قازاقستان پرەزيدەنتى قاسىم-جومارت توقاەۆتىڭ توراعالىعىمەن وتكەن كولىك-لوگيستيكا سالاسىن دامىتۋ ماسەلەلەرى بويىنشا قاۋىپسىزدىك كەڭەسىنىڭ وتىرىسىندا كولىك ءمينيسترى مارات قاراباەۆقا سوگىس بەرىلدى، دەپ حابارلايدى "ادىرنا" ۇلتتىق پورتالى اقوردا ءباسپاسوز قىزمەتىنە سىلتەمە جاساپ.
«پرەزيدەنت قاسىم-جومارت توقاەۆتىڭ توراعالىعىمەن كولىك-لوگيستيكا سالاسىن دامىتۋ ماسەلەلەرى بويىنشا قازاقستان رەسپۋبليكاسى قاۋىپسىزدىك كەڭەسىنىڭ وتىرىسى ءوتتى. وتىرىس قورىتىندىسى بويىنشا مەملەكەت باسشىسى كولىك سالاسىنداعى كەمشىلىكتەرى ءۇشىن كولىك ءمينيسترى مارات قاراباەۆقا سوگىس جاريالادى»، – دەلىنگەن اقوردا تاراتقان حابارلامادا.
وتىرىستا كولىك ءمينيسترى مارات قاراباەۆ پەن ورتالىق مەملەكەتتىك ورگانداردىڭ بىرقاتار باسشىلارىنىڭ ەسەپتەرى تىڭدالدى.
مەملەكەت باسشىسى كولىك سالاسىنىڭ جالپى جاعدايىن سىنعا الدى. ونىڭ ايتۋىنشا، بۇل سالانى جاڭعىرتۋعا جۇيەلى ماسەلەلەر مەن جوسپارلانعان شارالاردىڭ ورىندالماۋى كەدەرگى كەلتىرۋدە.
پرەزيدەنت جۇك تاسىمالى كەزىندە شەكارادا تۋىندايتىن قيىندىقتاردى، كوپتەگەن وتكىزۋ بەكەتتەرىنىڭ جاعدايىنىڭ ناشارلىعىن جانە ءىرى ترانزيتتىك ينفراقۇرىلىمدىق جوبالاردىڭ جۇزەگە اسىرىلۋ كەستەسىنەن كەشىگۋىن اتاپ ءوتتى.
مەملەكەت باسشىسى ىشكى نارىقتى اۆياوتىنمەن قامتاماسىز ەتۋ قاجەتتىگىن ايتتى. بۇل جۇك تاسىمالى كولەمىن ارتتىرۋعا مۇمكىندىك بەرەدى.
«سونداي-اق، ترانزيتتىك تاسىمال كولەمىن ۇلعايتۋ مىندەتى قويىلدى. بۇل – قازاقستاننىڭ جاھاندىق جەتكىزۋ تىزبەكتەرىنە ەنۋى ارقىلى مۋلتيپليكاتيۆتى اسەرگە قول جەتكىزۋ ءۇشىن قاجەتتى قادامداردىڭ ءبىرى»، – دەپ حابارلادى اقوردا.
وتىرىستىڭ قورىتىندىسى بويىنشا پرەزيدەنت كولىك-لوگيستيكا سالاسىنداعى ماسەلەلەردى شەشۋ ءۇشىن ناقتى ءارى ءتيىمدى شارالار قابىلداۋدى تاپسىردى.
مارات قاراباەۆ 2008 جىلى تاشكەنت اۆتوموبيل-جول ينستيتۋتىن «عيماراتتار مەن قۇرىلىستاردى سالۋ» ماماندىعى بويىنشا بىتىرگەن. 2010 جىلى ۇلىبريتانياداعى ۋوريك ۋنيۆەرسيتەتىندە «وندىرىستىك جۇيەلىك ينجينيرينگ» ماماندىعىن ۇزدىك اياقتاعان. 2015 جىلى م.ح. دۋلاتي اتىنداعى تاراز وڭىرلىك ۋنيۆەرسيتەتىندە «ەكونوميكا» ماماندىعى بويىنشا جوعارى ءبىلىم العان.
ول 2023 جىلدىڭ قاڭتار ايىنان باستاپ قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى بولدى. سول جىلدىڭ 2 قىركۇيەگىندە جاڭادان قۇرىلعان كولىك مينيسترلىگىنىڭ باسشىسى قىزمەتىنە تاعايىندالدى. 2024 جىلعى 6 اقپاندا كولىك ءمينيسترى لاۋازىمىنا قايتا تاعايىندالدى.
ەسكە سالا كەتەيىك، بۇعان دەيىن سۋ تاسقىنى كەزىندە پرەزيدەنت ۋاقىتىلى شارا قابىلداماعانى ءۇشىن پرەمەر-ءمينيستردىڭ ءبىرىنشى ورىنباسارى رومان سكليارعا، سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆكە قاتاڭ سوگىس بەرگەن بولاتىن.
