قازاقستان ۇكىمەتى «2026–2028 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنا سايكەس 2026 جىلدىڭ 1 قاڭتارىنان باستاپ ايلىق ەسەپتىك كورسەتكىش (اەك) 4 325 تەڭگە بولىپ بەكىتىلەدى، بۇل قازىرگى 3 932 تەڭگەدەن 10%-عا ارتىق، دەپ حابارلايدى "ادىرنا" ۇلتتىق پورتالى.
وسىعان بايلانىستى جۇرگىزۋشىلەرگە سالىناتىن ايىپپۇلدار، ۋتيل الىمى، اۆتوكولىكتى تىركەۋ تولەمدەرى مەن ساقتاندىرۋ قۇنى قىمباتتايدى.
ماسەلەن، جىلدامدىقتى 10–20 كم/ساع اسىرعان، قاۋىپسىزدىك بەلدىگىن تاقپاعان نەمەسە توقتاۋ ەرەجەسىن بۇزعاندارعا سالىناتىن 5 اەك ايىپپۇل 21 625 تەڭگەگە جەتەدى (قازىر 19 660 تەڭگە).
باعدارشامنىڭ قىزىل تۇسىنە وتكەن نەمەسە مۇمكىندىگى شەكتەۋلى ادامدارعا ارنالعان ورىنعا كولىگىن قويعان جۇرگىزۋشى 10 اەك ايىپپۇل تولەيدى، ياعني 43 250 تەڭگە.
ال جۇرگىزۋشى كۋالىگىنسىز رولگە وتىرعان نەمەسە جول اپاتى ورنىنان كەتىپ قالعان ازاماتتارعا سالىناتىن ايىپپۇل 50 اەك بولادى، بۇل 196 600 تەڭگەدەن 216 250 تەڭگەگە وسەدى.
ۋتيل الىمى دا قىمباتتايدى. بازالىق مولشەرلەمە 50 اەك بولىپ، 216 250 تەڭگەنى قۇرايدى. وسىعان سايكەس قوزعالتقىش كولەمى 1000 تەكشە سم-گە دەيىنگى جەڭىل ءاۆتوموبيلدى ەلگە كىرگىزۋ ءۇشىن 324 375 تەڭگە، 1001–2000 سم³ كولەمدى كولىك ءۇشىن 756 875 تەڭگە، 2001–3000 سم³ قوزعالتقىشى بار ماشينا ءۇشىن 1 081 250 تەڭگە، ال 3 ليتردەن جوعارى اۆتوموبيل ءۇشىن 2 486 875 تەڭگە تولەۋ كەرەك بولادى.
ەلەكتروموبيل اكەلگەندەر ۋتيل الىمىنان بوساتىلادى.
سونىمەن قاتار، اۆتوكولىكتى تىركەۋ قۇنى دا وسەدى. العاش تىركەۋ كەزىندە ەڭ تومەنگى تولەم 983 تەڭگەدەن 1 081 تەڭگەگە كوتەرىلسە، شىققانىنا 3 جىل تولماعان كولىك ءۇشىن تولەم 216 250 تەڭگەنى قۇرايدى، ال 3 جىلدان اسقان كولىكتى العاش تىركەۋ قۇنى 1 966 000 تەڭگەدەن 2 162 500 تەڭگەگە وسەدى.
بۇعان قوسا، ساقتاندىرۋ ءپوليسىنىڭ باعاسى دا وزگەرەدى، سەبەبى ونىڭ مولشەرى اەك-پەن ەسەپتەلەدى، ال بازالىق ساقتاندىرۋ سىياقىسى 1,9 اەك بولادى. قارجى نارىعىن رەتتەۋشىلەر جۇرگىزۋشىلەردىڭ ساقتاندىرۋ كلاسىنداعى كوەففيتسيەنتتى قايتا قاراستىرۋدى جوسپارلاپ وتىر، سوندىقتان پوليس باعاسى الداعى جىلى ايتارلىقتاي وزگەرمەك.
