قازاقستان رەسەيدەن اكەلىنەتىن اۆتوكولىكتەرگە ۋتيليزاتسيالىق الىمدى ارتتىرۋدى جوسپارلاپ وتىر. بۇل تۋرالى ونەركاسىپ جانە قۇرىلىس ءمينيسترى ەرسايىن ناعاسپاەۆ مالىمدەدى، دەپ حابارلايدى «ادىرنا» ءتىلشىسى.
جۋرناليستەر سوڭعى كۇندەرى ەكولوگيا مينيسترلىگىنىڭ اشىق نورماتيۆتىك-قۇقىقتىق اكتىلەر الاڭىندا رەسەيلىك اۆتوكولىكتەرگە ارنالعان ۋتيليزاتسيالىق الىمدى ونداعان ەسە كوبەيتۋگە ۇسىنىس جاسالعانىن ايتىپ، بۇل ماسەلەگە مينيسترلىكتىڭ كوزقاراسىن سۇرادى.
«بۇيرىققا ءالى قول قويىلمادى. ءبىز رەسەي نارىعىنا قاتىستى ەشقانداي جاڭا تالاپ ەنگىزىپ جاتقان جوقپىز، تەك جاعدايدى اينا-قاتەسىز قايتالاپ وتىرمىز. ەكى ەل نارىعىندا تەڭ مۇمكىندىك بولۋى كەرەك. رەسەي ءبىزدىڭ اۆتوكولىكتەرگە ۋتيلالىمدى بىرنەشە ەسە، ءتىپتى ونداعان ەسە كوتەردى. ونىڭ ۇستىنە ول جاقتا 2029–2030 جىلدارعا دەيىن پروگرەسسيۆتى شكالا ەنگىزىلگەن»،-دەپ ءتۇسىندىردى مينيستر.
ونىڭ ايتۋىنشا، 2029–2030 جىلعا دەيىن ۋتيليزاتسيالىق الىم سوماسى شىن مانىندە شەكتەن تىس بولادى. سونداي-اق ناعاسپاەۆ بۇل شەشىمنىڭ وتاندىق اۆتوكولىك ءوندىرىسىن دامىتۋ ءۇشىن قابىلدانعانىن اتاپ ءوتتى.
مينيستر بۇيرىق بەكىتىلگەننەن كەيىن اۆتوكولىكتەردىڭ باعاسى كۇرت قىمباتتامايدى دەپ سەنىم ءبىلدىردى.
«قازاقستانعا رەسەي فەدەراتسياسىنان سونشالىقتى كوپ اۆتوكولىكتەر كىرمەيدى، سوندىقتان اۆتوكولىكتەر باعاسىنىڭ كۇرت ءوسۋى بولمايدى»، – دەدى ول.
