Bügın bırneşe jyldan berı jyr bolyp kele jatqan util alymnyŋ mäselesı Mäjılıs mınberınde köterıldı. Bıraq Mäjılıs deputaty Nartai Aralbaiūlynyŋ sūraǧyna Önerkäsıp jäne qūrylys ministrı Qanat Şarlapaev jauap bermei qoidy.
MEN NE DEIMIN, DOMBYRAM NE DEIDI?
Deputat Nartai Aralbaiūlynyŋ aituynşa, utilalym men alǧaşqy tırkeudıŋ mäselesı jüzdegen myŋ azamatty alaŋdatyp, onyŋ şeşıluın talap etıp otyr. Äitse de ol būl preblemanyŋ şeşıluıne Önerkäsıp jäne qūrylys ministrılıgı kedergı keltırıp otyrǧanyn eskerttı. – Būl jönınde deputattyq saual joldap, keiın bırneşe deputattarmen bırge döŋgelek üstel ötkızdık. Sol jiynda qarjy, ekologiia, auyl şaruaşylyǧy, Ūlttyq ekonomika jäne ışkı ıster ministrlıgı ökılınıŋ bärı tölemderdıŋ azaiuuyna qarsy emes ekenın aitty. Özıŋız basqaratyn Önerkäsıp jäne qūrylys ministrılıktıŋ komitet töraǧasy «Būl tölemder qajet, sondyqtan da ol saqtaluy kerek» dep qaldy. Odan keiın men «Naqty qandai sebeptermen saqtalu kerek ekenın resmi türde aityŋyzdar» dep 7 kün uaqyt berdım. Ötken seisenbı künı ol uaqyt öttı. Sızdıŋ ministrlıkten bır de bır hat, resmi jauap alǧan joqpyz. Tölemderdıŋ tömendeuıne nege qarsysyzdar, onyŋ qandai negızdemelerı bar, nege jauap beruden bas tartyp otyrsyzdar jäne halyqqa aşyq tüsındıretın dialog nege jürgızılmeidı, – dedı deputat. Bır qyzyǧy Qanat Bisimbaiūly Mäjılıs deputatynyŋ sūraǧy bügıngı taqyrypqa eşqandai qatysy joq ekenın aityp, jauap beruden jaltardy. – Men sızge naqty jauap beremın, bıraq menıŋ aitqanym boiynşa, sızdıŋ sūraǧyŋyz bügıngı taqyrypqa eşqandai qatysy joq. Sızben jeke kezdesıp, jauap beremız, – dedı ol.«KÄSIPORYNDY SAQTAU ÜŞIN BAǦANY TÜSIRMEU KEREK»
Mäjılıstıŋ jalpy otyrysynan keiın jurnalister Qanat Şarlapaev jauap bergısı kelmegen sūraqty qaita qoidy. «Mäjılıs deputaty Nartai Aralbaiūly util alymnyŋ baǧasyna Önerkäsıp jäne qūrylys ministrlıgı ǧana qarsy bolyp otyrǧanyn aitady. Util alymnyŋ baǧasyn tüsıruge nege qarsy bolyp otyrsyzdar?» – Qazırgı taŋda util alym boiynşa eşqandai özgerıs jasamaimyz. Men Önerkäsıp jäne qūrylys ministrımın. Menıŋ eŋ basty jūmysym käsıporyndardy damytyp, onyŋ quattylyǧyn artyru. Qazırgı taŋda Qazaqstanda ekı avtokölık şyǧaratyn zauyt salyp jatyrmyz. Atalǧan avtokölık öndırıs salasynda qanşama adam jūmys ısteidı. Ony eşkım esepke alyp otyrǧan joq. Bır zauyt 2025 jyldyŋ ortasynda aiaqtalady, ekınşı zauytta jylyna 90 myŋ kölık öndırıledı. Zauytta eŋbek etetın azamattardyŋ jūmys oryndaryn kım saqtaidy? Men deputattarǧa osy sūraqty qoidym jäne taǧy da qoiamyn. Türkiia sekıldı basqa elderde maşinanyŋ baǧasy bızben salystyrǧanda joǧary nemese teŋ boluy mümkın. Sondyqtan da bız özımızdıŋ käsıporyndy, özımızdıŋ azamattardyŋ jūmys ornyn saqtau üşın baǧany tüsırmeuımız kerek, – dedı ministr. Ekı jyl būryn Prezident Toqaev «şekten şyqpai» util alym qaita qaralatynyn aitqan. Biylǧy nauryz aiynyŋ basynda bır top adam ministrlıkke arnaiy «util alym alynsyn» degen talappen jügıngen bolatyn.Şynar Aqjanqyzy
Ūqsas jaŋalyqtar
