ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى نارتاي سارسەنعاليەۆ الەۋمەتتىك قىزمەتكەرلەردىڭ جالاقىسى تومەن ەكەنىن ايتتى، دەپ حابارلايدى «ادىرنا» ءتىلشىسى.
دەپۋتات بۇل ماسەلەنى قىركۇيەك ايىندا دا كوتەرگەنىن ەسكە سالدى. الايدا سول كەزدە ۇكىمەتتەن كەلگەن جاۋاپ كوڭىل كونشىتپەگەن. جاۋاپ حاتتا الەۋمەتتىك قىزمەتكەرلەردىڭ جالاقىسى سوڭعى جىلدارى ەكى ەسەگە ارتقانى، 2021 جىلى 40 پايىزعا وسكەنى كورسەتىلگەن.
«جاۋاپتىڭ ءبىر بۇرىشىندا جالاقىلارى 3 جىلدا 2 ەسە ءوستى دەيدى، ەندى ءبىر بەتىندە 2021 جىلى 40 پايىزعا ايلىقتارى ارتتى دەپ جازىلعان، تاعى ءبىر تۇسىندا سوڭعى 4 جىلدا جالاقىلارى 2 ەسە ءوستى دەلىنگەن. قاعازدا قاتىپ تۇر. بىراق سول جالاقىنى بالالارى تاستاپ كەتكەن قاريالارعا قارايتىن الەۋمەتتىك قىزمەت كورسەتۋ ورتالىقتارىنداعى ماماندار مەن ەرەكشە بالالاردى ەمدەۋمەن، ولاردى اياققا تۇرعىزۋمەن شۇعىلداناتىن مەكەمەلەردىڭ قىزمەتكەرلەرى كوردى مە ەكەن؟ ولارعا ايتىلعانداي ايلىق بەردى مە ەكەن؟ سەبەبى بۇل – ەلىمىزدەگى 500-دەن استام الەۋمەتتىك قىزمەت كورسەتۋ ورتالىعىنداعى 10 مىڭنان اسا الەۋمەتتىك قىزمەتكەردىڭ جانايقايى».-دەدى ول.
ايتۋىنشا، ءماجىلىستىڭ الەۋمەتتىك-مادەني دامۋ كوميتەتى استاناداعى «شاراپات» جانە «جانسايا» الەۋمەتتىك قىزمەت كورسەتۋ ورتالىقتارىنا ارنايى بارىپ، ناقتى احۋالدى كورگەن.
«ەرەكشە بالالارمەن جۇمىس ىستەيتىن، ولاردى ەمدەيتىن، جاتتىقتىراتىن، كۇن سايىن جۇزدەگەن بالانى ارنايى مەكەمەدە، كەيبىرىن ۇيىنە بارىپ وقىتاتىن الەۋمەتتىك قىزمەتكەرلەردىڭ ورتاشا جالاقىسى 180 مىڭ تەڭگە ەكەن. سالدارىنان سوڭعى 1 جارىم جىلدا 1 ورتالىقتاعى 110 قىزمەتكەر جۇمىستان كەتكەن، قازىر 50 شتات بوس تۇر. جارىتپايتىن جالاقىعا ەشكىمنىڭ كەلگىسى جوق. ال قامكوڭىل قاريالاردىڭ جاعدايىن جاسايتىن الەۋمەتتىك قىزمەتكەرلەردىڭ جالاقىسى 110 مىڭ تەڭگە. سالدارىنان ول جاققا ەشكىم جۇمىسقا بارمايدى. بۇل تەك استاناداعى ەمەس، ەلىمىزدەگى بارلىق الەۋمەتتىك قىزمەت كورسەتۋ ورتالىقتارىنا ءتان جاعداي ەكەنىن ەسكە سالامىن»،- دەپ ءتۇسىندىردى دەپۋتات.
ماسەلەنى شەشۋ ءۇشىن ۇكىمەتتىڭ 1193 بۇيرىعىنا وزگەرىس ەنگىزۋ قاجەت ەكەنىن ايتقان دەپۋتات قازىرگى جاۋاپتاردا ناقتى قادام جوق ەكەنىن سىنعا الدى. وسىعان بايلانىستى ول الەۋمەتتىك قىزمەتكەرلەردىڭ ءال-اۋقاتىن جاقسارتۋعا باعىتتالعان بىرقاتار ۇسىنىس جولدادى.
« 1. ۇكىمەتتىڭ 1193 بۇيرىعىن وزگەرتىپ كۇتىم جونىندەگى الەۋمەتتىك قىزمەتكەرلەردىڭ، الەۋمەتتىك جۇمىس جونىندەگى كونسۋلتانتتاردىڭ، ورتا مەديتسينا قىزمەتكەرلەرىنىڭ (ەدش نۇسقاۋشىسى، ماسساجيست) (جالپى الەۋمەتتىك قورعاۋ جۇيەسى قىزمەتكەرلەرىنىڭ) جالاقىسىن كوتەرۋ كەرەك.
2. الەۋمەتتىك قىزمەتكەرلەردىڭ جالاقىسىن كوتەرۋ ءۇشىن الەۋمەتتىك قىزمەت كورسەتۋ ورتالىقتارىن شارۋاشىلىق جۇرگىزۋ قۇقىعىنداعى مەملەكەتتىك كوممۋنالدىق كاسىپورىن ەتىپ قايتا قۇرۋ ماسەلەسىن قاراستىرۋ كەرەك.
3. الەۋمەتتىك قىزمەت كورسەتۋ ورتالىقتارىنا قوسىمشا اقىلى تۇردە قىزمەت كورسەتۋگە مۇمكىندىك بەرۋ قاجەت. مىسالى استاناداعى «شاراپات» الەۋمەتتىك قىزمەت كورسەتۋ ورتالىعىندا60 قاريا اقىلى تۇردە تۇرادى، بالا-شاعاسى ايىنا 106 000 تەڭگەدەن تولەيدى. بىراق بۇل اقشانى ورتالىق قىزمەتكەرلەردىڭ جالاقىسىنا جۇمساي المايدى. سوندىقتان قاريالاردى اقىلى كۇتۋدەن تۇسكەن قاراجاتتى قىزمەتكەرلەردىڭ جالاقىسىن جۇمساۋعا مۇمكىندىك بەرۋ كەرەك.
4. «كۇتىم جونىندەگى الەۋمەتتىك قىزمەتكەر» دەگەن لاۋازىمدىق اتاۋدى «الەۋمەتتىك قىزمەتكەر» اتاۋىنا اۋىستىرۋ قاجەت. بۇل مامانداردىڭ تالابى»،- دەدى سارسەنعاليەۆ.
