الماتىدا Orda.kz اقپارات اگەنتتىگىنىڭ جۋرناليستەرى ەكس-پرەزيدەنت نۇرسۇلتان نازارباەۆتىڭ وتباسى تۇراتىن رەزيدەنتسيا ماڭىندا ءتۇسىرىلىم جۇرگىزۋ كەزىندە ۇستالدى، دەپ حابارلايدى “ادىرنا” ۇلتتىق پورتالى باسىلىمعا سىلتەپ.
وقيعا دۋلاتي كوشەسىندە ورىن العان. جۋرناليستەر قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ جارى سارا نازارباەۆانىڭ جاعدايىنا قاتىستى تاراعان قاۋەسەتتەر اياسىندا رەزيدەنتسيا ماڭىندا كاسىبي قىزمەتىن اتقارىپ جۇرگەن. باسىلىم مالىمەتىنشە، پوليتسيا قىزمەتكەرلەرى تىلشىلەردەن تۇسىرىلگەن بارلىق ماتەريالدى جويۋدى تالاپ ەتكەن.
“جۋرناليستەر زاڭ بۇزعان جوق. ءبىزدىڭ قىزمەتكەرلەرگە كاسىبي مىندەتىن ورىنداۋعا كەدەرگى كەلتىرىپ قانا قويماي، ولاردى ۇستاپ اكەتتى. قازىرگە دەيىن بوساتىلعان جوق. بۇل ماسەلەمەن رەداكتسيا اينالىسىپ جاتىر. پوليتسيا دەپارتامەنتىنەن رەسمي تۇسىنىكتەمە كۇتىپ وتىرمىز”، – دەپ حابارلادى Orda.kz رەداكتسياسى.
باق بەتتەرىندە بىرنەشە ۋاقىت بۇرىن تاراعان اقپارات بويىنشا، ۇستالعان جۋرناليستەر قالالىق پوليتسيا باسقارماسىنان بوساتىلعان.
كەشە الماتىدا دۋلاتي كوشەسىندە كولىك قوزعالىسى توقتاتىلعان. اسىرەسە تۇڭعىش پرەزيدەنت ساياباعىنىڭ جوعارعى جاعىنداعى رەزيدەنتسيا ماڭىندا قاۋىپسىزدىك كۇشەيتىلگەنى ايتىلدى.
سونداي-اق ساين داڭعىلى مەن وعان جاقىن ورنالاسقان بىرقاتار كوشەلەردە دە كولىك قوزعالىسى شەكتەلگەنى حابارلانعان ەدى.
ۇقساس جاڭالىقتار
