ءماجىلىس دەپۋتاتتارى ەڭ تومەنگى جالاقى مولشەرىن 85 مىڭ تەڭگەدەن 110 مىڭ تەڭگەگە دەيىن ارتتىرۋدى ۇسىندى. بۇل تۋرالى پارلامەنتتىڭ الەۋمەتتىك-مادەني دامۋ كوميتەتىنىڭ جاڭا ءۇش جىلدىق بيۋدجەت جوباسىنا بەرگەن قورىتىندىسىندا ايتىلدى، دەپ حابارلايدى «ادىرنا» ءتىلشىسى.
قۇجات سارسەنبى كۇنى دەپۋتاتتاردىڭ قاراۋىندا بولدى. الايدا ۇكىمەت وكىلدەرى 2026 جىلعى بيۋدجەتتە بۇل ماقساتقا قارجى قاراستىرىلماعانىن مالىمدەدى.
«الەۋمەتتىك-مادەني دامۋ كوميتەتى ەڭ تومەنگى جالاقى مولشەرىن 85 مىڭ تەڭگەدەن 110 مىڭ تەڭگەگە دەيىن ارتتىرۋدى قاجەت دەپ سانايدى»، — دەلىنگەن كوميتەت قورىتىندىسىندا.
قارجى ۆيتسە-ءمينيسترى ەرجان ءبىرجانوۆ ءماجىلىس كۋلۋارىندا الداعى ءۇش جىلدىق بيۋدجەت جوباسىن تالقىلاۋ كەزىندە ايتىلعان بۇل ۇسىنىسقا پىكىر ءبىلدىردى. ونىڭ ايتۋىنشا، ۇكىمەت قازىرگى بيۋدجەت جوباسىندا ەڭ تومەنگى جالاقىنى كوتەرۋگە قاجەتتى شىعىنداردى جوسپارلاماعان.
«بۇگىن ماجىلىستە 2026 جىلعى بيۋدجەت قارالىپ جاتىر. ناتيجەسىن دەپۋتاتتاردىڭ داۋىس بەرۋى كورسەتەدى. بىراق قولدانىستاعى بيۋدجەت جوباسىندا ەڭ تومەنگى جالاقىنى كوتەرۋگە ارنالعان قاراجات قاراستىرىلماعان»، — دەدى ەرجان ءبىرجانوۆ.
ايتا كەتەيىك، 2025 جىلى ەڭ تومەنگى جالاقى مولشەرى 85 000 تەڭگە بولىپ بەلگىلەنگەن.
