تسەلينوگراد اۋدانىنا قاراستى راحىمجان قوشقارباەۆ اۋىلىندا ماڭىزدى وقيعا ورىن الدى – ەلدى مەكەننىڭ ەلەكتر جەلىلەرى «ارەك» اق-ىنا سەنىمگەرلىك باسقارۋعا تاپسىرىلدى. بۇل – اقمولا وبلىسىندا مەملەكەت باسشىسىنىڭ ەنەرگەتيكا سالاسىن دامىتۋ جونىندەگى تاپسىرماسىنا سايكەس جۇزەگە اسقان العاشقى جوبا.
وتكەن جىلدىڭ سوڭىندا اۋدان اكىمدىگى مەن «ارەك» كومپانياسى اراسىندا كەلىسىمشارت جاسالىپ، ناتيجەسىندە ۇزىندىعى 1500 مەتردەن اساتىن ەلەكتر بەرۋ جەلىلەرى ەندى ەنەرگيا تاراتۋشى ۇيىمنىڭ باسقارۋىنا ءوتتى. بۇعان دەيىن اۋىل تۇرعىندارى ەلەكتر قۋاتىن جەكە مەنشىك ترانسفورماتورلار ارقىلى تۇتىناتىن نەمەسە ديزەلدى گەنەراتور پايدالانۋعا ءماجبۇر بولاتىن. ەندى ولار تۇراقتى جانە ءتيىمدى ەنەرگيامەن قامتىلماق.
«ارەك» اق وكىلدەرى بۇل وزگەرىستىڭ ماڭىزدىلىعىن اتاپ ءوتتى:– ەلەكتر جەلىلەرىنىڭ باسقارۋعا بەرىلۋى اپاتتى جاعدايلاردىڭ الدىن الۋعا جانە تەحنولوگيالىق ۇزىلىستەردى جىلدام جويۋعا مۇمكىندىك بەرەدى. قازىردىڭ وزىندە ابونەنتتەردى قوسۋ جۇمىستارى جۇرگىزىلدى. ترانسفورماتوردىڭ قۋاتى 100-گە جۋىق ءۇيدى ەلەكترمەن قامتۋعا جەتكىلىكتى. جاڭا جەلىلەر جەكە تۇرعىن ءۇي قۇرىلىسىنا ارنالعان اۋماقتاردى جارىقپەن قامتىپ، ينفراقۇرىلىم دامۋىنا جول اشتى. قازىردىڭ وزىندە سۋ جانە ەلەكتر جۇيەلەرى ەنگىزىلدى. بۇل جەر تەلىمدەرىنىڭ كەزەكتىلىگىن جىلدام جىلجىتۋعا دا سەپ بولادى، – دەيدى ماماندار.اۋىل تۇرعىندارى دا بۇل جاڭالىقتى قۋانىشپەن قابىلداپ، بيلىك وكىلدەرىنە العىسىن بىلدىرۋدە. ەندى ولار جارىقتىڭ وشۋىنەن قورىقپاي، ءۇي شارۋالارىن تولىقتاي جۇرگىزە الادى. اۋىل تۇرعىنى زارينا سۇلەيمەنوۆا ءوز قۋانىشىمەن ءبولىستى:– ءبىز ون جىل بويى جارىقسىز ءومىر سۇردىك. بۇل جاعدايعا كومەكتەسكەندەردىڭ بارلىعىنا العىس ايتامىز. بۇل – ءبارىمىز ءۇشىن ۇلكەن قۋانىش. ەندى ارقايسىمىزدىڭ ءوز شامىمىز جانادى، ەشكىمگە تاۋەلدى بولمايمىز. كوشەدە جارىق بار، ءۇيىمىز دە جارىق. ءبىزدىڭ باسشىلىق حالىق ءۇشىن جۇمىس ىستەپ جاتىر. ەلەكتر جەلىلەرىنىڭ «ارەك» اق-ىنا سەنىمگەرلىك باسقارۋعا بەرىلۋى – تسەلينوگراد اۋدانىنىڭ ەنەرگەتيكالىق ينفراقۇرىلىمىن جاڭعىرتۋدىڭ ماڭىزدى كەزەڭى. بۇل شەشىم قىزمەت كورسەتۋ ساپاسىن ارتتىرىپ قانا قويماي، اۋىلدىڭ ءارى قاراي دامۋىنا جانە تۇرعىنداردىڭ ءومىر ءسۇرۋ دەڭگەيىن جاقسارتۋعا سەپ بولادى. وبلىس اكىمدىگى الداعى ۋاقىتتا دا بۇل باعىتتاعى جۇمىستاردى جالعاستىرىپ، حالىقتى زاماناۋي يگىلىكتەرمەن جانە تۇراقتى ەلەكترمەن قامتاماسىز ەتۋدى كوزدەپ وتىر.
