Qazaqstan Prezidentı Qasym-Jomart Toqaevtyŋ töraǧalyǧymen ötken kölık-logistika salasyn damytu mäselelerı boiynşa qauıpsızdık keŋesınıŋ otyrysynda Kölık ministrı Marat Qarabaevqa sögıs berıldı, dep habarlaidy "Adyrna" ūlttyq portaly Aqorda baspasöz qyzmetıne sılteme jasap.
«Prezident Qasym-Jomart Toqaevtyŋ töraǧalyǧymen kölık-logistika salasyn damytu mäselelerı boiynşa Qazaqstan Respublikasy Qauıpsızdık keŋesınıŋ otyrysy öttı. Otyrys qorytyndysy boiynşa Memleket basşysy kölık salasyndaǧy kemşılıkterı üşın Kölık ministrı Marat Qarabaevqa sögıs jariialady», – delıngen Aqorda taratqan habarlamada.
Otyrysta Kölık ministrı Marat Qarabaev pen ortalyq memlekettık organdardyŋ bırqatar basşylarynyŋ esepterı tyŋdaldy.
Memleket basşysy kölık salasynyŋ jalpy jaǧdaiyn synǧa aldy. Onyŋ aituynşa, būl salany jaŋǧyrtuǧa jüielı mäseleler men josparlanǧan şaralardyŋ oryndalmauy kedergı keltırude.
Prezident jük tasymaly kezınde şekarada tuyndaityn qiyndyqtardy, köptegen ötkızu beketterınıŋ jaǧdaiynyŋ naşarlyǧyn jäne ırı tranzittık infraqūrylymdyq jobalardyŋ jüzege asyrylu kestesınen keşıguın atap öttı.
Memleket basşysy ışkı naryqty aviaotynmen qamtamasyz etu qajettıgın aitty. Būl jük tasymaly kölemın arttyruǧa mümkındık beredı.
«Sondai-aq, tranzittık tasymal kölemın ūlǧaitu mındetı qoiyldy. Būl – Qazaqstannyŋ jahandyq jetkızu tızbekterıne enuı arqyly multiplikativtı äserge qol jetkızu üşın qajettı qadamdardyŋ bırı», – dep habarlady Aqorda.
Otyrystyŋ qorytyndysy boiynşa Prezident kölık-logistika salasyndaǧy mäselelerdı şeşu üşın naqty ärı tiımdı şaralar qabyldaudy tapsyrdy.
Marat Qarabaev 2008 jyly Taşkent avtomobil-jol institutyn «Ǧimarattar men qūrylystardy salu» mamandyǧy boiynşa bıtırgen. 2010 jyly Ūlybritaniiadaǧy Uorik universitetınde «Öndırıstık jüielık injiniring» mamandyǧyn üzdık aiaqtaǧan. 2015 jyly M.H. Dulati atyndaǧy Taraz öŋırlık universitetınde «Ekonomika» mamandyǧy boiynşa joǧary bılım alǧan.
Ol 2023 jyldyŋ qaŋtar aiynan bastap Qazaqstan Respublikasynyŋ İndustriia jäne infraqūrylymdyq damu ministrı boldy. Sol jyldyŋ 2 qyrküiegınde jaŋadan qūrylǧan Kölık ministrlıgınıŋ basşysy qyzmetıne taǧaiyndaldy. 2024 jylǧy 6 aqpanda Kölık ministrı lauazymyna qaita taǧaiyndaldy.
Eske sala keteiık, būǧan deiın su tasqyny kezınde Prezident uaqytyly şara qabyldamaǧany üşın Premer-Ministrdıŋ bırınşı orynbasary Roman Skliarǧa, Su resurstary jäne irrigasiia ministrı Nūrjan Nūrjıgıtovke qataŋ sögıs bergen bolatyn.
