الماتىنىڭ عىلىمي جانە اكادەميالىق قاۋىمداستىعىنىڭ وكىلدەرى قازاقستان تۇرعىندارىن بەلسەندى ازاماتتىق ۇستانىم تانىتىپ، الداعى قازاقستان رەسپۋبليكاسى قۇرىلتايى دەپۋتاتتارىن سايلاۋعا قاتىسۋعا شاقىردى.
عالىمدار، پروفەسسورلار، اكادەميكتەر، عىلىم دوكتورلارى، سونداي-اق الماتىنىڭ جەتەكشى جوعارى وقۋ ورىندارى، عىلىمي جانە ءبىلىم بەرۋ ۇيىمدارىنىڭ وكىلدەرى سايلاۋعا قاتىسۋ – ازاماتتاردىڭ كونستيتۋتسيالىق قۇقىعى عانا ەمەس، سونىمەن قاتار ەلدىڭ ودان ءارى دامۋىنا قاتىستى ءوز ۇستانىمىن ءبىلدىرۋ مۇمكىندىگى ەكەنىن اتاپ ءوتتى. ولاردىڭ پىكىرىنشە، قازاقستاننىڭ بولاشاعىنا دەگەن جاۋاپكەرشىلىك بارلىق بۋىنعا، كاسىبي جانە الەۋمەتتىك توپتارعا ورتاق.
اباي اتىنداعى قازۇپۋ-دىڭ ساياساتتانۋ جانە الەۋمەتتانۋ كافەدراسىنىڭ مەڭگەرۋشىسى، ساياسي عىلىمدار دوكتورى، پروفەسسور جومارت سيمتيكوۆ ازاماتتاردىڭ سايلاۋعا سانالى تۇردە قاتىسۋى قوعامنىڭ كەمەلدەنۋىنىڭ ماڭىزدى كورسەتكىشتەرىنىڭ ءبىرى ەكەنىن اتاپ ءوتتى.
«كەمەل ازاماتتىق قوعام ءار ادامنىڭ ەلدە بولىپ جاتقان ۇدەرىستەرگە ءوزىنىڭ جاۋاپكەرشىلىگىن تۇسىنۋىنەن باستالادى. سايلاۋ ازاماتقا ءوز ۇستانىمىن بىلدىرۋگە جانە مەملەكەتتىڭ قوعامدىق-ساياسي ومىرىنە تىكەلەي قاتىسۋعا مۇمكىندىك بەرەدى. جاسى مەن ماماندىعىنا قاراماستان، ءاربىر ادام ءۇشىن سىرتتان باقىلاۋشى بولىپ قالماۋ ماڭىزدى. بۇگىن قابىلداناتىن شەشىمدەر ءبىزدىڭ ورتاق ەرتەڭىمىزدى ايقىندايدى. سوندىقتان مەن قازاقستاندىقتاردى ازاماتتىق جاۋاپكەرشىلىك تانىتىپ، سانالى تاڭداۋ جاساۋعا شاقىرامىن»، – دەدى جومارت سيمتيكوۆ.
عىلىمي قاۋىمداستىق وكىلدەرى داۋىس بەرۋگە بايىپتى ءارى سانالى تۇردە قاراۋدىڭ ماڭىزدىلىعىنا ەرەكشە نازار اۋداردى. اقپارات اعىنى وتە ۇلكەن قازىرگى جاعدايدا ازاماتتاردىڭ كەلىپ تۇسەتىن مالىمەتتەردى سىني تۇرعىدان باعالاۋى، سەنىمدى دەرەككوزدەرگە جۇگىنۋى، كانديداتتاردىڭ ۇستانىمدارىمەن تانىسۋى جانە شەشىمدى ءوز بەتىنشە قابىلداۋى ماڭىزدى.
قازاقستان رەسپۋبليكاسى ۇلتتىق يادرولىق ورتالىعىنىڭ باس ديرەكتورى، پروفەسسور، فيزيكا-ماتەماتيكا عىلىمدارىنىڭ دوكتورى، قازاقستان رەسپۋبليكاسى پرەزيدەنتىنىڭ جانىنداعى قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى ەرلان باتىربەكوۆ بىلىمگە، تالداۋعا جانە ناقتى دەرەكتەرگە سۇيەنە وتىرىپ شەشىم قابىلداۋ قابىلەتى عىلىم ءۇشىن عانا ەمەس، تۇتاستاي قوعام ءۇشىن دە ماڭىزدى ەكەنىن اتاپ ءوتتى.
