قازاقستاندا ArtSport پلاتفورماسى 2026 جىلدىڭ 1 قاڭتارىنان باستاپ جابىلادى، دەپ حابارلايدى "ادىرنا" ۇلتتىق پورتالى.
بۇل تۋرالى پلاتفورما يەسى جانە جاساۋشىسى «SoftDeCo» جشس 28 قاراشادا حابارلاعان.
كومپانيا مالىمەتىنشە، اقپاراتتىق جۇيە قىزمەتتەرى توقتاتىلادى جانە جوبانى ءارى قاراي دامىتۋ ەكونوميكالىق تۇرعىدان ءتيىمدى بولماعاندىقتان جوبا تولىق جابىلادى. پايدالانۋشىلاردان قۇرىلعىلارىندا بارلىق قاجەتتى دەرەكتەردى ساقتاپ قالۋ سۇرالادى.
ءووۋ-اعارتۋ مينيسترلىگى بۇل پلاتفورمانىڭ جەكە ەكەنىن اتاپ ءوتىپ، رەسپۋبليكا بويىنشا ءار وڭىردە مەملەكەتتىك سپورتتىق جانە شىعارماشىلىق تاپسىرىسقا ارنالعان ءوز پلاتفورمالارى بارىن حابارلادى.
ۆەدومستۆونىڭ ايتۋىنشا، مەملەكەتتىك تاپسىرىستى جۇزەگە اسىراتىن پلاتفورمالاردى تاڭداۋ جەرگىلىكتى اتقارۋشى ورگاندار ارقىلى جىل سايىن زاڭناماعا سايكەس جۇزەگە اسىرىلادى.
ايتا كەتەيىك، مەملەكەتتەن قارجىلاندىرۋ ارقىلى بۇقارالىق بالالار سپورتى مەن شىعارماشىلىعىن دامىتۋعا ارنالعان «Artsport» جوباسى شەڭبەرىندە انىقتالعان سىبايلاس جەمقورلىق سحەمالارى قوعامدا ۇلكەن رەزونانس تۋدىرعان ەدى.
ءتيىستى ورگان مالىمەتىنشە، جوبا بويىنشا جان باسىنا شاققانداعى قارجىلاندىرۋعا شامامەن 2021-2022 جىلدارعا 43 ملرد تەڭگە بولىنگەن. باعدارلامانى ىسكە اسىرۋدىڭ قىسقا مەرزىمى ىشىندە 11 ادامعا قاتىستى 19 قىلمىستىق ءىس تىركەلگەن، ونىڭ ىشىندە 6 ادامنىڭ ءىسى سوتقا بەرىلىپ، 2023 جىلى 4 ادام سوتتالعان.
