ول ءوزىنىڭ Facebook پاراقشاسىندا زايىرلى مەملەكەت قالپىمىزدى ساقتاپ قالۋىمىز كەرەكتىگىن ايتتى. مۇحتار تايجان جازباسىندا يدەولوگياسى قالىپتاسپاعان مەملەكەتتىڭ ءىشى الاي-دۇلەي ەكەنىنە نالىدى.
سونىمەن قاتار، ول مۇحامەدجان تازابەكتىڭ ءتارتىپ ساقشىلارىن جيناپ الىپ، ۋاعىز وقىپ جۇرگەنىنە قارسىلىق تانىتتى.
"زايىرلى، دەموكراتيالىق مەملەكەت دەنەنىمىز نە؟ ۇكىمەت دىنگە ارالاسپاۋ كەرەك، راس. بىراق، ءدىن دە مەملەكەت ماسەلەلەرىنە ارالاسپاۋى كەرەك قوي! ءبىزدىڭ مەملەكەتىمىزدە يدەولوگيالىق جۇمىس بولماعاندىقتان، يدەولوگيا سالاسىندا دا بارداك بوپ تۇر.
مىسالى، مۇحامەدجان تازابەك، "اسىل ارنانىڭ" جەتەكشىسى نەگە مەملەكەتتىك ورگاندارعا بارىپ، پوليتسياعا، اسكەرلەرگە، مەكتەپتەرگە، ۆۋزدارعا ۋاعىز ايتىپ ءجۇر؟ بۇنداي مۇمكىندىكتى وعان كىم بەرىپ وتىر؟ نەگە ول پوليتسيانى بەيبىت ميتينگكە شىققان حالىققا قارسى ايداپ سالۋدا؟ وعان بۇنداي قۇقىقتى كىم بەردى؟ بۇنداي ارەكەت ناعىز ارانداتۋشىلىق دەپ بىلەم. پوليتسيا بەيبىت شەرۋگە شىققان حالىققا كۇش جۇمساماۋ كەرەك. بەيبىت ميتينگ-شەرۋدى وتكىزۋ - حالىقتىڭ كونستيتۋتسيالىق قۇقىعى.
نەگىزى دىنشىلەر ساياساتقا ارالاساتىن بولسا، ءتۇبى قازاقستاندى حاليفاتقا اينالدىرۋى مۇمكىن. ساۋد ارابيا، اۋعانستان، سيريا سەكىلدى ەلدەرگە اينالامىز. بۇعان دايىنسىڭدار ما؟ ءتۇبى ءسوزسىز وتە قاندى سوعىز بولادى. بىزگە شاريعات، الدە، دەموكراتيا كەرەك پە؟ تاڭداۋ جاساۋىمىز قاجەت، سەبەبى، بۇل - ءبىر-بىرىنە 100% قاراما-قايشى قۇبىلىستار.
بۇگىنگى كۇندەردى رەپرەسسيا دەيمىز، ال سول كەزدە قاندى تەررور باستالادى. ادامداردىڭ باستارى مەن قولدارىن شابۋ، ايەلدەردى تاسپەن ءولتىرۋ، ت.ب. ويتكەنى، حاليفات شاريعات زاڭىمەن ءومىر سۇرەدى. ەلىمىز وتە قاراڭعى ەلگە اينالادى. سوندىقتان ءبىزدىڭ زايىرلى مەملەكەتتى ساقتاپ قالعانىمىز جون.
مەملەكەت ءدىن ماسەلەلەرىنە، ءدىن مەملەكەت ماسەلەلەرىنە ارالاسپاۋ كەرەك. ءدىن - ادامنىڭ جەكە شارۋاسى، قۇقى. زايىرلى مەملەكەتىمىز دەگەن وسى. الاشوردا قايراتكەرلەرى زايىرلى مەملەكەتكە زار بولدى. ءبىز دە وسى ۇستانىمدا قالۋىمىز كەرەك", - دەپ دابىل قاقتى مۇحتار تايجان.
"ادىرنا" ۇلتتىق پورتالى
