قازاقستاندا ءبىلىم بەرۋ مەكەمەلەرىنىڭ قاۋىپسىزدىگىن كۇشەيتۋ ماقساتىندا كۇزەت قىزمەتىنە بىرىڭعاي تالاپتار بەلگىلەندى، دەپ حابارلايدى "ادىرنا" ۇلتتىق پورتالى.
پرەمەر-ءمينيستردىڭ ورىنباسارى ەرمەك كوشەرباەۆتىڭ ايتۋىنشا، بالاباقشالار مەن مەكتەپتەردەگى قاۋىپسىزدىك شتاتتىق قىزمەتكەرلەردىڭ كومەگىمەن نەمەسە ارنايى ليتسەنزياسى بار كۇزەت ۇيىمدارىن تارتۋ ارقىلى قامتاماسىز ەتىلەدى.
«كۇزەت قىزمەتىن الۋ كەزىندە ناقتى ىرىكتەۋ كريتەريلەرىن، مامانداردىڭ بىلىكتىلىك دەڭگەيىن، ينجەنەرلىك-تەحنيكالىق جابدىقتىڭ بولۋىن تالاپ ەتەتىن ۇلگىلىك كونكۋرستىق قۇجاتتاما ازىرلەندى»، — دەدى كوشەرباەۆ.
جاڭا تالاپتارعا سايكەس، كۇزەتشىلەردىڭ جاسى 25 پەن 50 جاس ارالىعىندا بولۋى ءتيىس، ولار ارنايى دايىندىقتان ءوتۋى كەرەك جانە قارۋ الىپ جۇرۋگە ليتسەنزياسى بولۋى شارت. سونىمەن قاتار، سوتتىلىعى بولماۋى، كەڭسە عيماراتى مەن كەم دەگەندە ەكى جەدەل ارەكەت ەتۋ توبىنىڭ بولۋى تالاپ ەتىلەدى.
قازىرگى تاڭدا ەلىمىزدە 6,9 مىڭنان استام نىسان ليتسەنزيالانعان كۇزەتپەن قامتىلعان.
سونداي-اق، 2022 جىلدان بەرى 20 مىڭعا جۋىق وقۋ ورنىندا 220 مىڭنان استام تسيفرلىق بەينەباقىلاۋ كامەرالارى ورناتىلدى. بۇل قۇرىلعىلار پوليتسيانىڭ جەدەل باسقارۋ ورتالىقتارىنا قوسىلعان جانە اقپاراتتى 30 كۇنگە دەيىن ساقتاي الادى.
كوشەرباەۆ ءبىلىم بەرۋ ۇيىمدارىندا جاساندى ينتەللەكت جۇيەسى ەنگىزىلگەنىن دە اتاپ ءوتتى:
«بۇل جۇيە مەكتەپتەگى جانە ونىڭ اۋماعىنداعى بۋللينگتى اۆتوماتتى تۇردە انىقتاۋعا جانە بىردەن مەكتەپ اكىمشىلىگىنە حابارلاۋعا مۇمكىندىك بەرەدى»، — دەدى ول.
