بۇگىن بىرنەشە جىلدان بەرى جىر بولىپ كەلە جاتقان ۋتيل الىمنىڭ ماسەلەسى ءماجىلىس مىنبەرىندە كوتەرىلدى. بىراق ءماجىلىس دەپۋتاتى نارتاي ارالبايۇلىنىڭ سۇراعىنا ونەركاسىپ جانە قۇرىلىس ءمينيسترى قانات شارلاپاەۆ جاۋاپ بەرمەي قويدى.
مەن نە دەيمىن، دومبىرام نە دەيدى؟
دەپۋتات نارتاي ارالبايۇلىنىڭ ايتۋىنشا، ۋتيلالىم مەن العاشقى تىركەۋدىڭ ماسەلەسى جۇزدەگەن مىڭ ازاماتتى الاڭداتىپ، ونىڭ شەشىلۋىن تالاپ ەتىپ وتىر. ايتسە دە ول بۇل پرەبلەمانىڭ شەشىلۋىنە ونەركاسىپ جانە قۇرىلىس مينيسترىلىگى كەدەرگى كەلتىرىپ وتىرعانىن ەسكەرتتى.
– بۇل جونىندە دەپۋتاتتىق ساۋال جولداپ، كەيىن بىرنەشە دەپۋتاتتارمەن بىرگە دوڭگەلەك ۇستەل وتكىزدىك. سول جيىندا قارجى، ەكولوگيا، اۋىل شارۋاشىلىعى، ۇلتتىق ەكونوميكا جانە ىشكى ىستەر مينيسترلىگى وكىلىنىڭ ءبارى تولەمدەردىڭ ازايۋىنا قارسى ەمەس ەكەنىن ايتتى. ءوزىڭىز باسقاراتىن ونەركاسىپ جانە قۇرىلىس مينيسترىلىكتىڭ كوميتەت توراعاسى «بۇل تولەمدەر قاجەت، سوندىقتان دا ول ساقتالۋى كەرەك» دەپ قالدى. ودان كەيىن مەن «ناقتى قانداي سەبەپتەرمەن ساقتالۋ كەرەك ەكەنىن رەسمي تۇردە ايتىڭىزدار» دەپ 7 كۇن ۋاقىت بەردىم. وتكەن سەيسەنبى كۇنى ول ۋاقىت ءوتتى. ءسىزدىڭ مينيسترلىكتەن ءبىر دە ءبىر حات، رەسمي جاۋاپ العان جوقپىز. تولەمدەردىڭ تومەندەۋىنە نەگە قارسىسىزدار، ونىڭ قانداي نەگىزدەمەلەرى بار، نەگە جاۋاپ بەرۋدەن باس تارتىپ وتىرسىزدار جانە حالىققا اشىق تۇسىندىرەتىن ديالوگ نەگە جۇرگىزىلمەيدى، – دەدى دەپۋتات.
ءبىر قىزىعى قانات بيسيمبايۇلى ءماجىلىس دەپۋتاتىنىڭ سۇراعى بۇگىنگى تاقىرىپقا ەشقانداي قاتىسى جوق ەكەنىن ايتىپ، جاۋاپ بەرۋدەن جالتاردى.
– مەن سىزگە ناقتى جاۋاپ بەرەمىن، بىراق مەنىڭ ايتقانىم بويىنشا، ءسىزدىڭ سۇراعىڭىز بۇگىنگى تاقىرىپقا ەشقانداي قاتىسى جوق. سىزبەن جەكە كەزدەسىپ، جاۋاپ بەرەمىز، – دەدى ول.
«كاسىپورىندى ساقتاۋ ءۇشىن باعانى تۇسىرمەۋ كەرەك»
ءماجىلىستىڭ جالپى وتىرىسىنان كەيىن جۋرناليستەر قانات شارلاپاەۆ جاۋاپ بەرگىسى كەلمەگەن سۇراقتى قايتا قويدى. «ءماجىلىس دەپۋتاتى نارتاي ارالبايۇلى ۋتيل الىمنىڭ باعاسىنا ونەركاسىپ جانە قۇرىلىس مينيسترلىگى عانا قارسى بولىپ وتىرعانىن ايتادى. ۋتيل الىمنىڭ باعاسىن تۇسىرۋگە نەگە قارسى بولىپ وتىرسىزدار؟»
– قازىرگى تاڭدا ۋتيل الىم بويىنشا ەشقانداي وزگەرىس جاسامايمىز. مەن ونەركاسىپ جانە قۇرىلىس ءمينيسترىمىن. مەنىڭ ەڭ باستى جۇمىسىم كاسىپورىنداردى دامىتىپ، ونىڭ قۋاتتىلىعىن ارتىرۋ. قازىرگى تاڭدا قازاقستاندا ەكى اۆتوكولىك شىعاراتىن زاۋىت سالىپ جاتىرمىز. اتالعان اۆتوكولىك ءوندىرىس سالاسىندا قانشاما ادام جۇمىس ىستەيدى. ونى ەشكىم ەسەپكە الىپ وتىرعان جوق. ءبىر زاۋىت 2025 جىلدىڭ ورتاسىندا اياقتالادى، ەكىنشى زاۋىتتا جىلىنا 90 مىڭ كولىك وندىرىلەدى. زاۋىتتا ەڭبەك ەتەتىن ازاماتتاردىڭ جۇمىس ورىندارىن كىم ساقتايدى؟ مەن دەپۋتاتتارعا وسى سۇراقتى قويدىم جانە تاعى دا قويامىن. تۇركيا سەكىلدى باسقا ەلدەردە ماشينانىڭ باعاسى بىزبەن سالىستىرعاندا جوعارى نەمەسە تەڭ بولۋى مۇمكىن. سوندىقتان دا ءبىز ءوزىمىزدىڭ كاسىپورىندى، ءوزىمىزدىڭ ازاماتتاردىڭ جۇمىس ورنىن ساقتاۋ ءۇشىن باعانى تۇسىرمەۋىمىز كەرەك، – دەدى مينيستر.
ەكى جىل بۇرىن پرەزيدەنت توقاەۆ «شەكتەن شىقپاي» ۋتيل الىم قايتا قارالاتىنىن ايتقان. بيىلعى ناۋرىز ايىنىڭ باسىندا ءبىر توپ ادام مينيسترلىككە ارنايى «ۋتيل الىم الىنسىن» دەگەن تالاپپەن جۇگىنگەن بولاتىن.
شىنار اقجانقىزى