«عىلىم ءبىزدى بىلىمگە، فاكتىلەرگە جانە وبەكتيۆتى تالداۋعا سۇيەنۋگە ۇيرەتەدى. ەل ءۇشىن ماڭىزدى شەشىمدەر تۋرالى ءسوز بولعاندا دا ءدال وسىنداي ءتاسىل قاجەت. ءبىلىمدى، ويلايتىن جانە بەيجاي قارامايتىن، بولاشاق ءۇشىن جاۋاپكەرشىلىك الۋعا دايىن ازاماتتارسىز مىقتى مەملەكەت قۇرۋ مۇمكىن ەمەس. مەن بارلىق قازاقستاندىقتاردى ەلدە بولىپ جاتقان ۇدەرىستەرگە قىزىعۋشىلىق تانىتۋعا، اقپاراتتى سارالاۋعا، ءوز ۇستانىمىن قالىپتاستىرۋعا جانە داۋىس بەرۋ قۇقىعىن پايدالانۋعا شاقىرامىن»، – دەدى ەرلان باتىربەكوۆ.
عالىمداردىڭ پىكىرىنشە، ازاماتتىق جاۋاپكەرشىلىك ادامنىڭ كاسىبي قىزمەتىمەن عانا شەكتەلمەيدى. ول قوعامعا دەگەن قارىم-قاتىناستان، زاڭدى ساقتاۋدان، اينالاداعى ادامداردى قۇرمەتتەۋدەن، ەلگە جاناشىرلىقپەن قاراۋدان جانە ونىڭ ودان ءارى دامۋىن ايقىندايتىن ۇدەرىستەرگە قاتىسۋعا دايىن بولۋدان كورىنەدى.
س. د. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ءبىرىنشى پرورەكتورى، قر پرەزيدەنتى جانىنداعى ۇعا اكادەميگى، مەديتسينا عىلىمدارىنىڭ دوكتورى، پروفەسسور ديليارا كايداروۆا كاسىبي جانە ازاماتتىق جاۋاپكەرشىلىكتىڭ ءوزارا بايلانىسىنا نازار اۋداردى.
«مەديتسينا سالاسىندا جاۋاپكەرشىلىكتىڭ باعاسىن ەرەكشە جاقسى تۇسىنەدى: ءاربىر شەشىم جان-جاقتى سارالانىپ، بىلىمگە نەگىزدەلۋى ءتيىس. الايدا ادامنىڭ جاۋاپكەرشىلىگى كاسىبي قىزمەتىمەن عانا اياقتالمايدى. ول ءبىزدىڭ قوعامعا جانە ەلگە دەگەن قارىم-قاتىناسىمىزعا دا قاتىستى. قازاقستاننىڭ بولاشاعى ميلليونداعان ازاماتتىڭ شەشىمىنە بايلانىستى. سوندىقتان شەت قالماي، اقپاراتتى زەردەلەۋ، ءوز ۇستانىمىڭدى دەربەس قالىپتاستىرۋ جانە مەملەكەت ومىرىنە سانالى تۇردە قاتىسۋ ماڭىزدى»، – دەدى ديليارا كايداروۆا.
الماتىنىڭ عىلىمي جانە اكادەميالىق قاۋىمداستىعىنىڭ وكىلدەرى ءبىلىم، سىني ويلاۋ جانە ازاماتتىق جاۋاپكەرشىلىك زاماناۋي قوعام دامۋىنىڭ ماڭىزدى قۇرامداس بولىكتەرى ەكەنىن اتاپ ءوتتى. ازاماتتاردىڭ قوعامدىق-ساياسي ۇدەرىستەرگە قاتىسۋى ديالوگ مادەنيەتىن نىعايتۋعا جانە مەملەكەتتىڭ بولاشاعىنا جاۋاپكەرشىلىكپەن قاراۋدى قالىپتاستىرۋعا ىقپال ەتەدى.
عالىمدار ەل تۇرعىندارىن 23 تامىزدا قازاقستان رەسپۋبليكاسى قۇرىلتايى دەپۋتاتتارىن سايلاۋعا قاتىسىپ، وزدەرىنىڭ داۋىس بەرۋ قۇقىعىن جۇزەگە اسىرۋعا شاقىردى. ولار ەلدىڭ بولاشاعى ازاماتتاردىڭ تىكەلەي قاتىسۋىمەن قالىپتاساتىنىن اتاپ ءوتتى.
