپاتقا ۇشىرادى. ۇشاق بورتىندا بولعان 67 ادامنىڭ 38-ءى قازا تاۋىپ، 29-ى امان قالدى. الدىن الا دەرەكتەر بويىنشا، ۇشاق رەسەيدىڭ اۋە كەڭىستىگىندە فيزيكالىق جانە تەحنيكالىق تۇرعىدا سىرتتان اسەر ەتۋ سالدارىنان قۇلاعان.
ايتا كەتەيىك، ازەربايجان پرەزيدەنتى يلحام اليەۆ ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا ارنالعان ماسكەۋدەگى سالتاناتتى ءىس-شارالارعا قاتىسپادى. ول قاتىسپاۋ سەبەبىن اكەسى گەيدار اليەۆكە ارنالعان ىشكى ءىس-شارالارعا قاتىسۋى قاجەت ەكەندىگىمەن تۇسىندىرگەن.
