Mäjılıs deputaty, «AMANAT» partiiasy fraksiiasynyŋ müşesı Nartai Särsenǧaliev äleumettık qyzmetkerlerdıŋ jalaqysy tömen ekenın aitty, dep habarlaidy «Adyrna» tılşısı.
Deputat būl mäselenı qyrküiek aiynda da kötergenın eske saldy. Alaida sol kezde Ükımetten kelgen jauap köŋıl könşıtpegen. Jauap hatta äleumettık qyzmetkerlerdıŋ jalaqysy soŋǧy jyldary ekı esege artqany, 2021 jyly 40 paiyzǧa öskenı körsetılgen.
«Jauaptyŋ bır būryşynda jalaqylary 3 jylda 2 ese östı deidı, endı bır betınde 2021 jyly 40 paiyzǧa ailyqtary artty dep jazylǧan, taǧy bır tūsynda soŋǧy 4 jylda jalaqylary 2 ese östı delıngen. Qaǧazda qatyp tūr. Bıraq sol jalaqyny balalary tastap ketken qariialarǧa qaraityn äleumettık qyzmet körsetu ortalyqtaryndaǧy mamandar men erekşe balalardy emdeumen, olardy aiaqqa tūrǧyzumen şūǧyldanatyn mekemelerdıŋ qyzmetkerlerı kördı me eken? Olarǧa aitylǧandai ailyq berdı me eken? Sebebı būl – elımızdegı 500-den astam äleumettık qyzmet körsetu ortalyǧyndaǧy 10 myŋnan asa äleumettık qyzmetkerdıŋ janaiqaiy».-dedı ol.
Aituynşa, Mäjılıstıŋ äleumettık-mädeni damu komitetı Astanadaǧy «Şarapat» jäne «Jansaia» äleumettık qyzmet körsetu ortalyqtaryna arnaiy baryp, naqty ahualdy körgen.
«Erekşe balalarmen jūmys ısteitın, olardy emdeitın, jattyqtyratyn, kün saiyn jüzdegen balany arnaiy mekemede, keibırın üiıne baryp oqytatyn äleumettık qyzmetkerlerdıŋ ortaşa jalaqysy 180 myŋ teŋge eken. Saldarynan soŋǧy 1 jarym jylda 1 ortalyqtaǧy 110 qyzmetker jūmystan ketken, qazır 50 ştat bos tūr. Jarytpaityn jalaqyǧa eşkımnıŋ kelgısı joq. Al qamköŋıl qariialardyŋ jaǧdaiyn jasaityn äleumettık qyzmetkerlerdıŋ jalaqysy 110 myŋ teŋge. Saldarynan ol jaqqa eşkım jūmysqa barmaidy. Būl tek Astanadaǧy emes, elımızdegı barlyq äleumettık qyzmet körsetu ortalyqtaryna tän jaǧdai ekenın eske salamyn»,- dep tüsındırdı deputat.
Mäselenı şeşu üşın Ükımettıŋ 1193 būiryǧyna özgerıs engızu qajet ekenın aitqan deputat qazırgı jauaptarda naqty qadam joq ekenın synǧa aldy. Osyǧan bailanysty ol äleumettık qyzmetkerlerdıŋ äl-auqatyn jaqsartuǧa baǧyttalǧan bırqatar ūsynys joldady.
« 1. Ükımettıŋ 1193 būiryǧyn özgertıp Kütım jönındegı äleumettık qyzmetkerlerdıŋ, äleumettık jūmys jönındegı konsultanttardyŋ, orta medisina qyzmetkerlerınıŋ (EDŞ nūsqauşysy, massajist) (jalpy äleumettık qorǧau jüiesı qyzmetkerlerınıŋ) jalaqysyn köteru kerek.
2. Äleumettık qyzmetkerlerdıŋ jalaqysyn köteru üşın äleumettık qyzmet körsetu ortalyqtaryn şaruaşylyq jürgızu qūqyǧyndaǧy memlekettık kommunaldyq käsıporyn etıp qaita qūru mäselesın qarastyru kerek.
3. Äleumettık qyzmet körsetu ortalyqtaryna qosymşa aqyly türde qyzmet körsetuge mümkındık beru qajet. Mysaly Astanadaǧy «Şarapat» äleumettık qyzmet körsetu ortalyǧynda60 qariia aqyly türde tūrady, bala-şaǧasy aiyna 106 000 teŋgeden töleidı. Bıraq būl aqşany ortalyq qyzmetkerlerdıŋ jalaqysyna jūmsai almaidy. Sondyqtan qariialardy aqyly kütuden tüsken qarajatty qyzmetkerlerdıŋ jalaqysyn jūmsauǧa mümkındık beru kerek.
4. «Kütım jönındegı äleumettık qyzmetker» degen lauazymdyq ataudy «Äleumettık qyzmetker» atauyna auystyru qajet. Būl mamandardyŋ talaby»,- dedı Särsenǧaliev.
