قىرعىزستاننىڭ جوعارعى سوتى ەلدىڭ بۇرىنعى پرەمەر-ءمينيسترى ساپار يساقوۆقا قاتىستى بارلىق ۇكىمدەردى جويدى، دەپ حابارلايدى "ادىرنا" ۇلتتىق پورتالى 24.kg باسىلىمىنا سىلتەمە جاساپ.
ول بۇعان دەيىن جەمقورلىق ءۇشىن ۇزاق مەرزىمگە باس بوستاندىعىنان ايىرىلعان بولاتىن.
بيىلعى جىلدىڭ 29 ساۋىرىندە رەسپۋبليكاداعى ەڭ جوعارعى سوت ورگانى باس پروكۋراتۋرا مەن ادۆوكاتتىڭ يساقوۆقا قاتىستى قىلمىستىق ءىستى «جاڭادان اشىلعان ءمان-جايلار» بويىنشا قايتا قاراۋ تۋرالى ءوتىنىشىن قاناعاتتاندىردى.
وسىعان بايلانىستى بىشكەكتەگى سۆەردلوۆ اۋداندىق سوتىنىڭ 2019 جىلعى 6 جەلتوقسانداعى، بىشكەك قالالىق سوتىنىڭ 2020 جىلعى 23 ناۋرىزداعى، سونداي-اق جوعارعى سوتتىڭ 2020 جىلعى 22 ماۋسىم مەن 2021 جىلعى 2 ناۋرىزداعى قاۋلىلارى جويىلدى.
ەندى بۇل ءىستى سۆەردلوۆ اۋداندىق سوتى باسقا قۇرامدا قايتا قارايتىن بولادى.
ساپار يساقوۆ بۇرىنعى پرەزيدەنت المازبەك اتامباەۆتىڭ وڭ قولى رەتىندە تانىلعان. ول 2018 جىلدىڭ جازىندا تۇتقىندالعان ەدى.
بۇرىنعى پرەمەر-مينيسترگە قاتىستى بىرنەشە ءىس قوزعالعان. العاشقى ۇكىم بويىنشا يساقوۆ 18 جىلعا سوتتالعان، بىراق كەيىن بۇل شەشىمدى جوعارعى سوت جويدى.
سونىمەن قاتار، يساقوۆقا بىشكەك جەو-ىن جاڭارتۋ كەزىندەگى جەمقورلىق فاكتىلەرى بويىنشا ايىپ تاعىلىپ، ول 15 جىلعا باس بوستاندىعىنان ايىرىلعان. بۇل ۇكىم 2025 جىلعى ءساۋىر ايىنا دەيىن كۇشىندە بولعان.
2020 جىلى قىرعىزستاندا قازان ايىنداعى وقيعالار كەزىندە يساقوۆ تۇرمەدەن بوساتىلدى. بۇل وقيعالار بارىسىندا ەلدە بيلىك اۋىسقان. سول كەزدە يساقوۆقا «دەمالىس» بەرىلگەنى ايتىلعان، الايدا ول كەيىن كولونياعا قايتا ورالماعان. 2020 جىلدىڭ 26 قازانىندا بۇرىنعى پرەمەر-مينيسترگە حالىقارالىق ىزدەۋ جاريالاندى.
