2025 جىلدىڭ 18–21 مامىر ارالىعىندا استانادا مادەنيەت جانە ونەر قىزمەتكەرلەرىنىڭ فورۋمى ءوتتى. وعان ەلىمىزدىڭ بارلىق وڭىرىنەن، سونىمەن قاتار شەتەلدىك مادەني جانە شىعارماشىلىق قاۋىمداستىقتاردان كەلگەن 700-دەن استام ادام قاتىستى. اۋقىمدى ءىس-شارا 21 مامىر – مادەنيەت جانە ونەر قىزمەتكەرلەرىنىڭ كاسىبي مەرەكەسىنە وراي ۇيىمداستىرىلدى.
سالتاناتتى جيىن بارىسىندا فورۋم قاتىسۋشىلارىن قازاقستان رەسپۋبليكاسى پرەمەر-ءمينيسترىنىڭ ورىنباسارى ەرمەك كوشەرباەۆ قۇتتىقتاپ، مەملەكەت باسشىسىنىڭ اتىنان بىرقاتار مەملەكەتتىك ناگرادالاردى تابىستادى.
«قۇرمەت» وردەنىمەن نۇرعيسا تىلەنديەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترىنىڭ ءارتىسى لاريسا ناسرەتدينوۆا ماراپاتتالدى. «ەرەن ەڭبەگى ءۇشىن» مەدالىمەن «Mezzo» ۆوكالدىق توبىنىڭ سوليستەرى — اسان نۇربەرگەنوۆ، جانىبەك سەيداحمەتوۆ، جاسۇلان سىدىقوۆ، مەدەت ورىمباەۆ، سونداي-اق رەسپۋبليكالىق اكادەميالىق نەمىس دراما تەاترىنىڭ ءارتىسى تيمۋر بوندانك ماراپاتتالدى.
«شاپاعات» مەدالى ناتاليا ساتس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىنىڭ پەداگوگيكا ءبولىمىنىڭ مەڭگەرۋشىسى ساۋلە باينيەتوۆاعا تابىستالدى.
«قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى كۇلاش بايسەيىتوۆا اتىنداعى دارىندى بالالارعا ارنالعان رەسپۋبليكالىق مۋزىكا مەكتەپ-ينتەرناتىنىڭ پەداگوگى كۇلاش مولداعاليەۆاعا جانە ءسابيت مۇقانوۆ اتىنداعى مەملەكەتتىك قازاق مۋزىكالىق-دراما تەاترىنىڭ ديرەكتورى ءبىرجان جالعاسباەۆقا بەرىلدى.
بۇعان دەيىن مەملەكەت باسشىسى ەل مادەنيەتىن دامىتۋعا سىڭىرگەن ەڭبەگى ءۇشىن كورنەكتى مادەنيەت جانە ونەر قايراتكەرلەرىنە مەملەكەتتىك ناگرادالار تابىستاپ، ولاردىڭ ۇلت رۋحانياتىنا قوسقان زور ۇلەسىن اتاپ وتكەن بولاتىن. اقوردادا وتكەن سالتاناتتى جيىن بارىسىندا قاسىم-جومارت توقاەۆ مەملەكەت مادەنيەت پەن ونەر سالاسىنىڭ دامۋىنا ءاردايىم ايرىقشا كوڭىل بولەتىنىن ءسوز ەتتى. ويتكەنى بۇل سالالاردىڭ دەڭگەيى ەل رۋحانياتىنىڭ دامۋىمەن تىعىز بايلانىستى.
ايتا كەتەيىك، استانادا وتكەن فورۋم اياسىندا 20-دان استام تاقىرىپتىق سەسسيا مەن پانەلدىك پىكىرتالاس ۇيىمداستىرىلدى. ولارعا سالالىق مينيسترلىكتەردىڭ وكىلدەرى، ساراپشىلار، مادەنيەت قايراتكەرلەرى جانە فرانتسيا، قىتاي، يتاليا، تۇركيا، وڭتۇستىك كورەيا، وزبەكستان، رەسەي سىندى ەلدەردەن كەلگەن شەتەلدىك سپيكەرلەر قاتىستى.
ءبىلىم بەرۋ باعىتى بويىنشا 30-دان استام ءىس-شارا ۇيىمداستىرىلدى. وندا قاتىسۋشىلار مۋزەي مەنەدجمەنتى مەن تەاتر ونەرىنەن باستاپ، تسيفرلىق تەحنولوگيالار مەن مادەني ماركەتينگكە دەيىنگى بىرقاتار ماڭىزدى ماسەلەلەردى تالقىلادى.
فورۋم اياسىندا قازاقستان مۋزەيلەرىنىڭ كونگرەسى دە ءوتتى. وندا ەكسپوزيتسيالىق قىزمەتتىڭ جاڭا فورمالارىن ەنگىزى، تسيفرلاندىرۋ جانە كورەرمەنمەن ءوزارا بايلانىس ورناتۋ جولدارى ءسوز بولدى.
فورۋم مەملەكەتتىك مادەني ساياساتتىڭ باسىم باعىتتارىن ايقىندايتىن، كرەاتيۆتى يندۋستريانى دامىتۋ، ماتەريالدىق ەمەس مۇرانى ساقتاۋ جانە حالىقارالىق مادەني ىنتىماقتاستىقتى نىعايتۋ ماسەلەلەرى تالقىلانعان نەگىزگى الاڭعا اينالدى.
اۋقىمدى ءىس-شارانىڭ قورىتىندىسى سالتاناتتى گالا-كونتسەرتپەن تۇيىندەلدى.
