اقمولا وبلىسىندا جانۋارلار مەن ادامداردىڭ دەنساۋلىعى ءۇشىن ۆەتەرينارلىق باقىلاۋ كۇشەيتىلۋدە

اقمولا وبلىسىندا ۆەتەرينارلىق قاۋىپسىزدىكتى قامتاماسىز ەتۋ شارالارى كۇشەيتىلۋدە. ميلليونداعان اۋىل شارۋاشىلىعى جانۋارلارىن ۆاكتسيناتسيالاۋ، جاڭا مال كومەتىن ورىندار (سكوتوموگيلنيك) سالۋ، سويۋ پۋنكتتەرىنىڭ جەلىسىن كەڭەيتۋ جانە ۆەتەرينارلىق قىزمەتتەردى تسيفرلاندىرۋ جوسپارلانعان. كەشەندى ءتاسىلدىڭ ناتيجەسىندە وڭىردە قاۋىپتى اۋرۋ وشاقتارىنىڭ سانى ازايىپ، ەپيزووتيالىق تۇراقتىلىق نىعايۋدا. وتكەن جىلى وبلىستىق ۆەتەريناريا باسقارماسى 20 مودۋلدىك ۆەتەرينارلىق پۋنكت ساتىپ الىپ، ءۇش مال كومەتىن ورىن سالدى، تاعى التاۋى بيىل پايدالانۋعا بەرىلەدى. سونىمەن قاتار، كوكشەتاۋ قالاسىندا، تسەلينوگراد اۋدانىندا جانە «ەن-دالا» جشس بازاسىندا ءۇش جاڭا سويۋ پۋنكتى اشىلدى. كەلەسى جىلعا اۋىل ۆەتەرينارلارى ءۇشىن جىلجىمالى ينسينەراتورلار مەن ارنايى اۆتوكولىكتەر ساتىپ الۋ جوسپارلانعان. سونداي-اق، سەگىز اۋداندا توعىز سكوتوموگيلنيك سالۋعا وتىنىمدەر دايىندالدى. وبلىستا ۆەتەرينارلىق شارالاردى وڭتايلاندىرۋ جانە جانۋارلاردى سايكەستەندىرۋ ماقساتىندا تسيفرلىق تەحنولوگيالار بەلسەندى ەنگىزىلۋدە. بۇل ماقساتتا 236 پلانشەت پەن 25 كومپيۋتەر ساتىپ الىنۋدا. سونىمەن قاتار، «يسج-mobile» موبيلدىك قوسىمشاسى قولدانىلادى. 400 مىڭنان استام ءىرى قارا، ۇساق مال، جىلقى، شوشقا جانە تۇيە سايكەستەندىرىلمەك. ەپيزووتيالىق جاعدايدىڭ ايتارلىقتاي جاقسارۋى بايقالادى. وتكەن جىلى وبلىستا برۋتسەللەز بويىنشا تەك ءبىر عانا قولايسىز پۋنكت تىركەلسە، 2023 جىلى مۇنداي جەتى وشاق بولعان. بيىل جىل باسىنان بەرى بىردە-ءبىر قولايسىز وشاق انىقتالعان جوق. بۇل وڭ ديناميكا قابىلدانعان شارالاردىڭ تيىمدىلىگىن كورسەتەدى. اتاپ ايتقاندا، 6,4 ميلليون اۋىل شارۋاشىلىعى جانۋارى مەن قۇستى ۆاكتسيناتسيالاۋ جانە 1,3 ميلليونعا جۋىق جانۋاردى برۋتسەللەز جانە وزگە دە قاۋىپتى اۋرۋلارعا دياگنوستيكالاۋ جوسپارلانعان. ءبىرىنشى توقسان قورىتىندىسى بويىنشا 85,9 مىڭ ءىرى قارادان قان سىناماسى الىندى — بۇل جوسپاردىڭ 120,5%-ىن قۇرايدى. ونىڭ ىشىندە تەك 21 وڭ ناتيجە تىركەلگەن — بۇل تەكسەرىلگەندەردىڭ 0,03%-ى. قاڭعىباس جانۋارلاردىڭ سانىن رەتتەۋ باعىتىندا دا شارالار قابىلداندى. ءتورت مەملەكەتتىك باعدارلاما اياسىندا جەتى جەتكىزۋشى انىقتالىپ، يتتەردى اۋلاۋ، زارارسىزداندىرۋ (ستەريليزاتسيا) جانە ۆاكتسيناتسيالاۋ باستالدى. قازىرگى ۋاقىتتا 800-دەن استام يت ۇستالدى. وبلىس حالىقارالىق ساراپشىلارمەن دە بەلسەندى ىنتىماقتاستىق ورناتۋدا. ناۋرىز ايىندا اقمولا وبلىسىنا بۇۇ ازىق-تۇلىك جانە اۋىل شارۋاشىلىعى ۇيىمىنىڭ (فاو) ساراپشىلارى حوسە ماريا بلاسكو مەن دانيەل بەلتران-الكرۋدو كەلدى. فاو دەرەكتەرى بويىنشا، ادامعا جۇعاتىن جاڭا اۋرۋلاردىڭ 70%-ى جانۋارلاردان تارايدى. سوندىقتان ءاربىر جانۋار يەسى ونىڭ دەنساۋلىعىنا جاۋاپتى. ەڭ قاۋىپتى اۋرۋلار قاتارىنا برۋتسەللەز، كۇيدىرگى ء(سىبىر جاراسى), حلاميديوز، ءتۇيىرلى دەرماتيت (نودۋليارنىي دەرماتيت) جاتادى. الدىن الۋ شارالارى رەتىندە دەزينفەكتسيا، ۆاكتسيناتسيا، كەمىرگىشتەردى جويۋ جانە كارانتيندىك شارالار جۇرگىزىلەدى. اقمولا وبلىسى جانۋارلار مەن ادامدار دەنساۋلىعىن قورعاۋ جولىندا ۆەتەرينارلىق قاۋىپسىزدىك جۇيەسىن ۇزدىكسىز جەتىلدىرۋدى جالعاستىرۋدا.