ەلىمىزدىڭ التى وڭىرىندە سۋتەنەرلەر مەن جەزوكشەلەر Art Sport باعدارلاماسى بويىنشا جاتتىقتىرۋشى بولىپ جۇمىس ىستەگەن. بۇل تۋرالى دەپۋتات نارتاي ارالبايۇلى ايتتى، دەپ حابارلايدى «ادىرنا» ءتىلشىسى.
«Art Sport جۇزەگە اسقان 6 ايماقتا بۇرىن جىنىستىق قىلمىس جاساعانى ءۇشىن سوتتىلىعى بار، پريتون ۇيىمداستىرعان جانە جەزوكشەلىك جاساعان ادامداردىڭ بالالاردى وقىتۋىنىڭ 20 فاكتىسى تىركەلگەن. بۇل قالاي سوندا؟ بۇرىنعى جەزوكشەگە، بۇرىنعى پريتون ۇيىمداستىرعان ادامعا ءبىز قالاي بالالارىمىزدى سەنىپ تاپسىرىپ وتىرمىز؟ قۇزىرلى ورگاندار قايدا قاراعان؟ پسيحولوگتار وسى ادامدار جاتتىقتىرعان بالالارمەن جۇمىس ىستەدى مە؟ بالالارعا بۇرىنعى جەزوكشەلەر مەن قىلمىسكەرلەر جاتتىقتىرعانىن قالاي ءتۇسىندىرۋىمىز كەرەك؟ 6 ءوڭىر دەپ ايتتىڭىزدار. وسى تۇرعىدان باس پروكۋراتۋرانىڭ وكىلىنەن ناقتى قاي وڭىرلەر دەپ سۇراعىم كەلەدى. بىلەيىك، جاسىراتىن دۇنيە ەمەس،—دەدى ول ءماجىلىس وتىرىسىندا.دەپۋتاتتىڭ ساۋالدارىنا باس پروكۋراتۋرانىڭ قوعامدىق مۇددەلەردى قورعاۋ قىزمەتىنىڭ اعا پروكۋرورى دۋلات اشىربەكوۆ جاۋاپ بەردى. ايتۋىنشا، بۇل فاكتىلەر الماتى، شىمكەنت، قاراعاندى، ماڭعىستاۋ، باتىس قازاقستان جانە شىعىس قازاقستان وبلىستارىندا تىركەلگەن.
«باسقا ايماقتار بويىنشا قوسىمشا جاۋاپ بەرەمىز. ولار دەنەشىنىقتىرۋ جاتتىقتىرۋشىلارى بولىپ قىزمەت اتقاردى»،—دەدى اعا پروكۋرور.
