اقمولا وبلىسىندا قۇقىقتىق احۋال تۋرالى حالىقتى اشىق اقپاراتتاندىرۋ، قابىلدانىپ جاتقان شارالاردى جانە زاماناۋي تەحنولوگيالاردىڭ تيىمدىلىگىن ءتۇسىندىرۋ – باستى ماقسات.
بيىلعى جىلدىڭ باسىنان بەرى تىركەلگەن وتىنىشتەر مەن ارىزدار سانىنىڭ ارتۋىنا قاراماستان، كەيبىر اۋدانداردا قىلمىس سانى كۇرت ازايعان. اتاپ ايتقاندا، ەرەيمەنتاۋ، بۋراباي اۋداندارى مەن قوسشى قالاسىندا اۋىر جانە ورتاشا اۋىرلىقتاعى قىلمىستار ەكى ەسەگە ازايعان.
الايدا، ورتاشا جانە ونشا اۋىر ەمەس قىلمىستاردىڭ ازايۋىنا قاراماستان، اۋىر جانە اسا اۋىر قىلمىستار سانى كوبەيىپ وتىر. بۇل قۇقىق قورعاۋ ورگاندارىنان الدىن الۋ شارالارىن قايتا قاراۋدى تالاپ ەتەدى.
«جىل وتكەن سايىن الاياقتىق فاكتىلەرى، اسىرەسە ينتەرنەت الاياقتىقتار كوبەيىپ كەلەدى. ونلاين نەسيە راسىمدەۋمەن، جالعان لوتەرەيالارمەن، بانك اتىنان كەلگەن سمس حابارلامالار مەن جالعان قوڭىراۋلارمەن بايلانىستى قىلمىستاردىڭ سانى ەداۋىر ارتتى. مۇنداي فاكتىلەردىڭ باسىم بولىگى كوكشەتاۋ قالاسىندا تىركەلۋدە»، – دەدى ۆيكتور كراسنوۋسوۆ.وتباسى-تۇرمىستىق قاتىناستار سالاسىنداعى قۇقىق بۇزۋشىلىقتار سانى ستەپنوگورسك قالاسى مەن بۇلاندى اۋدانىندا وسكەنى بايقالدى. سونداي-اق، ەسىرتكىگە قاتىستى قىلمىستار دا ايتارلىقتاي كوبەيگەن، ولاردىڭ جارتىسىنا جۋىعى كوكشەتاۋدا انىقتالعان. قۇقىق قورعاۋ جۇيەسىنە تسيفرلىق تەحنولوگيالار بەلسەندى ەنگىزىلۋدە. Qamqor.gov.kz پورتالى ارقىلى ازاماتتار قىلمىس تۋرالى ارىز بەرە الادى، ايىپپۇلدارىن جانە وتىنىشتەرىنىڭ مارتەبەسىن تەكسەرە الادى. سونداي-اق، قىلمىس كارتاسى ارقىلى كەز كەلگەن تۇرعىن ءوز اۋدانىنىڭ كريمينوگەندىك جاعدايىمەن تانىسىپ، ساقتىق شارالارىن جوسپارلاي الادى. پلاتفورمادا التى ءتۇرلى ارنايى كارتا ۇسىنىلعان: قىلمىستار، جول-كولىك وقيعالارى، كامەلەتكە تولماعاندار اراسىنداعى قۇقىق بۇزۋشىلىقتار، جىنىستىق قىلمىس جاساعاندار، مەملەكەتتىك ورگاندارعا جولدانعان وتىنىشتەر مەن كاسىپكەرلىك سۋبەكتىلەرىنە جۇرگىزىلگەن تەكسەرۋلەر.
«سوتقا دەيىنگى تەرگەپ-تەكسەرۋلەردىڭ بىرىڭعاي ءتىزىلىمى (ەقدب)– قۇقىق قورعاۋ ورگاندارىنىڭ نەگىزگى تسيفرلىق جۇيەسى. سوڭعى جىلدارى قىلمىستىق ىستەردىڭ باسىم بولىگى ەلەكتروندى فورماتتا تىركەلىپ، تەرگەلۋدە. بۇل – تەرگەۋدىڭ اشىقتىعى مەن تيىمدىلىگىن ارتتىرىپ، ازاماتتارعا ءىستىڭ بارىسىن ونلاين باقىلاۋعا مۇمكىندىك بەرەدى»، – دەدى ۆيكتور كراسنوۋسوۆ.
